ويىندارداعى جارىستىڭ توعىزىنشى كۇنى تاعى دا تولقىتتى.
ءۇش كۇن بويى سارىلا كۇتكەندە جەڭىل اتلەت ولگا رىپاكوۆا ءۇش قارعىپ سەكىرۋدەن وليمپيالىق ويىنداردىڭ قولا جۇلدەسىن قورجىنىمىزعا سالدى. قومسىناتىن جۇلدە ەمەس. وسى كۇنى لوندون وليمپياداسىنىڭ جەڭىمپازى, الەمنىڭ 6 دۇركىن چەمپيونى, يراندىق حاميت سوريان بالۋان ومىرىندە ءبىرىنشى رەت ءبىر دە ءبىر بەلدەسۋدە جەڭىسكە جەتە الماي, بەتىن باسىپ ۇزاق وتىردى.
ءبىزدىڭ ولگا, ەكى بالانىڭ اناسى, وتباسى كۇيبەڭى مەن جاتتىعۋدىڭ اراسىن قوسقان اياۋلى قىزىمىز لوندونداعى بابىندا بولماعانىمەن, مەملەكەتىنىڭ مەرەيى ءۇشىن ايانىپ قالعان جوق. العاشقى كەزەگىندە-اق 14,73 مەتر قاشىقتىققا سەكىرىپ, بىرازعا دەيىن باسقالاردى الاڭداتىپ قويدى. ەكىنشى ورىندا 14,71 مەتر ءناتيجەمەن امەريكالىق كەتۋرا ورجي كەلە جاتقان. جارىس قىزعاندا, ورجي ءتورتىنشى ورىنعا سىرعىپ كەتتى دە, قايتا كەلە المادى.
جارىس جولىنداعى قىزدارعا قاراساڭ كوز دە, كوڭىل دە تويادى. كىلەڭ اقالتەكە, قىل مويىن اراب اتتار الامانعا ءتۇسىپ جاتقانداي ەرەكشە كوز تارتادى. اسىرەسە, كولۋمبيالىق كاترين يبارگۋەننىڭ جارىسقا تۇسەر مانەرى ەرەكشە. ورنىندا تۇرا الماي, مىڭ تىقىرشىپ, باسىن تومەن سالادى دا, قۇيعىتا جونەلەدى. «التىندى» وسى قارا مارجان قىز قاقشىپ كەتتى. ەشكىمنەن سۇراپ العان جوق, ەڭبەگىنىڭ جەمىسىمەن الدى. ونىڭ ءناتيجەسى – 15,17 مەتر. ەكىنشى ورىن 14,98 مەترگە قارعىعان ۆەنەسۋەلالىق يۋليمەر روحاستىڭ ۇلەسىنە ءتيدى. ايتقانداي, ولگا وسى ءناتيجەمەن لوندوندا توپ جارعان ەدى. ونىڭ بۇل جولعى كورسەتكىشى 14,74 مەتر بولدى.
– مەن وتانىمنىڭ نامىسىن لايىقتى قورعاپ, قولا مەدال العانىمدى ۇلكەن ماقتانىش كورەمىن, – دەدى ولگا. – لوندوننان كەيىنگى ءتورت جىل مەن ءۇشىن وڭاي بولعان جوق. جاس ءسابيى بار ادامعا تىنىمسىز جاتتىعۋعا ۋاقىت تا, جاعداي دا كەلە بەرمەيدى. وزىمە ءوزىم تولىق كەلمەگەنىم وليمپيادا بارىسىندا قاتتى اڭعارىلدى. ەكپىن الىپ جۇگىرۋدە, جەردەن كۇش الۋدا ءوزىمدى جايسىز سەزىندىم. تەك بەسىنشى مۇمكىندىگىمدە عانا وزىمە كەلىپ, ناتيجەمدى جاقسارتا الدىم. جارىس كەزىندە بولماسا, جاتتىعۋدا جاقسى ناتيجە كورسەتە المايمىن, مەنى جارىس وسىرەدى. كاترين يبارگۋەنمەن جاقسى دوسپىز. ول ءتورت جىلدا تەك جەڭىسكە جەتىپ كەلەدى. ءبىر تۋرنيردە عانا ماعان جول بەرگەن. جارىستان سوڭ ءبىر-بىرىمىزگە جاقسىلىقتار تىلەدىك. مەن سپورتتى ءازىر دوعارمايمىن. لوندونداعى الەم چەمپيوناتىنا دايىندالامىن دەپ شەشتىم. ول قالا ماعان ۇنايدى, ومىرىمدەگى ەڭ ءىرى جەتىستىگىمە سول جەردە جەتكەنمىن
جەڭىل اتلەتيكا سپورت ويىندارىنىڭ حانشايىمى سانالادى. وسىنداي ەڭ مارتەبەلى جارىستا ولجامىزدى ەسەلەگەن قىزىمىز وسىلاي دەيدى.
