1992
* 22 مامىردا قازاقستان رەسپۋبليكاسى يۋنەسكو-عا مۇشە بولىپ قابىلداندى;
* 25 مامىردا ماسكەۋدە قازاقستان رەسپۋبليكاسىنىڭ پرەزيدەنتى ن.ءا.نازارباەۆ پەن رەسەي فەدەراتسياسىنىڭ پرەزيدەنتى ب.ن.ەلتسين ەكى ەل اراسىنداعى دوستىق, ىنتىماقتاستىق جانە ءوزارا كومەك تۋرالى شارتقا قول قويدى;
* 1 ماۋسىمدا جوعارعى كەڭەستىڭ سەگىزىنشى سەسسياسىندا پرەزيدەنت, كونستيتۋتسيالىق كوميسسيانىڭ توراعاسى ن.ءا.نازارباەۆ «قازاقستان رەسپۋبليكاسى كونستيتۋتسياسىنىڭ جوباسى تۋرالى» بايانداما جاسادى. ءوز بايانداماسىنىڭ سوڭىندا ەلباسى بولاشاق كونستيتۋتسيا «قوعام ومىرىنە ايقىندىق ەنگىزىپ, ازاماتتاردىڭ قۇقىقتارى مەن مىندەتتەرىن ءجىتى بەلگىلەيدى, وكىمەت ينستيتۋتتارىنا, اكىمشىلىك جانە سوت ورگاندارىنا سەنىمدى ارەكەت ەتۋگە مۇمكىندىك بەرەدى. قىسقاسى, قوعام مەن مەملەكەت ومىرىندە ءبىزدىڭ ارقايسىمىزدىڭ قۇقىعىمىز بەن بوستاندىعىمىزدى قورعاۋ ءۇشىن, قازاقستاندىقتاردىڭ جاقسى ءومىرى جولىندا رەسپۋبليكادا جۇرگىزىلىپ وتىرعان تۇبەگەيلى رەفورمالاردىڭ تابىستى بولۋى ءۇشىن قاجەتتى ءتارتىپ ورناتۋعا مۇمكىندىك بەرەدى», دەپ اتاپ ءوتتى;
* 4 ماۋسىمدا قازاقستان ءوزىنىڭ مەملەكەتتىك رامىزدەرىن انىقتادى. دالىرەگى, پرەزيدەنت «قازاقستان رەسپۋبليكاسىنىڭ مەملەكەتتىك جالاۋى تۋرالى», «قازاقستان رەسپۋبليكاسىنىڭ مەملەكەتتىك ەلتاڭباسى تۋرالى», «قازاقستان رەسپۋبليكاسى مەملەكەتتىك ءانۇرانىنىڭ مۋزىكالىق رەداكتسياسى تۋرالى» زاڭدارعا قول قويدى. گيمننىڭ سوزىنە جاريالانعان كونكۋرستى ودان ءارى جالعاستىرا تۇسۋگە شەشىم قابىلداندى;
* 6 ماۋسىمدا جوعارعى كەڭەس سەسسياسىندا ەلىمىزدىڭ جاڭا مەملەكەتتىك رامىزدەرىن رەسمي تۇردە تانىستىرۋ شاراسى ۇيىمداستىرىلدى. ءراسىم ساتىندە ەلباسى ن.ءا.نازارباەۆ: «ءبىز تاۋەلسىزدىككە اڭساپ, زارىعىپ جەتتىك. ەندى سول تاۋەلسىزدىكتىڭ قاسيەتتى بەلگىلەرىن دە ەرەكشە قادىرلەۋىمىز, قاستەرلەۋىمىز كەرەك. ءاربىر ازامات قازاقستاننىڭ جالاۋىن, ەلتاڭباسىن, ءانۇرانىن تۇمارداي قاسيەت تۇتۋى قاجەت. ەلدىگىمىزدىڭ سىنالاتىن ءبىر تۇسى وسى», – دەدى. وسىلايشا, پرەزيدەنت رەزيدەنتسياسى مەن پارلامەنت ءۇيىنىڭ توبەسىندە كوك تۋىمىز العاش رەت جەلبىرەدى;
* 16 ماۋسىمدا الماتىدا ەلباسى بۇۇ دەلەگاتسياسىن قابىلداۋى ساتىندە اتالعان حالىقارالىق ۇيىمنىڭ قازاقستانداعى وكىلدىگىن اشۋ جونىندە كەلىسىم جاسالدى;
