قىتاي مەن قازاقستان ىنتىماقتاستىعىنىڭ جاي-كۇيى تالقىلاندى

قازاقستاننىڭ قىتايداعى ەلشىسى شاحرات نۇرىشەۆ قحر سىرتقى ىستەر ءمينيسترىنىڭ كومەكشىسى لي حۋەيلايمەن كەزدەستى, دەپ حابارلادى inform.kz كەزدەسۋ بارىسىندا تاراپتار ەكى ەل اراسىنداعى ساياسي, ەكونوميكالىق جانە مادەني-گۋمانيتارلىق سالاداعى ىنتىماقتاستىقتىڭ قازىرگى جاي-كۇيى مەن بولاشاعىن جانە ەڭ جوعارى دەڭگەيدە قول جەتكىزىلگەن ۋاعدالاستىقتاردى جۇزەگە اسىرۋ جولدارىن تالقىلادى. اسىرەسە, بيىل قىركۇيەك ايىندا وتەتىن قازاقستان پرەزيدەنتىنىڭ قىتايعا ساپارى جانە «G-20» سامميتىنە قاتىسۋىنا دايىندىق ماسەلەلەرىنە ەرەكشە نازار اۋدارىلدى. «نۇرلى جول» جاڭا ەكونوميكالىق ساياساتى جانە قىتاي باستاماسى «جىبەك جولى ەكونوميكالىق بەلدەۋىنىڭ» توعىسۋىن ءىس جۇزىندە جۇزەگە اسىرۋ, ەكى ەل ىسكە اسىراتىن يندۋستريالاندىرۋ جانە ينۆەستيتسيالار باعدارلاماسىنا قاتىساتىن كاسىپورىندار ءۇشىن قولايلى جاعداي تۋعىزۋ جانە پراكتيكالىق ىنتىماقتاستىقتىڭ جاڭا باعىتتارىن كەڭەيتۋ بويىنشا بايسالدى پىكىر الماسۋ ءوتتى. قازاقستاندىق ديپلومات ەلىمىز اۋماعىندا بىرلەسىپ جۇزەگە اسىرىلىپ جاتقان ينفراقۇرىلىمدىق جوبالاردىڭ ماڭىزدىلىعىنا توقتالدى. مىسال رەتىندە استاناداعى جەڭىل رەلس جۇيەسىنىڭ (LRT) قۇرىلىسىن اتاپ كورسەتتى. ءوز كەزەگىندە لي حۋەيلاي بىرلەستىك اياسىندا ودان ءارى تىعىز ىنتىماقتاستىققا ۇمىتتەنەتىنىن ءبىلدىردى. سونداي-اق قىتاي ديپلوماتى ەۋرازيالىق ەكونوميكالىق وداق پەن جىبەك جولى ەكونوميكالىق بەلدەۋىن ۇشتاستىرۋدا قازاقستاننىڭ ماڭىزدى ءرولىن اتاپ ءوتتى. ش. نۇرىشەۆ قىتايلىق ديپلوماتقا جاھاندىق قاۋىپسىزدىكتى قامتاماسىز ەتۋگە قاتىستى قازاقستاننىڭ حالىقارالىق باستامالارى جونىندە باياندادى, سونداي-اق ونى سەمەي يادرولىق سىناق پوليگونىنىڭ جابىلعانىنا 25 جىل تولۋىنا وراي 29 تامىز كۇنى وتەتىن ءىس-شاراعا قاتىسۋعا شاقىردى. ايدار ورىسباەۆ