مەملەكەت باسشىسى نۇرسۇلتان نازارباەۆ سارسەنبى كۇنى جۇمىس بابىنداعى ساپارمەن ارشالى اۋدانىنداعى يجەۆسكوە اۋىلىندا بولىپ, وسىنداعى كوپ سالالى وندىرىستىك كووپەراتيۆتىڭ جۇمىسىمەن تانىسىپ, تۇرعىنداردىڭ جاراسىمدى تىنىس-تىرشىلىگىنە قانىقتى. اتى وبلىستان تىسقارى جەرلەرگە دە كەڭىنەن ءمالىم كاسىپورىننىڭ ۋاقىت تالابىنداعى قارىشتى دا قۋاتتى قادامى مەملەكەت تاراپىنان جاسالىپ جاتقان اۋقىمدى شارالاردىڭ قايتارىمى مولدىعىن ايقىن اڭعارتتى.
ەلباسىنىڭ كورتەجى قالالىق ۇلگىدەگى اۋىلدىڭ اسەم كوشەلەرىن بويلاپ, بىردەن «يجەۆسكي» ءوندىرىستىك الاڭدارىنا اتباسىن تىرەدى. اشىق الاڭداعى ونىمدەر كورمەسىن, ونىمدىلىگى جوعارى زامانالىق تەحنيكالار تىزبەسىن تاماشالاپ, جاڭادان بوي كوتەرگەن ءوندىرىستىك عيماراتتارداعى ەڭبەك ىرعاعىنا دەن قويعان نۇرسۇلتان ءابىش ۇلى جينالعان قاۋىمعا ىقىلاس ءسوزىن ارنادى.
– اقمولا وبلىسى – ءبىزدىڭ مەملەكەتىمىزدىڭ ءىرى اگرارلىق-ونەركاسىپتىك ايماقتارىنىڭ ءبىرى, – دەدى ەلباسى. – اۋىل ەڭبەككەرلەرىنىڭ ءونىم شىعارۋدا جەتەكشى ورىنداردان كورىنەتىن جاقسى ءداستۇرى بار. مەنىڭ ارنايى تاپسىرمام بويىنشا بۇل ءوڭىر ەلىمىزدىڭ ازىق-ت ۇلىك قاۋىپسىزدىگىن قامتاماسىز ەتۋ مەن استانا ماڭىندا ازىق ت ۇلىك بەلدەۋىن جاساۋ باعدارلاماسىنا قاتىسىپ, ءناتيجەلى ىستەر اتقارىپ كەلەدى. ونىڭ ىشىندە ەرەكشە كوزگە تۇسەرى – مال تۇقىمىن اسىلداندىرۋ قادامدارىن, بورداقىلاۋ الاڭدارىن, ءىرى تاۋارلى-ءسۇت فەرمالارىن ىسكە قوسۋ جۇمىستارىن اتاۋعا ءتيىسپىز. ءوزگەلەر ۇلگى الارلىق ىستەر, ءبۇگىنگى باسقوسۋىمىز ءوتىپ وتىرعان «يجەۆسكي» وندىرىستىك كووپەراتيۆىندە جاقسى جولعا قويىلعان.
ءبىز بيىلدان باستاپ اگرارلىق سەكتوردا ەتتى مال شارۋاشىلىعىن دامىتۋ جونىندە بۇرىن-سوڭدى بولىپ كورمەگەن جوبانى ءجۇزەگە اسىرماقپىز. بۇل ماقساتقا جەتۋ ءۇشىن جەمشوپ, ونىڭ ىشىندە سۇرلەم مەن پىشەندەمە وندىرەتىن سالاعا زور ماڭىز بەرىپ وتىرمىز. سوڭعى ءۇش جىلدىڭ وزىندە وبلىستا جاڭا ءوندىرىس قالىپتاستىرۋ, قايتا وڭدەۋ سالاسىن دامىتۋ باعىتىندا 40-تان استام بيزنەس-جوبا ىسكە اسىرىلدى. اۋىل شارۋاشىلىعى كاسىپورىندارىنىڭ كوپتەگەن باسشىلارى ۋاقىت تالابىنا سايكەس جاڭاشا ويلاپ, سەرپىندى قيمىلداي باستادى. ونى «يجەۆسكي» وندىرىستىك كووپەراتيۆىنىڭ تاجىريبەسىنەن دە ايقىن كورۋگە بولادى.