ەندى بۇرناعى كۇندەردى قورىتىندىلاساق. مەدالدارعا جامان ۇيرەنىپ قالىپپىز. جۇما كۇنى 85 كيلو سالماقتاعى اتلەتىمىز دەنيس ۋلانوۆ جۇلدە الادى دەگەن نىق سەنىممەن باردىق. جوبامىزدا مەدالعا ءتورت سپورتشى تالاسادى. ولاردىڭ كوش باسىندا, ارينە, الەم رەكوردشىسى كيانۋش روستامي بار. ول دا ءوز كۇشىنە سەنگەن جايساڭ ەكەن. كەلسەڭ كەل دەگەندەي, جۇلقا كوتەرۋ مەن سەرپە كوتەرۋدە بارىنەن جوعارى سالماققا تاپسىرىس بەرىپ قويىپتى. قىتايلىق تيان تاو, دەنيس ۋلانوۆ جانە ۋكراين الەكسانار فيليشەنكو تاپسىرىستارى ءبىر-بىرىمەن قارايلاس. سايىسقا تۇسكەن 11 اتلەتتىڭ ىشىنەن العاشقى جاتتىعۋدا ارميان اراكەل ميرزويان جاراقات الىپ, شىعىپ قالدى. ۇزىن ءسوزدىڭ قىسقاسىن ايتقاندا, اتلەتىمىز ءتورتىنشى ورىننان اسا المادى.
كۇندىزگى سەسسيادا 52 كيلوداعى بوكسشىمىز ولجاس ساتتىباەۆ العاشقى كەزدەسۋىن جاقسى باستادى. ءبىرىنشى راۋندتا ەكى تورەشى پۋەرتوريكولىق جەۆپەر كينترونعا جەڭىس جازعانىمەن, سوڭعى ەكى راۋندتا ءبىزدىڭ وعلان جەڭىستى ءوز پايداسىنا اۋدارىپ الدى. سپورتتا مىنەز بولماسا, قارسىلاسىڭنىڭ شىلاۋىندا كەتەسىڭ. ولجاس ايانباي ايقاسىپ, تورەشىلەرگە ءوزىنىڭ مىقتى ەكەنىن دالەلدەدى.
كەشكى سەسسيادا ءۇش بوكسشىمىز شارشى الاڭعا كوتەرىلدى. الدىن الا وزىپ ايتساق, بۇل كۇن قازاق بوكسىنىڭ تابىستى كۇنى بولدى. ۆەنەسۋەلالىق گابريەل ماەسترە دەگەن پاقىر: «ەلەۋسىنوۆ – مىقتى بوكسشى, بىراق مەن ودان مىقتىمىن, بۇرىن ونى جەڭگەنمىن. مەنىڭ ارمانىم – وليمپيادا مەدالىن الۋ» دەپ جاھانعا جار سالىپ قويدى. اتاقتى فەليكس ساۆوننىڭ اعايىنى ەريسلاندي – كەۋدەسىن ۇرماعانىمەن, وتە قاۋىپتى قارسىلاس. اسا اۋىر سالماقتا الەمنىڭ ەكى دۇركىن چەمپيونى, الماتىداعى الەمدىك دودادا ءبىزدىڭ يۆان دىچكونى ۇرىپ قۇلاتقان ازەربايجان موگامادراسۋل مەدجيدوۆ «كەرەك بولسا, تاعى دا قۇلاتىپ تاستايمىن» دەپ قاراداي كىجىنىپ ءجۇر. وسىنداي سويقانداردان كەيىن تىنىس الۋدىڭ ءوزى اۋىر.
