كورىكتى جەرلەردى كورسەتتى

«استانا ەكسپو-2017» ۇك» اق جانە اقمولا وبلىسى اكىمدىگىنىڭ ۇيىمداستىرۋىمەن بۋرابايدا استانا, الماتى قالالارى مەن پاۆلودار, قاراعاندى, سولتۇستىك قازاقستان, اقمولا وبلىستارى تۋريستىك وپە­راتورلارىنىڭ روۋد-شوۋى وتكىزىلدى. ماڭىزدى شارا ششۋچە-بۋراباي كۋرورتتى ايماعىنداعى ۇزدىك تۋريستىك قىزمەت نىسان­دارىنداعى اقپاراتتىق-جار­نامالىق تۋرمەن, كەڭ اۋقىم­داعى تانىستىرىلىمدارمەن باستالدى. روۋد-شوۋ ءوڭىردىڭ قايتالانباس تۋريستىك الەۋەتىن كورسەتۋگە, ىشكى ءتۋريزمدى دامى­تۋعا, حالىقارالىق ەكسپو-2017 كورمەسى قارسا­ڭىنداعى قازاقستاننىڭ تۋريس­تىك كومپانيالارىنىڭ ىسكەرلىك بايلانىستارىن جان­داندىرۋعا باعىتتالعان. قوناقتار اقپاراتتىق تۋر ايا­سىندا زامانالىق «Kon­forHotelBurabay», «Alma-ata», «TerrassaPark», «Park­HouseKokshetau», «ايناكول», «الەم+» وتەل­دەرى سياقتى 10 نىساندا بولدى. ولار «بۋراباي – قازاقستاننىڭ جاۋھارى» تاقىرىبىنداعى تانىمدىق ساياحاتتىق باعدارلاماعا اي­رىقشا قىزىعۋشىلىق ءبىل­دىردى. سونداي-اق, ابىلاي حان الاڭىنداعى مادەني-ءساۋ­لەت كەشەنىنىڭ, بۋراباي مەملەكەتتىك ۇلتتىق تا­بي­عات پاركىنىڭ, «ۆيزيت-ور­تا­لىعىنىڭ», «بۋراباي-دامۋ» جشس تابيعات مۋزەيىنىڭ عاجايىپتارى روۋد-شوۋعا قاتىسۋشىلاردى ۇمىتىلماس اسەرگە بولەدى. «الەم» وتەلىندە قازاق­ستاندىق تۋريستىك وپەراتورلار مەن وڭىرلىك تۋريزم بيزنەسى وكىلدەرىنىڭ پلەنارلىق ءماجىلىسى بولدى. وندا اقمولا وبلىستىق تۋريزم باسقارماسىنىڭ باسشىسى شىناربەك باتىرحانوۆ ەكسپو-2017 كورمەسىنە ارنايى دايىندالعان شارالار تۋرالى تاراتا اڭگىمەلەدى. «استانا ەكسپو-2017» ۇك» اق مەنەدجەرى دانيەل سەر­جان ۇلى حالىقارالىق كورمە قىزمەتى جايىندا تانىستىرىلىمدىق حابارلاما جاسادى. وندا نەگىزگى نىساندار ساۋلەتى كەڭىنەن كورسەتىلىپ, ەكسپو-2017 قوناقتارى مەن قاتىسۋشىلارىنا قىزمەت جاساۋداعى تۋريستىك بيزنەس­كە جۇكتەلەتىن مىندەتتەر مەن تالاپتار اتاپ ءوتىلدى. بۇعان قوسا, د.سەرجان ۇلى كورمەنىڭ بيلەتتىك باعدارلاماسىنا قاتىستى ماسەلەلەرگە, ونى جەڭىلدىكپەن الۋ تارتىبىنە ارنايى توقتالدى. شارا بارىسىندا «بۋرا­باي-دامۋ» جشس ماركەتينگ جانە تۋريزم ءبولىمىنىڭ جەتەكشىسى اسەل جاعىپاروۆا «قايتالانباس سۇلۋلىق ولكەسى», «اقمولاتۋريست» اق باس ديرەكتورىنىڭ ورىنباسارى باۋىرجان ورىنباەۆ «استانا – ءۇشىنشى مىڭجىلدىقتىڭ قالاسى» تاقىرىبىندا شولۋ تانىستىرىلىمىن ۇسىندى. «ارمان تۋر» ايماقارالىق تۋريستىك وپەراتورىنىڭ باسشىسى سالتانات ءابجانوۆانىڭ ەكسپو-2017-دەگى ەكسپوزيتسيا­سى مول مۋزەيدىڭ, سان الۋان كورمەلەردىڭ جۇمىسىمەن ءوز بەتىمەن تانىسۋعا مۇمكىندىك بەرەتىن RG سەرياسىنداعى راديوگيد راديوبايلانىس جاب­دىعىن, اۋديوگيد فونوگراماسىن تانىستىرىپ, ىسكە قوسۋى جۇرتشىلىقتىڭ قىزى­عۋشىلىعىن تۋدىردى. كەزدەسۋ سوڭىندا روۋد-شوۋعا قاتىسۋشىلار b2b فورماتىندا ەكىجاقتى كەزدەسۋلەر وتكىزىپ, ءوزارا ىنتىماقتاستىق جونىندەگى كەلىسىمشارتتارعا قول قويدى. باقبەرگەن امالبەك, «ەگەمەن قازاقستان» اقمولا وبلىسى