ەلباسى ريزا سەزىمىن بىلدىرگەنىندەي, وتكەن جىلى كوپسالالى كووپەراتيۆ 1,8 ميلليارد تەڭگەنىڭ ءونىمىن ءوندىرىپ, ەل داستارقانىن بايىتتى. جىلدىق ءوسىمنىڭ 118 پايىزدى قۇراۋى مۇنداعى قايتا وڭدەۋ قۋاتتارىنىڭ مىقتىلىعىن بايقاتادى. كاسىپورىن ساعاتىنا 3000 باس قۇس ەتىن وڭدەي الادى. جەلتوقسان ايىندا قاتارعا قوسىلعان قۇراماجەم زاۋىتى ءتاۋلىگىنە 480 توننا ءونىم دايىنداۋ ارقىلى ۇجىمدى ۇتىمدى ۇمتىلىستارعا باستاۋدا. شارۋاشىلىق ماكارون تسەحىنىڭ, ماي زاۋىتىنىڭ, شۇجىق تسەحىنىڭ, ناۋبايحانانىڭ, استىق قابىلداۋ پۋنكتىنىڭ, ديىرمەننىڭ, جۇمىرتقا ۇنتاعىن شىعاراتىن تسەحتىڭ قۋاتىن ءتيىمدى پايدالانىپ وتىر. كاسىپورىن باسشىسى سوتسياليستىك ەڭبەك ەرى, اقمولا وبلىسىنىڭ قۇرمەتتى ازاماتى يبراگيم جانعورازوۆتىڭ ىسكەرلىك قابىلەتى وزگە دە سالالارداعى ۇدەمەلى ۇردىستەردىڭ قايتارىمىنان ايقىن بايقالادى.
ەلباسى, تۇتاستاي العاندا, بۇل بارلىق تاۋار وندىرۋشىلەردىڭ ورتاق مىندەتى ەكەندىگىنە ەكپىن ءتۇسىردى. اۋىل شارۋاشىلىعى ءوندىرىسىن دامىتۋدا ەكسپورتقا باعدارلانعان ەتتىك مال شارۋاشىلىعىن دامىتۋدىڭ وزىق جوبالارىن ءجۇزەگە اسىرۋ جوسپارلانۋدا. مەملەكەت وسى ماقساتقا 130 ميلليارد تەڭگەلىك نەسيە رەسۋرستارىن جۇمىلدىرادى. وبلىستىڭ شارۋاشىلىق نىساندارى اتالعان ءمۇمكىندىكتى ءتيىمدى پايدالانۋى ءتيىس. بۇل ءوندىرىستى دامىتۋعا, جاڭا تەحنولوگيالاردى ەنگىزۋگە, باسەكەگە قابىلەتتى ءونىم شىعارۋ ارقىلى كىرىس كوزىن تولىقتىرۋعا, جۇمىس ورىندارىن كوپتەپ اشۋ ارقىلى تۇرمىس دەڭگەيىن كوتەرۋگە سەنىمدى جول سالادى. ءبىزدىڭ وسى باعىتتاعى ۇمتىلىستارىمىز الداعى ون جىلعا ەسەپتەلگەن كەڭ اۋقىمدى ءىسىمىزدىڭ نەگىزگى ءمان-ماعىناسى سانالادى.
كووپەراتيۆتىڭ باسقارما ءتوراعاسى ي.جانعورازوۆ مەملەكەت باسشىسىنا كاسىپورىننىڭ نەگىزگى سالاسى – قۇس فابريكاسىنىڭ جۇمىسى تۋرالى جان-جاقتى بايانداپ بەردى. «يجەۆسكيدىڭ» 60 ءتۇرلى ازىق-ت ۇلىك ونىمدەرىن (ۇن, ماكارون ونىمدەرى, سارى ماي, ىرىمشىك, قايماق, جۇمىرتقا, قۇس ەتى, ت.ب.) استانا قالاسىنىڭ, اقمولا جانە قاراعاندى وبلىستارىنىڭ تۇتىنۋشىلارى زور سۇرانىسپەن پايدالانادى. كەدەن وداعىنىڭ جۇمىس ىستەي باستاۋى جاڭا ەكسپورتتىق مۇمكىندىكتەرگە جول اشاتىنى ايتىلدى.
