الماتى وليمپيادا جۇلدەگەرلەرىن قارسى الدى

بۇل ءتۇنى قالا تۇرعىندارى ريو-دە-جانەيرودان كەلە جاتقان قوس جۇلدىزدى – كۇمىس جۇلدەگەر ەلدوس سمەتوۆ پەن قولا جۇلدەگەر وتگونتسەتسەگ گال­بادراحتى قارسى الۋعا شىقتى. ونسىز دا ءتۇننىڭ بۇل مەزگىلىندە قۇرلىقتىڭ ارعى بەتىندەگى برازيلياعا قۇلاق ءتۇرىپ, قۇس ۇيقىلى جۇرگەن جانكۇيەرلەر قوس سپورتشىنى كورگەندە  قول شاپالاقتاپ, بۇكىل اۋەجايدى بەينەبىر ولاردى سايىستىڭ جەڭىستى ساتىندە كورگەندەي دۋمانداتىپ جىبەردى. ەلدوستىڭ اكەسى باقتىباي سمەتوۆ بىلاي دەدى: – ءبىزدىڭ قۋانىشىمىزدا شەك جوق. ەلدوس 6 جاسىنان باستاپ سپورتپەن ۇزبەي اينالىسىپ كەلەدى. توككەن ءتوردىڭ, ەتكەن ەڭبەكتىڭ زايا كەتپەيتىنىنە كوزىم جەتتى. بالامنىڭ اۋزىنان وليمپيادا تۇسپەي ارمانداپ ءجۇرۋشى ەدى, ول ماقساتىنا جەتتى. سپورتپەن اينالىسىڭدار, جاستار! وتگونتسەتسەگ تە قازاقشادان قۇر­الا­قان ەمەس ەكەن. قارسى الۋشى توپقا قاراپ تۇرىپ, قازاق تىلىندە الىستاعى قازاقستاننان قولداۋ كورسەتكەن جان­كۇيەر­لەرگە راحمەت ايتتى. ءوزى ارمانى­نا جەتكەنىنە قۋانىشتى ەكەن. ءسوزىن كىبىرتىكتەپ اياقتاپ, ۇياڭ عانا جىمي­عان بۇلدىرىقتاي موڭعول قىزى وڭ قولىن جوعارى كوتەرىپ جاستارعا دەم بەرە: «العا, قازاقستان!», – دەدى. الاتاۋدىڭ يىعىنان التىن شاپاق اسىپ تۇسكەندە اۋەجايعا وليمپيادانىڭ  «التىنىن تيەگەن» ەكىنشى ءبىر ەرەكشە ۇشاق كەلىپ قوندى. بۇل الماتىنىڭ «التىن بالاسى» – بيىلعى وليمپيادانىڭ چەمپيونى, بالىقشا جۇزە بىلەتىن شەبەر دميتري بالاندين مىنگەن لاينەر بولاتىن. سۋداي جاڭا چەمپيوندى قالا جۇرتشى­لىعى, ءوزى وقيتىن ءال-فارابي اتىنداعى قاز مۇۋ ستۋدەنتتەرى, جاقىندارى جانە قالا اكىمى باۋىرجان بايبەك قارسى الدى. – دميتري ءبالانديننىڭ ريودا ءوتىپ جاتقان جازعى وليمپيادا ويىندارىنداعى جەڭىسى – ءبىزدىڭ ەل ءۇشىن تاريحي جەڭىس, – دەدى قالا باسشىسى. – ءبىز بۇكىل ەل بولىپ بۇل جەڭىسكە ەرەكشە قۋاندىق. ول بۇل جارىسقا جىلدار بويى تەر توگىپ دايىندالدى.  ءسويتىپ, ءادىل تۇردە شىن جەڭىمپاز اتاندى. الداعى ۋاقىتتا ەلىمىزدە دميتري بالاندين سەكىلدى جاستار كوپتەپ شىعىپ, چەمپيون اتانىپ, ەلىمىزدىڭ ابىرويىن ارتتىرادى دەگەن سەنىمدەمىن. ءوز كەزەگىندە الماتىنىڭ «التىن» بالاسى وزىنە قولداۋ بىلدىرگەن جانكۇيەرلەرىنە العىسىن ءبىلدىردى. «مەن ءۇشىن ەلىمىزدى الەمگە تانىتۋ, كوك تۋدى جەلبىرەتۋ زور مارتەبە!..» دەدى ول. جانكۇيەرلەر وليمپيادا چەمپيو­نىمەن سۋرەتكە ءتۇستى, قولتاڭبا الۋعا كەزەككە تۇردى. تالعات ءسۇيىنباي, «ەگەمەن قازاقستان»  الماتى