* 22 ماۋسىمدا مەملەكەت باسشىسىنىڭ جارلىعىمەن قازاقستان رەسپۋبليكاسىنىڭ مينيسترلەر كابينەتى جانىنداعى ۇلتتىق پاتەنت ۆەدومستۆوسى قۇرىلدى. قۇرىلىمنىڭ نەگىزگى ماقساتى – ونەركاسىپتىك مەنشىك وبەكتىلەرىن قورعاۋ سالاسىندا مەملەكەتتىك ساياسات جۇرگىزۋ, ءبىرتۇتاس پاتەنت جۇيەسىن قۇرۋ, ونەرتابىستارعا, ونەركاسىپتىك ۇلگىلەرگە, تاۋار بەلگىلەرىنە جانە ونەركاسىپتىك مەنشىكتىڭ باسقا دا وبەكتىلەرىنە قورعاۋ قۇجاتتارىن بەرۋ, كاسىپكەرلىكتى دامىتۋدا وزىق تەحنولوگيانى, تاۋارلار مەن كورسەتىلەتىن قىزمەتتى تاراتۋدا كەدەرگىلەردى جويۋ. سونداي-اق, وسى كۇنى قازاقستاننىڭ بۇۇ جانىنداعى تۇراقتى وكىلى اقمارال ارىستانبەكوۆا بۇۇ باس حاتشىسى بۋتروس عاليگە قىزمەتكە كىرىسۋ وكىلەتتىگىن تاپسىردى;
* 23 ماۋسىمدا مينيسترلەر كابينەتى مەملەكەت باسشىسىنىڭ «سەمەي يادرولىق سىناق پوليگونىن جابۋ تۋرالى» جارلىعىن جۇزەگە اسىرۋ بويىنشا قوسىمشا شارالار جونىندە قاۋلى قابىلدادى. سونىڭ ناتيجەسىندە سەمەي وبلىسىنىڭ بارلىق اۋداندارى, سەمەي جانە كۋرچاتوۆ قالالارى, شىعىس قازاقستان وبلىسىنىڭ گلۋبوكوە, زايسان, تاۆريا, تارباعاتاي, ۇلان, شەمونايحا اۋداندارى جانە وسكەمەن قالاسى, قاراعاندى وبلىسىنىڭ ەگىندىبۇلاق جانە قارقارالى اۋداندارى, پاۆلودار وبلىسىنىڭ باياناۋىل, لەبياجى جانە ماي اۋداندارى ەكولوگيالىق اپات ايماعى دەپ جاريالاندى. بۇل ماسەلەدە رادياتسيالىق جاعداي, سىرتقى ساۋلەنىڭ وتۋىنەن تۇسەتىن اۋىرتپالىق شاماسى تۋرالى دەرەكتەر, حالىقتىڭ سىرقاتتانۋى مەن قازاعا ۇشىراۋىنىڭ دەموگرافيالىق كورسەتكىشتەرى نەگىزگە الىندى;
* 24 ماۋسىمدا تۇركىستان قالاسىندا قازاقستان رەسپۋبليكاسى مەن وزبەكستان رەسپۋبليكاسىنىڭ اراسىنداعى دوستىق, ىنتىماقتاستىق جانە ءوزارا كومەك تۋرالى شارتقا قول قويىلدى. وسى ايتۋلى شارادا ەلباسى بۇل تاريحي وقيعانىڭ كيەلى تۇركىستاندا, ەكى حالىققا دا قاستەرلى قوجا احمەت ياساۋي كەسەنەسىنىڭ ىرگەسىندە ۇيىمداستىرىلۋىندا ۇلكەن ماعىنا بار ەكەنىن اتاپ ءوتتى;
*29 ماۋسىمدا الماتىدا پاتشالىق رەسەيدىڭ وتارشىلدىعىنا قارسى كۇرەسكەن حالىق باتىرى سىرىم دات ۇلىنىڭ تۋعانىنا 250 جىل تولۋىنا ارنالعان عىلىمي كونفەرەنتسيا ۇيىمداستىرىلدى. جيىن بارىسىندا سىرىم دات ۇلىنىڭ ەسىمىن جىمپيتى اۋدانىنا بەرۋ تۋرالى ماسەلە كوتەرىلدى. كەيىن جۇرتشىلىق تىلەگى قابىل بولىپ, جىمپيتى اۋدانىنا سىرىم باتىردىڭ ەسىمى بەرىلدى;