جىل ساناپ قۋاتتانىپ كەلە جاتقان كووپەراتيۆ ءوندىرىستى جاڭعىرتۋعا 1,6 ميلليارد تەڭگە ينۆەستيتسيا جۇمىلدىرىپ وتىر. قازىر مۇندا 280 اۋىل شارۋاشىلىعى تەحنيكاسى, 83 اۆتوموبيل جۇمىسقا قوسىلعان. تەحنولوگيالىق ۇدەرىستەردى جەتىلدىرۋ ءناتيجەسىندە ەڭبەك ونىمدىلىگى ارتىپ, بۇرىنعى 1,5-1,6 مىڭ ادامنىڭ ءىسىن 700 بىلىكتى جۇمىسشى اتقارادى ەكەن. ساپا كورسەتكىشتەرىنە دە ءمىن تاعۋ قيىن. كاسىپورىن «قازاقستاندىق ساپا ورتالىعىنىڭ» ست رك يسو 9001:2001 سەرتيفيكاتىمەن جۇمىس ىستەيدى. ۇجىم مۇشەلەرىنىڭ ورتاشا ايلىق ەڭبەكاقىسى 33 مىڭ تەڭگەدەن اساتىن وندىرىستىك كووپەراتيۆ الەۋمەتتىك سالانى وركەندەتۋگە جىل سايىن 3-4 ميلليون تەڭگە قارجى بولەدى. بىلتىر كاسىپورىننىڭ ءوز كۇشىمەن مادەنيەت ءۇيى قايتا جابدىقتالىپ, مەكتەپ پەن دارىگەرلىك امبۋلاتوريا جاڭا قازاندىققا يە بولدى.
نۇرسۇلتان ءابىش ۇلى جۇمىرتقا سۇرىپتاۋ تسەحىنداعى زامانالىق تەحنولوگياعا دەن قويدى. تسەح باستىعى يرينا يارۋللينا اۆتوماتتاندىرىلعان شاعىن عانا ەكى ماشينەمەن كۇن سايىن 380-400 مىڭ دانا جۇمىرتقانى سۇرىپتاپ, كەز كەلگەن ساتتە جونەلتۋگە دايىن ۇستايدى ەكەن. سالماعىنا قاراي جۇمىرتقا 5 كاتەگورياعا بولىنەدى. ەڭ جاقسىسى 78 گرامدىق, ودان كەيىن ءبىرىنشى, ەكىنشى سورتتار بولىپ كەتە بەرەدى. ءبىر جۇمىرتقانىڭ ءوزىندىك قۇنى – 6 تەڭگە. وسى جەردە اڭگىمەگە ارالاسقان يبراگيم جانعورازوۆ كووپەراتيۆتىڭ سونى ىزدەنىستەرى قازاقستاندا جاڭا كاسىپورىنداردىڭ اشىلۋىنا قوزعاۋ سالعانىن ايتتى. ءماسەلەن, پاۆلودارداعى كارتون-رۋبەرويد زاۋىتىندا جۇمىرتقانى جايلاستىراتىن گوفروىدىس دايىندايتىن جەلى ىسكە قوسىلعان.
پرەزيدەنت قوسىمشا قۇرىلىس جۇرگىزىلىپ, زامانالىق جاڭا جابدىقتار ورناتىلعان جۇمىسشى اسحاناسىن ارالاپ كوردى. قۇس ءوسىرۋشىلەردىڭ قۇرمەت كورسەتە شاقىرۋىمەن داستارقان جايىلىپ, اشىق-جارقىن اڭگىمە ورىستەدى. ءدوڭگەلەك ۇستەل باسىندا ۇجىم ءمۇشەلەرىمەن قاتار, اۋىل تۇرعىندارى, اۋداننىڭ بەلگىلى ازاماتتارى ءار جىلعى جولداۋدىڭ يگىلىگىن, ەرتەڭگى كۇنگى جارقىن جوسپارلاردىڭ شاراپاتىن ايتقان تىلەك ءبىلدىردى.
