«ەگەمەن» مەن «قازاقستان» بىرلەسكەن جوبالاردى جۇزەگە اسىرادى

بۇگىن ەلىمىزدەگى ەڭ ءىرى ەكى اقپارات قۇرالى – «ەگەمەن قازاقستان» گازەتى مەن «قازاقستان» تەلەراديوكورپوراتسياسى اراسىندا ءوزارا ىنتىماقتاستىق تۋرالى مەموراندۋم بەكىتىلدى. باس باسىلىمنىڭ عيماراتىندا وتكەن كەزدەسۋ بارىسىندا وسى قۇجاتقا «ەگەمەن قازاقستان» رەسپۋبليكالىق گازەتى» اق باسقارما توراعاسى دارحان قىدىرالى جانە «قازاقستان» رترك» اق باسقارما توراعاسى نۇرجان مۇحامەدجانوۆا قول قويدى. بۇل مەموراندۋم قازاق ءباسپاسوزىنىڭ قارا شاڭىراعىنا اينالعان, 100 جىلعا جۋىق تاريحى بار گازەت پەن قابىرعالى قالىڭ ەلدىڭ سۇيىكتى تەلەارناسىنا بىرلەسكەن جوبالاردى جۇزەگە اسىرۋ, وتاندىق اقپارات كەڭىستىگىندە ساپالى ونىمدەر ۇسىنۋ جانە شىعارماشىلىق ۇدەرىستەردە ءوزارا قولداۋ كورسەتۋ تۇرعىسىنان ءتيىمدى ىنتىماقتاستىققا جول اشادى. كەزدەسۋ بارىسىندا نۇرجان جالاۋقىزى اتاپ وتكەندەي, قازىرگى زاماندا وتاندىق اقپارات قۇرالدارىنا جاڭا تالاپتار مەن مىندەتتەر قويىلىپ وتىر. ويتكەنى, ءباسپاسوز قالىڭ جۇرتشىلىققا ساپالى, باسەكەگە قابىلەتتى ءونىم ۇسىنۋى ءتيىس. سوندىقتان بولاشاقتا وسى مەموراندۋم نەگىزىندە كوپتەگەن ماڭىزدى جوبالاردى بىرلەسىپ ىسكە اسىرۋ جوسپارلانعان. «ەگەمەن-اقپارات»