قازاق بوكسىنىڭ داۋىرلەپ تۇرعانىن شويىن جۇدىرىق جىگىتتەرىمىز كورسەتتى. اۋەلى دانيار ەلەۋسىنوۆ استامسىعان گابريەل ماەسترەنىڭ كارى جىنىن قاعىپ الدى. ءوز مانەرىمەن شەگىنە ۇرىس سالىپ, قورعانا ءجۇرىپ, قارسىلاسىنىڭ قورعانىسىن تاس-تالقان ەتتى. ءۇشىنشى راۋندتا ءۇش تورەشى دە ءبىر اۋىزدان جەڭىستى ءبىزدىڭ ۇلعا بەردى. بۇدان كەيىن ۆاسيلي لەۆيت ءبىرىنشى كەزەڭدى كۋبالىق ەريسلاندى ساۆونعا بەرىپ قويعانىمەن, كەيىننەن بەت قاراتپادى. وسىلايشا بىزدەن فينالعا ءبىرىنشى بولىپ شىقتى. بۇدان ءارى يۆان دىچكو اتوي سالدى. الماتىداعى الەم چەمپيوناتىندا دا وسى مەدجيدوۆتى ەكى راۋند ادەمى ۇتقان. سوڭعىسىندا تۇرىپ ايقاسامىن دەپ اۋىر سوققىعا كوزىگىپ قالعان. سودان جاقسى قورىتىندى شىعارىپتى. بۇل جولى مەدجيدوۆتىڭ قالاۋى ەمەس ءبىزدىڭ جىگىتتىڭ قالاۋى بولدى. ەكىنشى راۋندتا مەدجيدوۆ كوزىنەن جاراقات الىپ, دارىگەر ونى جارىستان الدى.
سول كۇنگى جارىسقا اتى اڭىزعا اينالعان كاسىپقوي بوكسشى فلويد مەيۆەزەر كەلدى. ءارى بەرى شىعىپ جۇرگەن ول دانيار ەلەۋسىنوۆتىڭ جەكپە-جەگىن مۇقيات كوردى. قول سوعىپ قۇرمەت كورسەتتى. ءبىز بۇنى ۇلكەن قۇرمەت دەپ ۇقتىق.
«ەگەمەن قازاقستاننىڭ» ارناۋلى ءتىلشىسى
باقتيار تايجان
ريو-دە-جانەيرودان حابارلايدى
جۇلدەلەر جيىنتىعى
| № | قۇرامالار | التىن | كۇمىس | قولا | بارلىعى |
| 1 | اقش | 26 | 21 | 22 | 69 |
| 2 | ۇلىبريتانيا | 15 | 16 | 7 | 38 |
| 3 | قىتاي | 15 | 13 | 17 | 45 |
| 4 | رەسەي | 9 | 11 | 10 | 30 |
| 5 | گەرمانيا | 8 | 5 | 4 | 17 |
| 6 | فرانتسيا | 7 | 8 | 7 | 22 |
| 7 | يتاليا | 7 | 8 | 6 | 21 |
| 8 | جاپونيا | 7 | 4 | 15 | 26 |
| 9 | اۆستراليا | 6 | 7 | 9 | 22 |
| 10 | وڭتۇستىك كورەيا | 6 | 3 | 5 | 14 |
| 16 | قازاقستان | 2 | 2 | 4 | 8 |
| 29 | بەلارۋس | 1 | 2 | 1 | 4 |
| 39 | وزبەكستان | 1 | 0 | 4 | 5 |
| 48 | ۋكراينا | 0 | 3 | 1 | 4 |
| 49 | ازەربايجان | 0 | 2 | 0 | 2 |
| 51 | ليتۆا | 0 | 1 | 2 | 3 |
| 52 | گرۋزيا | 0 | 1 | 1 | 2 |
| 42 | قىرعىزستان | 0 | 0 | 1 | 1 |
| 42 | ەستونيا | 0 | 0 | 1 | 1 |
مايكل فەلپس – 22-ءشى مارتە چەمپيون