ەلەنا باتىەۆا, زووتەحنيكالىق زەرتحانانىڭ مەڭگەرۋشىسى: «ءبىزدىڭ قۇراماجەم زاۋىتى قازاقستان, بەلگيا, گەرمانيا جانە رەسەي ونەرتاپقىشتارىنىڭ بىرلەسكەن تۋىندىسى دەپ ايتۋعا بولادى. ول بىلتىرعى جىلى عانا ىسكە قوسىلدى. مۇنداي زاۋىت قازاقستاننىڭ وزگە وڭىرلەرىندە ءالى جوق. ءبىزدىڭ كەشەن تاۋلىگىنە 480 توننا قۇراماجەم وندىرە الادى. بۇل ءاربىر ساعاتتا 20 توننا ءونىم شىعارىلادى دەگەن ءسوز. ال بىزگە كۇنىنە 150 توننا دا جەتەدى, قالعانىن سىرتقا شىعارامىز. بىراق زاۋىتىمىز ءالى تولىق كۇشىندە جۇمىسقا كىرىسكەن جوق. وسى ونەركاسىپ كەشەنىندە بار بولعانى جەتى-اق ادام جۇمىس ىستەيدى. قولداناتىن شيكىزاتىمىز تەحنيكالىق زەرتحاناداعى تەكسەرىستەن وتەدى. قۇراماجەمنىڭ ەڭ نەگىزگى شيكىزاتى ارپا بولىپ تابىلادى, ول ءوزىمىزدىڭ جەرىمىزدە وسىرىلەدى. قۇراجەم ءارتۇرلى جاستارداعى شوجەلەرگە ارنالعان. ارقايسىنا قاجەتتى ۆيتاميندەر كومپونەنت رەتىندە قۇراماجەمگە قوسىلىپ وتىرادى», – دەدى. ءوزىمىز زاۋىتتا بولعانىمىزدا, قۇراماجەمگە قوسىلاتىن كومپونەنتتەردىڭ اراسىندا ۇلۋ قابىرشىعى, كۇنباعىس مايى, بالىق ۇنى, اسكوربين قىشقىلى جانە ت.ب. بارىن بايقادىق.
گۇلميرا جۇماباەۆا, باس زووتەحنيك: «مەن قىرعىزستاننان كوشىپ كەلىپ ەدىم. جاعدايىمىز جاقسى, بالالارىم وقىپ جاتىر. ۇلكەن ۇلىم قۇس فابريكاسىندا جۇمىس ىستەيدى. ءبىز تاۋلىگىنە 400 مىڭنان استام جۇمىرتقا الامىز. بارىمىزگە, اسىرەسە, شەتەلدەن ەلى-جۇرتىم دەپ كەلگەن اعايىندارعا باۋىرمالدىق تانىتىپ, جاعداي جاساپ جاتقان ەلباسىنا ۇلكەن راحمەتىمىزدى ايتامىز. ەلىمىزدى ءاردايىم بيىكتەرگە باستاي بەرىڭىز», – دەدى.
ۇلتى كۇرد بولعانىمەن, قازاق تىلىندە ەركىن سويلەيتىن مال دارىگەرى يبو كاسىموۆ: «اۋىلدا 27 ۇلتتىڭ وكىلى تاتۋ-ءتاتتى تۇرادى. مەن قازاقستاندا تۋىپ, قازاقستاندا ءوستىم. ادامعا قاجەتتى جاعدايلاردىڭ ءبارىن پايدالانۋدامىز. تسەلينوگراد اۋىل شارۋاشىلىعى ينستيتۋتىن ءبىتىرىپ, 23 جىلدان بەرى وسىندا جۇمىس ىستەپ كەلەمىن. ءسىزدى وسىندا قارسى العانىمىزعا قۋانىشتىمىز. ءبىز شوجەلەردى گوللانديا مەن رەسەيدەن الامىز, ول جاق ءبىرىنشى ۆاكتسينانى جاسايدى, قالعاندارىن, جۇمىرتقا تۋعا دەيىنگىلەرىن, ءوزىمىز جاسايمىز. العاشقىسى التى كۇندە, ودان كەيىن 18, 45, 56 كۇندە سولاي-سولاي كەتە بەرەدى. ەڭ سوڭعى ۆاكتسينا 95 كۇندە جاسالادى. وسىدان كەيىن جۇمىرتقالاي باستايدى. اراسىندا ءوزىمىزدىڭ زەرتحانادا 10 كۇن سايىن ارالارىنان تاڭداپ الىپ, تەكسەرىپ, قاداعالاپ وتىرامىز», – دەدى. ءسوزىنىڭ سوڭىندا ول: «قادىرلى ەلباسى, ءبىزدىڭ حالقىمىزدى 20 جىلدا ۇلكەن دارەجەگە كوتەردىڭىز. قازاقستاننىڭ جەتىستىكتەرىن سىزبەن بايلانىستىرىپ, قاتار ءجۇرىپ يگىلىك ءوندىرىپ جاتقانىمىزعا قۋانامىز», – دەدى.
