شارتاراپتى شايتاناربامەن شارلايدى

جۋىردا شارباقتى اۋدانى اكىمدىگىنىڭ وكىلدەرى مەن اۋىلداستارى ۆەلوسيپەدشى ءومىرجان وشانوۆتى قازاقستان-قىتاي باعىتى بويىنشا ۆەلوجورىققا شىعارىپ سالدى. ول بۇعان دەيىن جەڭىستىڭ 70 جىلدىعىنا وراي پاۆلوداردان باستالعان 3800 شاقىرىمدىق جولدى ۆەلوسيپەدپەن 22 كۇندە ءجۇرىپ وتكەن-ءدى. ماسكەۋگە جەتىپ, مەرەكەلىك شەرۋگە قاتىستى. اۋەسقوي ۆەلوشاباندوزدى كرەملدىڭ الدىندا جەرلەستەرىمىز كۇتىپ العان ەدى. ارينە, ۆەلوسيپەدپەن ۇزاق قاشىقتىققا, ماسكەۋگە قاراي جولعا شىققاندا كۇنىنە 150 شاقىرىمنان ءجۇرىپ وتىردىم. كەيىن 210 شاقىرىمعا دەيىن جەتكىزدىم. جاڭبىر جاۋدى, اۋا رايى قولايسىز بولدى. ورال تاۋى ماڭىنان وتكەندە قيىنشىلىقتار كەزدەستى. ءبارىن دە جەڭۋگە تۋرا كەلدى, – دەيدى ءومىرجان وشانوۆ. كەلەسى ءبىر رەكوردى – بىلتىر ەرتىس وزەنىنىڭ 70 شاقىرىم ارالىعىن 10 ساعات ىشىندە براسس ادىسىمەن ءجۇزىپ ءوتتى. جۇزگىشتى سوڭىنان قايىقپەن ەرىپ وتىرعان توتەنشە جاعدايلار ماماندارى, دارىگەرلەر باقىلاپ وتىردى. – براسس – قولدى, دەنەنى سىرتقا شىعارماي, سۋ ىشىندە كەۋدەمەن ۇزىننان جاتقان قالپىندا قول-اياقپەن سيممەتريالى ەسىپ ءجۇزۋدىڭ ءتۇرى. بۇعان دەيىن 25 مەترلىك باسسەيندە 4 ساعات بويى تولاسسىز جاتتىعۋدى ادەتكە اينالدىردىم. ال ماسكەۋگە جولعا شىعۋ ءۇشىن كۇن سايىن 10 شاقىرىم قاشىقتىققا جۇگىرىپ جاتتىقتىم. ءوزىمنىڭ بۇل ۆەلوجورىعىمدى سوعىستا شەيىت بولعان اتالارىما, باسقا دا مايدانگەرلەرگە ارنادىم,  – دەگەن ەدى. ءومىرجاننىڭ جاسى 54-تە. ول جاستايىنان سپورتپەن اينالىسىپتى. شارباقتى اۋىلىنداعى مەكتەپتە دەنە شىنىقتىرۋ ءپانى­نەن ساباق بەرەدى, تالاپتى بالالاردى قازاقشا كۇرەسكە باۋليدى. ەندى, مىنە, ءومىرجان تاعى دا الىس جولدا, ماقساتى – موڭعوليا, قىتاي, رەسەي ەلدەرىن ۆەلوسيپەدپەن ءجۇرىپ وتپەكشى. ازىرگە ەشقايدا تىركەلمەگەن ءومىرجاننىڭ رەكوردتارى دا كۇندەردىڭ كۇنىندە ەسەپكە الىنىپ, ەلەنەر دەپ ويلايمىز. ال ازىرگە ءسات-ساپار تىلەپ, امان-ەسەن ورالۋىن كۇتەمىز. فاريدا بىقاي, «ەگەمەن قازاقستان» پاۆلودار وبلىسى