ەلباسى قازاق ۇلتتىق حورەوگرافيا اكادەمياسىنىڭ رەكتورىن قابىلدادى

مەملەكەت باسشىسى نۇرسۇلتان نازارباەۆ قازاق ۇلتتىق حورەوگرافيا اكادەمياسىنىڭ رەكتورى التىناي اسىلمۇراتوۆانى قابىلدادى. ول رەكتوردى جاڭا قىزمەتكە تاعايىندالۋىمەن قۇتتىقتاپ, تابىس تىلەدى. بۇل تۋرالى akorda.kz حابارلادى. نۇرسۇلتان نازارباەۆ اكادەميانىڭ ورتالىق ازياداعى كوپ دەڭگەيلى كاسىبي جانە حورەوگرافيالىق ءبىلىم بەرەتىن تولىق تسيكلدى العاشقى جوعارى وقۋ ورنى ەكەندىگىنە توقتالدى. «بۇل نىسان بارلىق تالاپقا ساي كەلەتىن جوبا بويىنشا سالىندى. اتاپ ايتقاندا, وقۋ كورپۋستارى, وقىتۋشىلار مەن وقۋشىلار ءۇشىن تۇرعىن ءۇي كەشەندەرى سالىندى, دەمالىس ءۇشىن جاعدايلار جاسالدى, مەديتسينالىق قىزمەت كورسەتۋ مۇمكىندىگى قاراستىرىلۋدا. اكادەميا ەكسپو كورمەسىنىڭ حالىقارالىق قارجى ورتالىعى ورنالاساتىن ايماعىنا تاياۋ جەردەن ورىن تەپكەن», دەدى قازاقستان پرەزيدەنتى. ەلباسى بالالار مەن جاستاردى شىعارماشىلىققا جانە ونەرگە سۇيىسپەنشىلىك رۋحىندا تاربيەلەۋ قوعامنىڭ باستى مىندەتىنىڭ ءبىرى بولىپ سانالاتىنىن اتاپ ءوتتى. بۇدان بولەك, نۇرسۇلتان نازارباەۆ ەلىمىزدەگى كوپتەگەن حورەوگرافيالىق, مۋزىكالىق مەكتەپتەر مەن شىعارماشىلىق ۇجىمدار بىلىكتىلىگى جوعارى ماماندارعا مۇقتاج بولىپ وتىرعانىنا نازار اۋداردى.   داستان كەنجالين فوتو: akorda.kz