«قايتقان كارتوچكادا قايىر بار»

قازىر وزىق تەحنولوگيانىڭ دامىعان زامانى عوي. ونسىز تىرشىلىگىمىزدى ەلەستەتۋدىڭ ءوزى قيىن. بۇل تەحنولوگيالارسىز ادام بالاسى بۇرىن قالاي ءومىر ءسۇردى ەكەن؟ الدە زامانى سۇستى بولعاندا, ادامى مىقتى بولعان با؟ كەيدە ءتىپتى, وسىلاي قازىرگى يننوۆاتسيالىق تەحنولوگيالارمەن كونە زاماننان بەرى كۇن كورىپ كەلە جاتقانداي كۇي كەشەمىز. قالاي بولعاندا دا, قازىر يننوۆاتسيالىق تەحنولوگيا ارتقان سايىن ءومىر سۇرۋگە قولايلىلىق كۇشەيىپ كەلەدى. ءبىر عانا ۇيالى تەلەفوندى الىپ قاراڭىز. قانشاما پايداسى بار. كادىمگى كومەكشى قۇرال. قاراپايىم ساعات قىزمەتى, كۇنتىزبەسى دەگەندەرىن بىلاي قويعاندا, تالاي ادام ءبىر-بىرىنەن حابارسىز, اداسىپ جۇرەر مە ەدى. جارار, كەز كەلگەن جەردە سۋرەتكە ءتۇسىپ, ينتەرنەتتى اقتارماي امالداۋعا بولادى دەگەننىڭ وزىندە. بىراق, باسقانى بىلمەيمىن, ءوزىم بۇل قۇرىلعىسىز كادىمگىدەي قينالىپ قالاتىن بولىپپىن. «ايشىلىق الىس جەرلەردەن جىلدام حابار العىزعان» تەلەفون قۇرىلعىسىنىڭ «قۇدىرەتى» كۇشتى. ومىرىمىزگە ەنىپ جاتقان ءار سالاداعى يننوۆاتسيالىق تەحنولوگيالاردىڭ قىزىعىن كور­سەتۋدىڭ قۇرالى قازىر وسى تەلەفون بولىپ وتىر. بۇلاي دەۋىمە وتكەندە ءوز باسىمنان كەشكەن مىنا جاعداي تاعى دا سەبەپ بولدى. ادەتتەگىدەي اسىعىس ەدىم. ءاري­نە, «تاۋ قوپارىپ, تاس جارىپ جاتقان» ەشكىم جوق, ءجاي عانا قالانىڭ قاربالاس تىرلىگى. قارجىمنىڭ قالتاداعىسى تۇگە­سىلگەن سوڭ, كارتوچكاداعىسىن الايىن دەپ, جولاي بانكوماتقا سوقتىم. اسىعىستىقتان اقشا­نى عانا الىپ كارتوچكانى قالدى­رىپ كەتسەم كەرەك. الايدا, ءوزىم ونى بىلمەيمىن. سان شارۋا شىر­مال­عان وي باسقامەن الەك. ءسويت­كەنشە بولعان جوق, قولىم­داعى ۇيالى تەلەفونىما «شيق» ەتىپ سمس-حابارلاما ءتۇستى. مىنە, قىزىق: «كارتا ۇمىتىلدى. بان­كوماتقا كەيىن قايتىڭىز» دەيدى. بان­كوماتكا جۇگىرىپ بارسام, كار­توچكام كورىنبەيدى. «قاپ, جۇت­تى-اۋ» دەگەنىمشە بولعان جوق, بانكومات ەكرانىنداعى كو­دىڭىزدى تەرىڭىز دەگەندى كوزىم شالدى. تەرە سالىپ ەدىم, كارتوچ­كام اتىپ شىقتى. ارينە, كارتوچكا مەنى كۇتىپ سىرتتا تۇرسا بىرەۋ-مىرەۋ الىپ كەتۋى دە مۇمكىن عوي. الايدا, بانكوماتتىڭ اقىل­دىسىن-اي, قۇپيا تسيفرلاردى تەرگەن سوڭ عانا وزىمە بەردى. قۋانىپ كەتتىم. ەندى قايتەيىن, بۇرىن وسى «جۇتىپ قويۋ» دەگەننەن زارەم قالمايتىن. ارينە, ول – ۋاقىتتىڭ سورى. ونىڭ وزىندە بانكوماتتا تاس­تاپ كەتكەنىڭدى بىردەن ەسىڭە تۇسىرە قويساڭ يگى. قالتاداعى اقشانى تاۋىسقانشا ونى ىزدەمەۋىڭ دە مۇمكىن. ال ءدال كەرەك كەزىندە شارق ۇرىپ, سوڭىندا بانكوماتقا بارىپ, كەرەك بولسا, كەزەككە تۇرىپ ءوتىنىش جازىپ, الىپ كەتۋىڭە تۋرا كەلەتىن. ءارى ول بانكتەگىلەر بان­كو­ماتتاردى ارالاپ, سەنىڭ ۇمى­تىپ كەتكەن كارتوچكالارىڭدى جيناپ الىپ كەتكەن سوڭ عانا ءمۇم­كىن. ال ەندى مىنا ءادىستى ويلاپ تاپقان تەحنولوگيادان قالاي اينالماسسىڭ. يننوۆاتسيانىڭ, جاڭا تەحنولگيانىڭ ادامعا قىز­مەتى دەگەن وسى بولار. ايتەۋىر ءوزىم قازكوممەرتسبانكتىڭ بۇل جاڭالىعىنا قاتتى قۋاندىم. مۇن­داي حابارلامانى الۋ ءۇشىن تەلە­فونىڭىزدىڭ ءنومىرى كارتوچكا العان بانكتەگى مالىمەتتەرىڭىزدىڭ قاتارىندا بولۋى كەرەك ەكەن. ءسويتىپ, كارتوچكام بانكوماتتا قالماي, قالتاعا ءتۇستى. ادامنىڭ قا­تىسۋىنسىز, تەك تەحنيكانىڭ ارقاسىندا كومەك الدىم. كەرەك دەسەڭىز, جانىمدا بۇل قىزمەتى ءۇشىن العىس ايتار دا ەشكىم جوق. بىراق تەك تۇرماستىڭ ادەتىمەن الگى سمس كەلگەن نومىرگە «راحمەت» دەپ قالاي جاۋاپ جازىپ جىبەرگەنىمدى دە بايقاماي قالىپپىن. دينارا بىتىكوۆا, «ەگەمەن قازاقستان»