الماتىدا 28-ءشى دۇنيەجۇزىلىك 2017 جىلعى قىسقى ۋنيۆەرسياداعا دايىندىق جونىنەن ۇيىمداستىرۋ كوميتەتىنىڭ كەزەكتى ءماجىلىسى ءوتتى.
ءماجىلىستى ۋنيۆەرسيادانى ۇيىمداستىرۋ كوميتەتىنىڭ ءتورايىمى داريعا نازارباەۆا ءجۇرگىزدى. قالا اكىمى باۋىرجان بايبەك ۋنيۆەرسياداعا دايىندىق كەستەسىنىڭ بەلگىلەنگەن مەرزىمنىڭ الدىندا كەلەتىنىن, وعان دالەل – كۇنى بۇگىنگە دەيىن قۇرىلىس نىساندارىنىڭ 90 پايىزدان استامى سالىنىپ بىتكەنىن تىلگە تيەك ەتتى.
ءوز كەزەگىندە اتقارىلىپ جاتقان شارالارعا قاتىستى ۆيتسە-پرەمەر جان-جاقتى باعا بەرە كەلىپ, ءبىرقاتار سىندار ايتتى. اڭگىمە بارىسىندا داريعا نازارباەۆا «سۇڭقار» شاڭعى كەشەنىندەگى ورالىمسىزدىقتارعا ارنايى توقتالدى. وسىعان وراي قالا اكىمى باۋىرجان بايبەك ۆيتسە-پرەمەرگە اتالعان كەشەندەگى ويىندار كەستەسى تولىق «تاباعان» تاۋ شاڭعىسى كۋرورتتى اۋماعىنا كوشىرىلگەنى تۋرالى مالىمدەدى. ويتكەنى, بيىلعى جاز ايىنداعى توقتاۋسىز جاۋعان نوسەر «سۇڭقار» سپورت كەشەنىنىڭ اۋماعىندا شىن مانىندە دە 17 جەردەن زالال كەلتىردى.
سوعان قاراماستان, الماتىداعى نەگىزگى مۇز سارايلارى مەن ايدىندارى, سپورت قالاشىقتارى بۇگىنگى تاڭدا الەمنىڭ سپورت جۇلدىزدارىن قارسى الۋعا ساقاداي ساي.
28-ءشى دۇنيەجۇزىلىك قىسقى ۋنيۆەرسيادا الماتىدا 2017 جىلدىڭ 29 قاڭتارى مەن 8 اقپانى ارالىعىندا وتەدى. الەمدىك دوداعا دۇنيە ءجۇزىنىڭ 64 ەلىنەن 2000-نان استام سپورتشى قاتىسادى. ونىڭ ءۇستىنە, بارلىعى الماتىعا سول تۇستا قازىرگى ەسەپ بويىنشا 30 مىڭنان استام شەتەلدىك قوناقتار مەن تۋريستەر كەلەدى. ولارعا 3000 ۆولونتەر قىزمەت كورسەتەدى. الەمدىك دودادا 12 سپورت تۇرىنەن بارلىعى 86 مەدال جيىنتىعى ساراپقا سالىنادى.
ۇيىمداستىرۋ كوميتەتىندە قازاق سپورتشىلارىنىڭ سپورت كيىمىنىڭ ۇلگىلەرى, ۋنيۆەرسيادا تۇمارى مەن جۇلدەگەرلەرگە بەرىلەتىن مەدال ءتۇرى كورسەتىلدى. 2017 جىلدىڭ 25 قاڭتارىندا ستارت الاتىن سپورت ويىندارىنىڭ الاۋى استانا مەن الماتى قالالارىندا, رەسپۋبليكانىڭ بارلىق 19 جوعارى وقۋ ورىندارىندا ءبىر مەزەتتە تۇتانادى. الاۋ كوتەرگەن ستۋدەنت جاستار قۇراماسىنىڭ جولى ۋنيۆەرسيادانىڭ سالتاناتتى اشىلۋ ءساتىندە تۇيىسەدى. تاعى ءبىر ەسكەرەرلىك جايت, رەجيسسەرلىك قويىلىمدى قازاقستاندىق ماماندار جاسايدى. ۇيىمداستىرۋ كوميتەتى شەتەلدىك ماماندار مەن «جۇلدىزداردى» جاپپاي شاقىرۋدان باس تارتىپ وتىر. «ماماندار دا, جۇلدىزدار دا ءوزىمىزدىڭ ەلىمىزدەن دە تابىلادى» دەگەن ۇيعارىمعا كەلگەن ۇيىمداستىرۋ كوميتەتى وسىمەن كەزەكتى ءماجىلىسىن اياقتادى.
تالعات ءسۇيىنباي,
«ەگەمەن قازاقستان»
الماتى
