مۇمكىندىگى شەكتەۋلى جاندارعا ەلەكتروندى قول اربالار بەرىلدى

وڭتۇستىك قازاقستان وبلىسىنىڭ كەنتاۋ قالاسىندا مۇمكىندىگى شەكتەۋلى ازاماتتارعا وزدىگىنەن جۇرەتىن قول اربالار تابىس ەتىلدى. ەلەكتروندى اربا كۇن ساۋلەسىنەن قۋات الادى, ءارى ونى توق كوزىنە جالعاپ تا قۋاتتاۋعا بولادى. اككۋمۋلياتوردىڭ كۇشى 30 شاقىرىمعا دەيىن جەتەدى. قول اربانى قازاق تۇرىك ۋنيۆەرسيتەتىنىڭ وقىتۋشىلارى مەن ستۋدەنتتەرى قۇراستىرىپ شىعارعان. مۇمكىندىگى شەكتەۋلى جانداردىڭ قاۋىپسىزدىگىن ويلاعان ولار قۇراستىرۋشى بولشەكتەردىڭ ساپالىسىن تاڭداعان. قايىرىمدىلىق شاراسى اياسىندا 20 ادامعا اربا تەگىن تاراتىلدى. «مەن وسىنداي مۇمكىندىگى شەكتەۋلى جاندارعا كومەك قولىن سوزعانىما وتە قۋانىشتىمىن. ەندى جۇرە المايتىن ادامدار اربانىڭ كومەگىمەن دىتتەگەن جەرىنە جەتە الادى. ازىرگە شىمكەنت, كەنتاۋ, تۇركىستان, تورتكۇل قالاسىنىڭ تۇرعىندارىنا بەردىك. كەلەشەكتە تاعى 100 دانا جاسايمىز دەگەن جوسپارىمىز بار», – دەدى ونەرتاپقىش فەرحاد چايىر. ايمان مۇقىشەۆا