فينليانديا ەكسپو-2017-گە قاتىسۋ تۋرالى شارتقا قول قويدى

استانادا فينليانديا رەسپۋبليكاسىنىڭ «ەكسپو-2017» حالىقارالىق مامانداندىرىلعان كورمەسىنە قاتىسۋ شارتىنا قول قويۋ ءراسىمى ءوتتى. بۇل تۋرالى pm.kz حابارلادى. قۇجاتقا «استانا ەكسپو-2017» ۇلتتىق كومپانياسىنىڭ باسقارما توراعاسى احمەتجان ەسىموۆ جانە فينليانديا ۇلتتىق سەكتسياسىنىڭ كوميسسارى سەۆەري كەينيالا قول قويدى. كەزدەسۋ كەزىندە احمەتجان ەسىموۆ فين تاراپىن كورمەنى ۇيىمداستىرۋ جانە ەكسپو-2017-ءنى حالىقارالىق تۇرعىدان ىلگەرىلەتۋ جونىندەگى جۇمىسپەن تانىستىردى. ۇلتتىق كومپانيا باسشىسى بۇگىنگى تاڭدا كورمەگە قاتىساتىنىن 98 ەل مەن 18 حالىقارالىق ۇيىم راستاعاندىعىن ايتتى. «جاڭارتىلعان ەنەرگيا كوزدەرىن قولدانۋ سالاسىندا فينليانديا ەۋروپالىق ەلدەر اراسىندا كوشباسشىلاردىڭ ءبىرى بولىپ تابىلادى. جەك دامىتۋداعى ءبىزدىڭ تاجىريبەمىز كورمەگە قاتىسۋشىلار مەن كەلۋشىلەر ءۇشىن قىزىقتى بولاتىندىعىنا سەنىمدىمىن», – دەدى ا.ەسىموۆ. ءوز كەزەگىندە, فينليانديانىڭ ۇلتتىق سەكتسياسىنىڭ كوميسسارى سەۆەري كەينيالا ەلدىڭ وسىنداي اۋقىمدى حالىقارالىق ءىس-شارالارعا باسقا سكانديناۆيالىق ەلدەرمەن بىرلەسە قاتىسقاندىعىن مالىمدەدى. «الايدا, ءبىزدىڭ دوستىق قاتىناستاردى جانە كورمەنىڭ وزەكتى تاقىرىبىن ەسكەرە وتىرىپ, فينليانديا جەكە ءوزى قاتىسۋعا شەشىم قابىلدادى», – دەدى ول. ايدار ورىسباەۆ