* 30 ماۋسىمدا ەلباسى ن.ءا.نازارباەۆتىڭ «1992 جىلى ەگىن وراعىن, اۋىلشارۋاشىلىق داقىلدارى ءونىمىن ساقتاۋ مەن ۇتىمدى پايدالانۋدى جانە جەمشوپ دايىنداۋدى قامتاماسىز ەتۋ جونىندەگى شارالار تۋرالى» جارلىعى شىقتى. بۇل ەلىمىزدىڭ ءوز استىعىن العاش رەت باسقالاردىڭ قاتىسۋىنسىز ءوز كۇشىمەن جيناپ الۋعا بەت بۇرعانىن بىلدىرەدى. بۇعان دەيىن ەل استىعى كەڭەس وداعىنىڭ تۇكپىر-تۇكپىرىنەن كەلەتىن ازاماتتاردىڭ كومەگىمەن جينالىپ, ناتيجەسىندە الىنعان ءونىمنىڭ وزىندىك قۇنى ءوسىپ كەتەتىن;
*1 شىلدەدە الماتىداعى دوستىق ۇيىندە قاراشىعاناق كەن ورنىن وندىرىستىك پايدالانۋعا نيەت حاتتاماسىنا قول قويىلدى. ايتا كەتەيىك, وسىدان ءتورت اي بۇرىن ۇكىمەت باتىس قازاقستانداعى بىرەگەي مۇناي-گاز كوندەنساتى كەن ورنىن يگەرۋگە حالىقارالىق كونكۋرس جاريالاعان بولاتىن. كونكۋرستىڭ قورىتىندىسى بويىنشا «بريتيش گاز» بەن «ادجيپ» جەڭىسكە جەتكەن-ءدى. وسى وقيعانىڭ ماڭىزدىلىعى ەسكەرىلە وتىرىپ, بۇل راسىمگە ەلباسىنىڭ ءوزى قاتىستى;
* 2 شىلدەدە جوعارعى كەڭەستىڭ «قازاقستان رەسپۋبليكاسىنىڭ كونستيتۋتسيالىق سوتىن سايلاۋ تۋرالى» قاۋلىسى قابىلداندى. اكادەميك مۇرات بايماحانوۆ قازاقستان رەسپۋبليكاسى كونستيتۋتسيالىق سوتىنىڭ توراعاسى بولىپ سايلاندى;
* 6 شىلدەدە جوعارعى كەڭەستىڭ قاۋلىسىنا سايكەس ورال وبلىسى – باتىس قازاقستان وبلىسى, تسەلينوگراد وبلىسى – اقمولا وبلىسى, شىمكەنت وبلىسى – وڭتۇستىك قازاقستان وبلىسى, تسەلينوگراد قالاسى – اقمولا قالاسى بولىپ وزگەرتىلدى;
* 7 شىلدەدە «قازاقستان رەسپۋبليكاسىنىڭ ۇلتتىق قاۋىپسىزدىك ورگاندارى تۋرالى» زاڭ باسپاسوزدە جاريالاندى;
* 13 شىلدەدە پرەزيدەنت جارلىعىمەن مەملەكەتتىك قاۋىپسىزدىك كوميتەتى ۇلتتىق قاۋىپسىزدىك كوميتەتى بولىپ قايتا قۇرىلدى. كوميتەت توراعاسى مينيسترلەر كابينەتىنىڭ قۇرامىنان شىعارىلدى, ءسويتىپ ول تىكەلەي ەلباسىنا باعىنىستى بولىپ بەلگىلەندى;
*15 شىلدەدە اقمولا قالاسىندا ۇمىت قالىپ بارا جاتقان ۇلتتىق مەيرامداردىڭ ءبىرى – «قىمىزمۇرىندىق» ۇيىمداستىرىلدى. قالانىڭ تاريحي اتاۋىنىڭ قايتارىلۋىنا وراي وتكىزىلگەن مەرەكە جايىندا «ەگەمەندى قازاقستان» گازەتىندە «قازاقتىڭ قىمىزمۇرىندىق مەيرامى» تاقىرىبىمەن ماقالا شىقتى;
*16 شىلدەدە رەسەي پارلامەنتى رەسەي فەدەراتسياسى مەن قازاقستان رەسپۋبليكاسىنىڭ اراسىنداعى دوستىق, ىنتىماقتاستىق جانە ءوزارا كومەك تۋرالى شارتتى بەكىتتى;
* 31 شىلدەدە بەلگىلى بالۋان داۋلەت تۇرلىحانوۆ بارسەلونادا وتكەن ححV جازعى وليمپيادادا قولا مەدال يەلەندى. ول 1988 جىلعى سەۋل وليمپياداسىندا كۇمىس مەدال جەڭىپ العان بولاتىن. بۇعان دەيىن ەكى بىردەي وليمپيادادا قاتارىنان جۇلدەگەر اتانعان قازاق سپورتشىسى بولعان ەمەس.