وندىرىستىك كووپەراتيۆتىڭ تراكتور-ەگىس بريگاداسىن ۆيتالي يۆانوۆ باسقارادى ەكەن. ءسىزدىڭ اگروونەركاسىپ كەشەنىن قولداۋ ساياساتىڭىزدىڭ ارقاسىندا ءبىز سوڭعى بەس جىلدا ماشينە-تراكتور پاركىن تولىق جاڭالادىق, دەدى ول. ماسەلەن, كەشەندى ءبىر تراكتور 5 ك-700-ءدى اۋىستىرا الادى. 15 مىڭ گەكتار جەرىمىزدى ءوزىمىز وڭدەيمىز. سونىڭ 25 پايىزىن جىلدا پارعا تاستايمىز. ۇجىمىمىز نەگىزىنەن قۇراماجەم جانە تۇقىمنىڭ ەليتالى سورتتارىن شىعارادى. ءسىزدىڭ «اۋىلدىڭ وركەندەۋى – قازاقستاننىڭ وركەندەۋى» دەگەن ۇرانىڭىز بارشامىزدى ىرگەلى ىستەرگە قاناتتاندىرادى. دەنساۋلىعىڭىز مىقتى بولىپ, ەلىمىزدى العا باستاي بەرىڭىز.
كۇلزيا توكەنوۆا, قۇس ءوسىرۋشى وپەراتور: ءبىز 43 مىڭ باس قۇسقا كۇتىم جاسايمىز. ءسىزدىڭ كەلگەنىڭىز ۇلكەن قۋانىش. مەن وسى اۋىلعا 1999 جىلى كوشىپ كەلدىم. تسەحىمىز تولىعىمەن اۆتوماتتاندىرىلعان, سونىڭ ارقاسىندا ءبىزدىڭ جۇمىسىمىز جەڭىلدەپ, ساپاسى دا ارتتى. 18 جاسار ۇلىم دا وسىندا ىستەيدى, ەكىنشى ۇلىم وقۋ بىتىرگەن سوڭ وسىندا كەلەدى. بۇل ءسىزدىڭ «ديپلوممەن – اۋىلعا» باستاماڭىزدىڭ تەرەڭ مازمۇنىن بىلدىرەدى. كوڭىلىمىز جاقسى, اۋىلىمىز وركەندەپ كەلە جاتىر. سىزگە جاقسىلىقتار تىلەيمىن», – دەدى.
وسى جەردە ەلباسى باستامانىڭ باياندىلىعىن اتاپ كورسەتتى. قازىردىڭ وزىندە 13 مىڭنان استام جاس مامان اۋىلداردا جەمىستى جۇمىس ىستەپ جاتىر. مەنىڭ تاپسىرمام بويىنشا ولاردىڭ بارلىعىنا ءتيىستى جاعداي جاسالۋدا. قوزعالىس ءداستۇرلى جالعاسىن تابادى. جاڭا اڭگىمەگە ارالاسقان جاس جىگىت تە «يجەۆسكيدىڭ» قامقورلىعىن كورىپ وتىر ەكەن. استانا اگروتەحنيكالىق ۋنيۆەرسيتەتىن ءبىتىرگەن مال دارىگەرىنە ءۇي بەرىلىپ, قارجىلاي كومەك كورسەتىلگەنى قولداۋعا تۇرارلىق, دەدى ن.نازارباەۆ.
مەكتەپتە 20 جىل ديرەكتور بولىپ ىستەگەن, قازىر ارداگەرلەر كەڭەسىنىڭ ءتورايىمى ليۋبوۆ پانكراتوۆا اۋىلداعى 240 زەينەتكەردىڭ مەملەكەت قامقورلىعىنا ريزا كوڭىلىن جەتكىزدى. ءبارىمىز دە ءسىزدىڭ قولداۋىڭىزدى سەزىنۋدەمىز. قاڭتار ايىنان باستاپ, ارقايسىمىزدىڭ زەينەتاقىمىز 10 مىڭ تەڭگەگە ءوستى. سىزگە كوپ راحمەت. مەن ءوزىم رەسەيدە تۋعانمىن, ءبىراق 43 جىل وسىندا تۇرامىن. قازاقستاندى ۇلكەن وتانىم دەپ سانايمىن. ەلىن ەڭسەلەندىرگەن ەلباسىن ءبىز دە قولدايمىز. سىزگە ۇزاق عۇمىر, قاجىرلى ىستەر تىلەيمىن. بارشامىزدى جارقىن بولاشاققا باستاي بەرىڭىز! دەگەن تولعانىسىن ءبىلدىردى ول.
