پرەزيدەنت بىرنەشە مەملەكەتكە ساپارمەن بارادى

مەملەكەت باسشىسىنىڭ قاتىسۋىمەن وتەتىن الداعى ءىس-شارالار اڭداتپاسى بەلگىلى بولدى. Akorda.kz-ءتىڭ حابارلاۋىنشا, قازاقستان پرەزيدەنتى 22 تامىز – 5 قىركۇيەك ارالىعىندا بىرنەشە مەملەكەتكە ساپارمەن بارادى. اتاپ ايتقاندا, 22-23 تامىزدا نۇرسۇلتان نازارباەۆ پرەزيدەنت اندجەي دۋدانىڭ شاقىرۋىمەن پولشا رەسپۋبليكاسىنا مەملەكەتتىك ساپارمەن بارادى. ەكى ەلدىڭ كوشباسشىلارى ساۋدا-ەكونوميكا, ينۆەستيتسيا, اۋىل شارۋاشىلىعى, سونداي-اق ترانزيت-كولىك جانە مادەني-گۋمانيتارلىق سالالارداعى ىنتىماقتاستىقتى نىعايتۋ جولدارىن تالقىلاۋدى جوسپارلاپ وتىر. بۇدان بولەك, مەملەكەت باسشىسىنىڭ قازاقستان-پولشا بيزنەس-فورۋمىنا قاتىسۋى كوزدەلگەن. 23-24 تامىزدا قازاقستان پرەزيدەنتى رەسمي ساپارمەن سەربيا رەسپۋبليكاسىنا بارىپ, وندا پرەزيدەنت توميسلاۆ نيكوليچپەن كەزدەسەدى. كەلىسسوزدەر اياسىندا مەملەكەتتەر باسشىلارى قازاقستان مەن سەربيانىڭ ەكىجاقتى قارىم-قاتىناسىنىڭ وزەكتى ماسەلەلەرىن تالقىلايتىن بولادى. نۇرسۇلتان نازارباەۆ 1-5 قىركۇيەك ارالىعىندا قحر توراعاسى سي ءتسزينپيننىڭ شاقىرۋىمەن G-20 سامميتىنە قاتىسۋ ءۇشىن قىتاي حالىق رەسپۋبليكاسىنا ساپارمەن بارادى. ساپار بارىسىندا مەملەكەت باسشىسى سي تسزينپينمەن كەزدەسىپ, وندا استانا مەن بەيجىڭ ىنتىماقتاستىعىنىڭ باسىم باعىتتارى تالقىلانادى دەپ جوسپارلانۋدا. بۇدان بولەك, سامميت اياسىندا دەلەگاتسيالار باسشىلارىمەن بىرقاتار كەلىسسوزدەر وتپەك. ايدار ورىسباەۆ