قوستانايدا جاس بوكسشىلاردىڭ جازعى جيىنى ءوتتى. وعان ەلىمىزدىڭ بارلىق وبلىستارىنان 40-تان استام سپورتشىلار مەن جاتتىقتىرۋشىلار قاتىستى. ولارعا اقش-تىڭ مۇحاممەد ءالي ورتالىعىنىڭ ماماندارى ءدارىس وقىپ, بىرنەشە كۇن بويى جاتتىقتىردى.
بۇل جيىن قازاقستان جانە اقش بوكس فەدەراتسيالارىنىڭ اراسىنداعى ىنتىماقتاستىق تۋرالى مەموراندۋمنىڭ اياسىندا وتكىزىلدى. مۇنداي باسقوسۋ بيىل ەكىنشى رەت ءوتىپ جاتىر. العاشقىسى ناۋرىز ايىندا اقش-تىڭ لۋيسۆيلل قالاسىندا وتكەن بولاتىن. سول كەزدە قۇراما شتاتتارعا ەلىمىزدەن 12 جاس بوكسشى بارىپ, مۇحاممەد ءالي ورتالىعىندا جاتتىقتى.
«ماعان جيىن وتە ۇنادى. ەڭ باستىسى, ول بابالاردىڭ كوڭىلىنەن شىقتى. ءبىر بايقاعانىم, بالالاردىڭ كوبىسى جيىنعا العاش رەت قاتىسقان ەكەن. ولار شەتەلدىڭ ماماندارىمەن جانە ەلىمىزدىڭ جەر-جەرىنەن كەلگەن بوكسشىلارمەن تانىسىپ قايتتى. وسىنداي جازعى لاگەرلەر كوپ بولسا دەيمىن», دەدى جيىنعا قاتىسقان ارقالىق قالاسىنىڭ جاتتىقتىرۋشىسى مارات سەيىتماعامبەتوۆ.
ال قوستاناي وبلىسىنىڭ جاسوسپىرىمدەر اراسىنداعى ەكى دۇركىن چەمپيونى دينا قۋانىشباەۆا جازعى لاگەردە امەريكالىق قوناقتارمەن, ارقالىق, اقتوبە, تاراز, قاراعاندىنىڭ جاس ورەندەرىمەن تانىسقانىن, جيىن كەزىندە كوماندالىق ترەنينگتەردىڭ ۇناعانىن ايتتى. «كوماندانىڭ باستى جەتىستىگى – ول ادامداردىڭ ءبىر-ءبىرىن سىيلاۋى, قۇرمەت كورسەتۋى, كوماندانىڭ باسقا مۇشەلەرىنىڭ پىكىرىن تىڭداۋى. ەگەر وسىنىڭ كوماندادا وسىنىڭ ءبارى بولسا جەڭىسكە قينالماي جەتۋگە بولادى», دەيدى جاس بولسا دا باس بولا بىلەتىن سپورتشى قىز.
داستان كەنجالين
