ابايدىڭ اجەسى زەرەگە ەسكەرتكىش ورناتىلدى

شىعىس جۇرتى تاعى دا ءبىر ەلەۋلى ءىس اتقاردى. ەل تاۋەلسىزدىگىنىڭ 25 جىلدىعىنا وراي, قازاقتىڭ ءبىرتۋار اقىنى ابايدىڭ اجەسى زەرەگە ارنالعان ەسكەرتكىش جارما اۋدانىنىڭ قالباتاۋ اۋىلىندا بوي كوتەردى. اسىل انالارعا دەگەن قۇرمەت, ىزگىلىك, ءىلتيپات كورسەتۋ جاس ۇرپاقتىڭ بويىندا ءپاتريوتيزمدى قالىپتاستىرۋ ماقساتىندا « ۇلى دالانىڭ ۇلى انالارى» اتتى ءىس شارا اياسىندا قولعا الىنعان بولاتىن. يگىلىكتى باستامانىڭ ۇيىتقىسى بولعان جارما اۋدانىنىڭ اكىمى نۇرلان سىدىقوۆ ەل انالارىنا دەگەن قۇرمەتتىڭ ەسكەرۋسىز قالمايتىنىن ايتادى. «ۇرپاق ساباقتاستىعىن جالعاستىرۋشى ۇلتتى تاربيەلەر اسىل جاندارىمىزعا تاعزىم ەتۋ قاشاندا پارىزىمىز», – دەيدى ول. تورقالى تويعا قاتىسقان قۇنانباي فيلمىندە باستى ءرولدى سومداعان دوسجان جولجاقسىنوۆ ءوز ويىن بىلاي تارقاتتى: «جۇماق انالاردىڭ تابانىنىڭ استىندا. الىپ انادان تۋادى دەيدى حالقىمىز. الەمنىڭ بار اسىلى – دانىشپان عالىم دا, ءسوز باستاعان شەشەن دە, ەل باستاعان كوسەم دە انانىڭ كوكىرەگىنەن ءنار الىپ, تامىر جايادى. كوركەم ونەر سالاسىندا ەڭبەك ەتكەن ادامدارعا, اۋدان جۇرتىشىلىعىنا العىسىم شەكسىز». ادەمى ۇيلەسىم تاپقان ءمۇسىننىڭ بەينەسىن ەرتىس تاتيەۆ پەن ونىڭ ۇلى ەركەبۇلان ەرتىس ۇلى جاساپ شىققان ەكەن. ەسكەرتكىشتە زەرەنىڭ الدىندا بالا اباي بەينەلەنگەن. ولاردىڭ ايتۋىنشا, بۇل يدەيا روماننان الىنعان ۇزىندىگە نەگىزدەلىپ جاسالعان. «اباي جولى» رومان-ەپوپەياسىندا اباي اجەسى زەرەنىڭ تاربيەسىندە بولعانىن, جاستايىنان قيسسا داستانداردى ەستىپ, كوكەيىنە توقىپ وسكەنىن بىلەمىز. قولى التىن شەبەرلەردىڭ وسىنداي تۋىندىلارى تاريحىمىزدىڭ اشىلماعان سىرلارىن, اقتاڭداق بەتتەرىن اق پاراققا تۇسىرۋمەن تەڭ. اسىلدىڭ سىنىعى, تۇلپاردىڭ تۇياعى بولعان ارداقتى انالارعا قانداي قۇرمەت كورسەتسە جاراسىمدى. بۇل يگىلىكتى ءىس وزگە وڭىرلەردە دە جالعاسىن تاۋىپ جاتسا قۇبا-قۇپ. ايمان مۇقىشەۆا