مەملەكەتتىڭ نەگىزگى كاپيتالى – حالىق. سوندىقتان, ادام دەنساۋلىعى – ەڭ نەگىزگى ماسەلەنىڭ ءبىرى. دەنساۋلىق ساقتاۋ سالاسىنا قارجىنىڭ جەتكىلىكتى ءبولىنۋى, جاڭا قۇرالدارمەن جابدىقتالۋى, مامانداردىڭ بىلىكتىلىگىن ارتتىرۋ سەكىلدى ىرگەلى جۇمىستىڭ بارلىعى مەملەكەتتىڭ نەگىزگى بايلىعىنا قۇيىلعان ينۆەستيتسيا دەپ ءبىلۋىمىز كەرەك.
تاۋەلسىزدىكتىڭ العاشقى جىلدارىنان باستاپ قىزىلوردا وبلىسىنىڭ دەنساۋلىق ساقتاۋ سالاسىندا قىرۋار تىرلىك اتقارىلدى. ەكولوگيالىق ايماق سانالاتىن وڭىردە تۇراتىن حالىقتىڭ دەنساۋلىعىنا مىقتاپ كوڭىل بولمەسە بولمايتىنى بەسەنەدەن بەلگىلى عوي. سول سەبەپتى اتالمىش سالا باستى نازاردا بولدى. دەگەنمەن, بايقوڭىر قالاسى مەن اقاي, تورەتام ەلدى مەكەندەرىندەگى اۋرۋحانانىڭ ماسەلەسى تالاي جىلدان بەرى ءسوز بولىپ كەلە جاتىر ەدى. بۇرناعى كۇنى بۇل ماسەلە دە شەشىمىن تاپتى. سولايشا, بايقوڭىر قالاسىندا وبلىستىق مەديتسينالىق ورتالىقتىڭ فيليالى اشىلدى. بۇل ورتالىقتا بايقوڭىر قالاسىندا تۇراتىن قازاقستان ازاماتتارى مەن قارماقشى, قازالى جانە ارال اۋداندارىنىڭ تۇرعىندارى مەديتسينالىق كومەك الا الادى.
2007 جىلى قازاقستان مەن رەسەي اراسىنداعى كەلىسىم نەگىزىندە بايقوڭىر قالاسىندا 80 توسەكتىك پەرزەنتحانا, قازاقستان رەسپۋبليكاسىنىڭ قاراجاتى ەسەبىنەن اۋىسىمىنا 100 كەلۋشىگە ارنالعان ايەلدەرگە كەڭەس بەرۋ ورتالىعىن سالۋ تۋرالى شەشىم قابىلدانعان بولاتىن. ورتالىق عيماراتىنىڭ قۇرىلىسىنا 1 ميلليارد تەڭگەدەن استام قاراجات جۇمسالعان. قۇرىلىس جۇمىستارى 2010 جىلدىڭ اياعىندا اياقتالىپ, ءارتۇرلى سەبەپتەرمەن نىساننىڭ اشىلۋى كەيىنگە قالدىرىلىپ كەلدى. تەك 2015 جىلدىڭ قاراشاسىندا قىزىلوردا وبلىسى اكىمدىگىنىڭ باستاماسىمەن ماسكەۋدە وتكەن ۇكىمەتارالىق كوميسسيا وتىرىسىندا اتالمىش عيماراتتى قازاقستان تاراپىنا بەرۋ تۋرالى شەشىم قابىلدانىپ, اۋرۋحانانى جابدىقتاۋ ءۇشىن قوسىمشا قاراجات ءبولىندى.
وبلىستىق مەديتسينالىق ورتالىق فيليالىنىڭ اشىلۋ سالتاناتىنا ايماق باسشىسى قىرىمبەك كوشەرباەۆ, «جەرۇستى عارىش ينفراقۇرىلىمىن پايدالانۋ» ورتالىعى باس ديرەكتورىنىڭ مىندەتىن اتقارۋشى رانوحون دجۋراەۆا قاتىسىپ, بايقوڭىر قالاسى تۇرعىندارىنىڭ قۋانىشىنا ورتاقتاستى.
– وبلىستىق مەديتسينالىق ورتالىق فيليالىنىڭ اشىلۋى – بايقوڭىر قالاسىندا تۇراتىن قازاقستاندىقتار ءۇشىن ۇلكەن قۋانىش. تاۋەلسىزدىكتىڭ 25 جىلىندا وبلىستا 3 مەديتسينالىق ورتالىق پايدالانۋعا بەرىلدى. ولار: وبلىستىق مەديتسينالىق, دياگنوستيكالىق جانە پەريناتالدىق ورتالىقتار. سونىمەن قاتار, 5 اۋداندىق ەمحانا, ءبىر اۋرۋحانا, 4 تۋبەركۋلەزگە قارسى ديسپانسەر, قىزىلوردا قالاسىنان زاماناۋي ەمحانا جانە ءوڭىردىڭ بارلىق ەلدى مەكەندەرىنەن جالپى سانى 100-گە جۋىق ەمدەۋ مەكەمەسى ەل يگىلىگىنە پايدالانۋعا بەرىلدى. ولاردىڭ بارلىعى اۆتوكولىكپەن, قاجەتتى مەديتسينالىق قۇرال-جابدىقتارمەن قامتاماسىز ەتىلگەن. سونىمەن بىرگە, جوعارى مامانداندىرىلعان كارديولوگيالىق جانە نەيروينسۋلتتىك ورتالىقتار اشىلدى. ناتيجەسىندە رەسپۋبليكانىڭ باسقا قالالارىنا بارىپ ەمدەلەتىن قىزىلوردالىقتار سانى 3 ەسەگە ازايدى,– دەدى قىرىمبەك ەلەۋ ۇلى.
بايقوڭىر قالاسىندا جاڭادان اشىلعان مەديتسينالىق ورتالىق 240 مىڭ حالقى بار قارماقشى, قازالى مەن ارال اۋداندارىنىڭ تۇرعىندارى ءۇشىن دە مەديتسينالىق كومەك كورسەتەتىن بولادى. مەديتسينالىق كومەك سولتۇستىك اۋدانداردىڭ تۇرعىندارى وبلىس ورتالىعىنا بارىپ ەم الاتىن باستى باعىتتار بويىنشا جۇرگىزىلەدى. قازىردىڭ وزىندە بايقوڭىرداعى وبلىستىق مەديتسينالىق ورتالىق فيليالىندا وڭالتۋ جانە تەراپيا بولىمشەلەرى جۇمىس ىستەپ تۇر. كەزەڭ-كەزەڭىمەن وفتالمولوگيا, لور, حيرۋرگيالىق, گينەكولوگيالىق بولىمشەلەر مەن پەرزەنتحانا جۇمىسىن باستايدى دەپ كۇتىلۋدە.
ەرجان بايتىلەس,
«ەگەمەن قازاقستان»
قىزىلوردا وبلىسى
