قازاقستان شاحمات فەدەراتسياسى ءۇندىستاننىڭ بحۋۆانەسۆارە قالاسىندا 20 جاسقا دەيىنگى جاستار اراسىندا وتكەن الەم چەمپيوناتىن جەڭىپ العان دينارا سادۋاقاسوۆاعا 1 ملن. تەڭگە سىياقى تابىس ەتەدى.
بۇل سىندا دينارانىڭ وكشەسىن باسىپ كەلە جاتقان رەسەيلىك شاحماتشى دينارا دوردجيەۆا سوڭعى پارتيادا ءۇندى داريا ءپارناليدى جەڭە الماي, تەڭ وينادى. دينارا سادۋاقاسوۆا دا سوڭعى ويىنىندا موڭعوليانىڭ وكىلىمەن تەڭ ءتۇستى. رەسەيلىك شاحماتشىنىڭ تەڭ ويىنى قازاق قىزىنا الەم چەمپيونى اتانۋعا مۇمكىندىك بەردى.
ءسويتىپ, 19 جاستاعى وتانداسىمىز الەمدىك دودادا 13 تۋردا 9,5 ۇپايى جيناپ, چەمپيون اتاندى. ەكىنشى ورىندى ءۇندى پيۆي ناندحيدحا, ءۇشىنشى ورىندى رەسەيلىك دوردجيەۆا يەلەندى.
وسى دودادا جاسوسپىرىمدەر اراسىندا 16 جاستاعى امەريكالىق دجەفەري سيۋن باس جۇلدەنى جەڭىپ الدى.
بۇگىن قازاقستان شاحمات فەدەراتسياسىنىڭ پرەزيدەنتى عالىمجان ەسەنوۆ دينارا سادۋاقاسوۆاعا قۇتتىقتاۋ حاتىن جولدادى. وندا: «ءسىزدى بارلىق قازاقستاندىقتاردىڭ, شاحمات فەدەراتسياسىنىڭ جانە ءوزىمنىڭ جەكە اتىمنان جەڭىسىڭىزبەن قۇتتىقتايمىن. قازاقستان شاحمات فەدەراتسياسى سىزگە الەم چەمپيوناتىندا جەڭىسكە جەتكەنىڭىز ءۇشىن 1 ملن. تەڭگە كولەمىندە سىياقى بەرۋ تۋرالى شەشىم قابىلدادى. الەم چەمپيوناتىن جەڭىپ الۋ - قازاقستان شاحماتىنىڭ ۇلكەن جەتىستىگى. سىزگە جاڭا جەڭىستەر تىلەيمىن. الداعى كەزدە دە ەلىمىزدىڭ نامىسىن حالىقارالىق ارەنادا لايىقتى قورعاپ جۇرە بەرۋىڭىزگە تىلەكتەسپىن», دەلىنگەن.
داستان كەنجالين
فوتو: قازاقستان شاحمات فەدەراتسياسى
