اكە جولىن قۋعان قىز

سولتۇستىك قازاقستان وبلىسى, ايىرتاۋ اۋدانى, كامەن­نىي برود اۋىلىندا تۇراتىن سىزدىقوۆتار وتباسىنىڭ قۋانىشىنا, جارقىن جەڭىسىنە ورتاقتاسىپ, قۇتتىق­تاۋشىلار قاتارى كوپ. شالعاي ەلدى مەكەندى قونىس ەتكەن اكە-شەشەسى انۋاربەك پەن ءمارزيادا ءتىپتى ەس جوق. انۋاربەك جاستايىنان سپورت­تىڭ بىرنەشە تۇرىمەن اينالىسقان. مەكتەپتە وقىپ جۇرگەندە اۋدان­دىق, وبلىستىق بايگەلەردىڭ الدىن بەرمەگەن. ال وتباسىنداعى 4 ۇل-قىزدىڭ اراسىندا جولىن قۋعانى ەلميرا بولدى. – ءبىر كۇنى ساران قالاسىندا بالالار جانە سپورت مەكتەبىنىڭ ديرەكتورى بولىپ جۇمىس ىستەيتىن اعامنىڭ بالاسى رايىمبەك اۋىلعا كەلگەندە, ەلميرامنىڭ سپورتقا دەگەن ەرەكشە ىنتا-ىقىلاسىن بايقاپ, قاراعاندىعا الىپ كەت­كىسى كەلدى. 7 سىنىپتا وقيتىن قىزى­مىزدى بالاسىنىپ جۇرگەن ءبىز باستاپقىدا كەلىسپەدىك. الايدا, قابىرعامىزبەن اقىلداسا كەلىپ, باعىن بايلاماۋدى ويلادىق. ءا.مولداعۇلوۆا اتىن­داعى دارىندى بالالارعا ارنالعان ما­مان­داندىرىلعان سپورت مەكتەپ-ينتەرناتقا ءتۇسىپ, سو­دان كەيىنگى ءومىرى كۇرەسپەن تى­­عىز جالعاسىپ كەلەدى,–دەيدى ءانۋار­­بەك وتكەن كۇن­دەردى ەسكە الىپ. – ەلميرا العاشقى بەلدەسۋدە جەڭىلگەندە قاتتى قوبالجىعان بولارسىزدار؟ – اتاعىنان ات ۇركەتىن رەسەي­لىك بالۋان قىزدى ەلميرا بۇرىننان بىلەتىن. قاي جارىستا ەكەنى ەسىمدە جوق, ۇتقانى دا بار. ءا دەگەننەن ساتسىزدىككە ۇشىراسا دا, جۇلدەگەر بولادى-اۋ دەگەن سەنىم­دى جوعالتپادىق. ناتاليا ۆورو­بەۆانىڭ جارتىلاي فينالعا شىعۋى قولا ءۇشىن بەلدەسۋىنە جول اشىپ, كوڭىلىمىزدەگى ءۇمىت وتىن تۇتاتتى. ءيا, ەلميرانىڭ بوز كىلەم ۇستىندەگى كەزدەسۋلەرى, جەڭىسكە دەگەن ەرەكشە قۇشتارلىعى, قاي­سار مىنەزى ءبارىمىزدىڭ كوز الدى­مىز­دا, وتە ءتانتى ەتتى. جۇبا­نىش بەلدەسۋىنىڭ ءبىرىنشى كەزە­ڭىندە مونعول وچيرباتىن ناسانبۋرمانى 3:1 ەسەبىمەن تىزە بۇكتىردى. ودان كەيىن مىسىرلىق ەناس مۇستافانى قالاۋىنشا يلىكتىرىپ, 3 ۇپاي ەسەبىمەن باسىم ءتۇستى. وسىلايشا قازاق قىزدارى اراسىندا كۇرەستەن وليمپيادا جۇلدەسىنە ىلىككەن تۇڭعىش سپورت­شى اتانىپ, ەسىمى التىن ءارىپ­تەرمەن جازىلدى. – ايتپاڭىز, – دەيدى ءانۋار­بەكتىڭ اپاسى, وسىندا مەكتەپ ديرەكتورى قىزمەتىن اتقاراتىن ايجان سىزدىقوۆا. – «بالاسى اتقا شاپسا, اناسى ۇيدە تاقىمىن قىسادى» دەمەكشى, ەلميرامىز كۇرەسەدى دەگەندە, ءىنىمنىڭ شاڭى­­راعىنا اۋىل بولىپ جينالىپ, سارالا تاڭدى سارىلا كۇتىپ وتىردىق. موڭعول قىزىن جەڭگەندە, ۇستىمىزدەن اۋىر جۇك تۇسكەندەي جەڭىلدەنىپ سالا بەردىك. ەندى ەلميرا مەن دانەليانىڭ ريو-دە-جانەيرودان ورالۋىن تاعاتسىزدانا كۇتىپ وتىرمىز. – ەلميرا تۇسىنىكتى. دانەليا كىم؟ – تۋعان ءسىڭلىسى. قاراعاندىدا بىرگە تۇرادى. اپكەمنىڭ تىلەۋشىسى بولامىن دەپ, ەرىپ كەتكەن. ءبىرىنشى بولىپ «سۇيىنشىلەگەن» دە سول. ەل­ميرانىڭ العاشقى جاتتىق­تىرۋشىسى – اكەسى. كۇرەس­تىڭ ءالىپ­پەسىن ۇيرەتىپ, قىر-سىرىنا باۋلىعان. سپورت مەكتەبىندە ۆلا­ديمير ستارو­سەلسكي باپتاسا, قازىرگى جاتتىقتىرۋشىسى – ۆلاديسلاۆ سۋتورمين. ءبىر باسىنا جەتەرلىك اتاق-داڭقىن انۋاربەك سانامالاپ شىقتى. – بىلتىر وتكەن «Mongolian Open-2015» حالىقارالىق تۋر­نيرى ەسىمدە جاتتالىپ قالىپتى. ۋلان-باتور تورىندە قىزىمىز قارسىلاس شىداتپادى. اقتىق اي­قاستا اقش-تان كەلگەن بەي­جىڭ وليمپياداسىنىڭ ءجۇل­دەگەرى رەندي ميللەردىڭ مىسىن باستى. استانا قالاسىندا ۇيىم­داستىرىلعان ازيا چەمپيوناتىندا ۆەتنام, كورەي, وزبەك بالۋاندارىن قوعاداي جاپىردى. فينالدا ۇندىلىك سپورتشىنى 8:1ەسەبىمەن ويسىراتا ۇتىپ, ريو جولداماسىنا يە بولدى, – دەي­دى قىزىنىڭ وليمپ شىڭىنا جەتۋ­دەگى جەڭىستى جولدارى جايلى اكەسى. قازاق قىزدارىنىڭ وليمپيا­داداعى العاشقى مەدالى ءىزباسار­لارىنا جۇعىستى بولعاي! ءومىر ەسقالي, «ەگەمەن قازاقستان» سولتۇستىك قازاقستان وبلىسى