ەڭ تاڭداۋلىعا – جەڭىل كولىك

وبلىستا اتاقتى ۆەلوشاباندوز, لوندون وليمپيا­داسىنىڭ جەڭىمپازى الەكساندر ۆينوكۋروۆتىڭ ءىزباسارلارى كوبەيىپ, سانىمەن قاتار ساپالىق قۇرامى دا ارتىپ كەلەدى. 1998 جىلدان بەرى 30-دان استام ەڭبەك سىڭىرگەن, حالىقارالىق دارەجەدەگى جانە قازاقستاننىڭ سپورت شەبەرلەرى تاربيەلەنگەنىن, ءارتۇرلى جاستاعى ۇلتتىق قۇرامالار ساپىندا 22 جەرلەسىمىزدىڭ ونەر كورسەتىپ جۇرگەنىن ەسكەرسەك, وڭىردە ۆەلوسپورتتىڭ دامۋىنا جان-جاقتى جاعداي جاسالعانىن بايقاۋعا بولادى. ولاردىڭ اراسىندا الەم چەمپيوندارى مەن ءىرى حالىقارالىق جارىستاردىڭ جەڭىمپازدارى الەكسەي لۋتسەنكونىڭ, ارتەم زاحاروۆتىڭ, باقتيار قوجاتاەۆتىڭ ەسىمدەرى ماقتانىشپەن اتالادى. سوڭعى ەكەۋى ريو-دە-جانەيرودا وتكەن وليمپياداعا قاتىسۋ قۇرمەتىنە يە بولدى. باقتيار «Astana Pro Team» كاسىبي ۆەلوكومانداسىنىڭ بەلدى مۇشەسى سانالادى. بۇگىنگى كۇنى ۆەلوسپورت مەكتەبىندە 300-گە جۋىق ورەن جاتتىعادى. جاستار سارايىندا وتكەن جيىندا «ۇزدىك وبلىستىق بالالار مەن جاسوسپىرىمدەر سپورت مەكتەبى» اتالىمى بويىنشا تاڭداۋلىلار ماراپاتتالدى. ءبىرىنشى ورىنعا وليمپيادالىق رەزەرۆتىڭ ۆەلوسپورتقا مامانداندىرىلعان بالالار مەن جاسوسپىرىمدەر سپورت مەكتەبى لايىقتى دەپ تانىلىپ, وبلىس اكىمىنىڭ ورىنباسارى انارحان دۇيسەنوۆا ايماق باسشىسى اتىنان جەڭىل كولىكتىڭ كىلتى مەن 3 ميلليون تەڭگەنىڭ سەرتيفيكاتىن سالتاناتتى تۇردە تاپسىردى. ءومىر ەسقالي, «ەگەمەن قازاقستان» سولتۇستىك قازاقستان وبلىسى