دۇنيە ديدارىنداعى داريعا

قازاق قىزدارى اراسىنان وليمپيادانىڭ تۇعىرىنا كوتەرىلگەن تۇڭعىش بوكسشى اتاندى. جاعىمدى جاڭالىق جەتكەن بويدا ءبىز پەتروپاۆل سپورت سارايىندا بوكستان اعا باپكەر بولىپ ىستەيتىن العاشقى ۇستازى سابىرجان ساقتاعانوۆقا جولىقتىق. – وبلىس ورتالىعىنان شەتكە­رىلەۋ ورنالاسقان زارەچنىي شاعىن اۋدانىنداعى №13 مەكتەپتە وقي­تىن ليا شايدۋللينا دەگەن وقۋشى مەن جەتەكشىلىك ەتەتىن كيكبوكسينگ ۇيىرمەسىنە قاتىسىپ ءجۇردى. بىردە ول جانىنا ءبىر قىزدى ەرتىپ اكەلدى. «مەكتەپتە ۇل بالالارمەن ءجيى شەكىسىپ قالا بەرەدى. ونىڭ بۇل قىلىعىنان مۇعالىمدەر دە شارشادى. ءسىز مۇمكىن كيكبوكسينگتىڭ قىر-سىرىنا ۇيرەتەرسىز», دەپ قيىلا ءوتىندى. بۇل 2003 جىل بولاتىن. وبالى نە كەرەك, جارتى جىلدىڭ ىشىندە دەنە-ءبىتىمى تارالىپ, سىمداي تارتىلىپ شىعا كەلدى. كەلەسى جىلى وبلىستىق چەمپيوناتتا قارسىلاس شىداتپادى. 16 جاسىندا قازاقستان بىرىنشىلىگىنە قاتىسىپ, ەكىنشى ورىن الدى. – ال بوكسقا قاشان اۋىستى؟ – مەنىڭ ۇيىرمەمدە جاتتىعاتىن ون قىز بالا بۇل كەزدە قوماقتى تابىستارعا قول جەتكىزە باستاعان. ۇمىتپاسام, 2005 جىلى بولۋ كەرەك, بارلىق قىزدار جاتتىقتىرۋشى سەرىك بەكتۇرعانوۆتىڭ قاراماعىنا اۋىستى. بۇل بىردەن-ءبىر دۇرىس شەشىم ەدى. ويتكەنى, بۇل كەزەڭدە ەلىمىز بويىنشا قىزدار بوكسى جاندانىپ, جەكە جاتتىعۋلاردىڭ قاجەتتىگى تۋعان. دەسەك تە, داري­عانىڭ ورنى دا, جولى دا بولەك. بۇل ءۇشىن ونىڭ 64, 69, 75 كيلو سالماق دارەجەلەرى بويىنشا ەلىمىزدىڭ 7 دۇركىن چەمپيونى بولعانىن ايتساق تا جەتكىلىكتى. ازيا تورىندە 2 مارتە, ءا.مولداعۇلوۆانى, م.مامەتوۆانى, ح.دوسپانوۆانى ەسكە الۋعا, س.قوناقباەۆتىڭ جۇلدەسىنە ارنالعان حالىقارالىق تۋرنير­لەردە جاسىنداي جار­قىلدادى. ايتپاقشى, حالىقارالىق دارەجەدەگى سپورت شەبەرى, 2015 جىل­دىڭ ەڭ ۇزدىك بوكس­شىسى اتانعانىن ايتا كەتكەن ءجون. – كىل مىقتىلار جينالعان ازيا چەمپيوناتىندا وليمپيادا جولداماسىن ۇتىپ الۋ وڭاي بول­ماعان شىعار؟ – قاي بوكسشىنىڭ بولسىن كوكەيىندە ۇلكەن جەڭىسكە دەگەن ءۇمىت بولارى انىق. داريعا قىتايدىڭ ۋلانچاب قالاسىنا ءوز كۇشىنە سەنىپ باردى. باپكەرلەردىڭ تاپسىرمالارىن ويداعىداي ورىنداپ, 75 كيلو سالماق دارەجەسىندە قورجىنعا جالعىز «التىندى» سالدى. فينالدا قىتايلىق لي كيۋاندى 3:0 ەسە­بىمەن جەڭىپ, ەكىنشى رەت «سارى قۇرلىقتىڭ» چەمپيونى ءتاجىن كيدى. ءسويتىپ, وليمپيادا ليتسەنزياسىن جەڭىپ الدى. – ەندى مۇحيتتىڭ ارعى جا­عىن­دا دۇبىرلەتكەن جازعى وليم­پيا­لىق ويىندارعا توقتالساق. داريعانىڭ ونەرىنە قانداي باعا بەرەر ەدىڭىز؟ العاشقى كەزدەسۋىندە ەكى مارتە الەم چەمپيونى, كانادالىق اريان فورتينمەن جۇدىرىقتاسۋى ناعىز بابىندا ەكەنىن كورسەتتى. اسا تار­­تىستى باسەكەدە 2:1 ەسەبىمەن ۇتتى. شيرەك فينالدا ماروككولىق حاديد­جا ءمارديدى 3:0 ەسەبىمەن جەڭىپ, بارلىق راۋندتاردا مەرەيى ۇستەم بولدى. جارتىلاي فينالدا لوندون وليمپياداسىنىڭ, الەمنىڭ ەكى دۇركىن جەڭىمپازى اقش بوكسشىسى كلارەسسا شيلدسپەن قولعاپ ءتۇيىستىردى. جان الىپ, جان بەرىسكەن بۇل ويىنعا مەن جەڭىسكە پارا-پار جەڭىلىس بولدى دەگەن باعا بەرەر ەدىم. سوندىقتان دۇنيە ديدارىنا تانىلعان داريعانىڭ قازاق قىز­دارى اراسىندا تۇڭعىش رەت وليمپ شىڭىنا كوتەرىلىپ, قولا مەدال ۇتىپ الۋى ءبىزدىڭ سپورت تاريحىنداعى جارقىن بەلەس ەكەنى تالاسسىز. اڭگىمەلەسكەن ءومىر ەسقالي, «ەگەمەن قازاقستان» سولتۇستىك قازاقستان وبلىسى