ۆلاديمير بيدجيەۆ, اۋداندىق اۋرۋحانانىڭ باس دارىگەرى: «مەنىڭ باس دارىگەر بولىپ ىستەگەنىمە 29 جىلعا تاياپ قالدى. بۇل سالانىڭ بارلىق وزگەرىستەرى مەنىڭ كوز الدىمدا ءوتىپ جاتىر. سوڭعى 10 جىلدىقتى ەرەكشە ايتقىم كەلەدى. جاقسى وزگەرىستەر بولدى. اۋدانعا سوڭعى 5 جىلدا 200 ملن. تەڭگەنىڭ مەديتسينا قۇرال-جابدىقتارى كەلدى. ولاردى اۋدان كولەمىندەگى مەديتسينا مەكەمەلەرىنە تاراتىپ بەردىك. اۋدانىمىزدا 28 اۋىل بار, سونىڭ 10 اۋىلىندا سانيتارلىق اۆتوكولىك بار. كەڭەس وكىمەتىندە دە ونداي مۇمكىنشىلىك بولعان جوق ەدى. قازىر, مىنە, سوعان قول جەتكىزدىك. سونىڭ ارقاسىندا بولار, كوكىرەك اۋرۋى مىڭ ادامعا شاققاندا 160-تان 90-عا ءتۇستى, بالالار ءولىمى مىڭ ادامعا شاققاندا 21,7 ەدى, قازىر 5,4 ادامعا كەمىدى. 2007 جىلدان باستاپ بالا تۋى ارتىپ, ءولىم ازايدى. وسى اۋىلدا 140 ورىندىق اۋرۋحانا جانە ەمحانا بار. قازىر دارىگەردى تاڭداۋعا مۇمكىندىك بولسا دا سىرقات ادامدار وزىمىزدە ەمدەلىپ جاتىر», – دەدى.
كەزدەسۋ سوڭىندا ەلباسى ن.نازارباەۆ: «سىزدەر ارقىلى بارلىق اۋىل تۇرعىندارىمەن كەزدەسىپ وتىرمىن دەپ ەسەپتەيمىن. ءبىزدىڭ حالقىمىزدىڭ 40 پايىزى اۋىلداردا تۇرادى. ءبىزدىڭ جاڭا باعدارلامالارىمىز الەۋمەتتىك الەۋەتتى ارتتىرۋعا باعدارلانعان. ادامعا جاقسىلىقتار جاساۋعا ۇمتىلۋ قاجەت. تاۋەلسىزدىك جىلدارى 560 جاڭا مەكتەپ سالىندى. زامانالىق ەمحانالار مەن اۋرۋحانالار سالۋ جالعاساتىن بولادى. دارىگەرلەردى وزىمىزدە عانا ەمەس, شەتەلدەردە دە وقىتىپ جاتىرمىز. مەديتسينالىق ورتالىقتار اشتىق. ولار الەمدەگى ەڭ جەتىلدىرىلگەن ادىستەرمەن جۇمىس ىستەيدى. سونداي-اق, وقىتۋ ساپاسىن ارتتىرۋ باعىتىندا دا كوپتەگەن جۇمىستار ىستەلدى.
مەملەكەت باسشىسى نۇرسۇلتان نازارباەۆتىڭ ساپارى بارىسىندا ونىڭ جانىندا پرەزيدەنت اكىمشىلىگىنىڭ باسشىسى اسلان مۋسين, اۋىل شارۋاشىلىعى ءمينيسترى اقىلبەك كۇرىشباەۆ, اقمولا وبلىسىنىڭ اكىمى سەرگەي دياچەنكو بىرگە بولدى.
جاقسىباي سامرات,
باقبەرگەن امالبەك.
اقمولا وبلىسى.
-----------------------------------------
سۋرەتتەردى تۇسىرگەندەر س.بوندارەنكو, ب.وتارباەۆ.