امەريكالىق سۋدا ءجۇزۋشى مايكل فەلپس 200 مەترلىك قاشىقتىقتى كەشەندى جۇزۋدە قاتارىنان ءتورتىنشى رەت جەڭىسكە جەتىپ, وليمپيادانىڭ 22-ءشى مارتە چەمپيونى اتاندى. ءسويتىپ, وسى ريودا ءوزى جاساعان ءۇش رەكوردتى تاعى جاڭارتتى. ول بۇل ارالىقتى 1.54,66 مينۋتتا ءجۇزىپ ءوتىپ, ءوزىنىڭ جاپون باسەكەلەسى كوسۋكە حاگينودان 1.95 سەكۋندقا وزىپ كەلدى. اقش سپورتشىسى برازيليا جەرىندە جەڭىپ العان 4 التىن مەدالىن مۇنىڭ الدىندا 200 مەترگە كرولل ادىسىمەن جۇزۋدەن, 4ح100 جانە 4ح200 مەترلىك ەستافەتالاردان باستاپ جينادى.ارميان اۋىر اتلەتى قولىنان
ايىرىلىپ قالا جازدادىارمەنيا قۇراماسىنىڭ اۋىر اتلەتى اندرانيك كاراپەتيان 195 كگ سالماعى بار زىلتەمىردى سەرپە كوتەرۋ كەزىندە سول قولىنىڭ شىنتاعىن قايىرىپ جىبەرىپ, سىندىرىپ الا جازدادى. قولى ارتىنا قاراي قايىرىلىپ كەتكەن 20 جاستاعى سپورتشى اۋرۋ جانىنا باتقاننان ايقايلاپ جىبەردى. ول دارىگەرلەردىڭ كومەگىمەن تۇعىردى تاستاپ شىقتى.جۇرت نازارىن اۋدارعان قوزىقارىندى جۇزگىش
سۋدا ءجۇزۋ جارىسىنا قاتىسقان سپورتشىلاردىڭ ءبىرى 59 جۇزگىشتىڭ ەڭ سوڭىنان كەلدى. ءوزى باسقا اتلەتتەر سياقتى سىپتاي ەمەس, دەنەسى تولىق, ءتىپتى ازداپ قارنى دا بار. قوزى قارىندى بۇل وليمپياداشىنىڭ كىم ەكەنى ءسال كەيىنىرەك انىقتالدى. روبەل كيروس حابتە ەسىمدى جۇزگىش ەفيوپيا ءجۇزۋ فەدەراتسياسى پرەزيدەنتىنىڭ ۇلى بولىپ شىقتى. ءبىر قىزىعى, روبەل حابتە سۋ بايگەسىندە «تەزەك تەرىپ» قالعانىنا ەش جابىرقاعان جوق. رەسمي مالىمەت بويىنشا, حابتە حالىقارالىق ءجۇزۋ فەدەراتسياسىنىڭ ارنايى جولداماسىمەن كەلگەن. الايدا, ونىڭ اكەسى ءجۇزۋ فەدەراتسياسى پرەزيدەنتى ەكەنى انىقتالعان سوڭ, ەفيوپيادا ودان گورى جىلدام جۇزە الاتىن سپورتشىلار جوق ەكەنىنە كۇمانمەن قارايتىندار كوبەيدى. حابتەنىڭ ءوزى بولسا «ەفيوپيادا ءبارى جۇگىرەدى. ەشكىم جۇزبەيدى. مەن جۇگىرگىم كەلمەدى, جۇزگىم كەلدى. قانداي ورىن العانىم ماڭىزدى ەمەس» دەيدى.چەمپيوننىڭ اناسى ستاديونعا كىرە الماي قالدى
ءبىزدىڭ سۋعا جۇزۋدەن تۇڭعىش وليمپيالىق ويىنداردىڭ چەمپيونى دميتري ءبالانديننىڭ اناسى – تاتيانا ۇلىنىڭ تولاعاي تابىسقا جەتكەن ءساتىن تەلەۆيزوردان كورگەن. بۇعان ريوعا بالاسىنىڭ سوڭىنان جەتكەن ونىڭ ستاديونعا كىرەر بيلەتتى جوپەلدەمەدە جوعالتىپ العانى سەبەپ بولىپتى. ءوزىنىڭ ايتۋىنشا, الدىمەن ەلىمىزدىڭ سپورتشىلارىمەن بىرگە اۋىر اتلەتتەر سايىسىن كورۋگە بارعان. سوڭىنان سول جەردەن جۇزۋشىلەر جارىسى وتەتىن باسسەينگە كەلگەن. وسىندا قاتتى سوعىپ كەتكەن جەل ونىڭ اككرەديتاتسيا جاسالعان بەيدجىن ۇشىرىپ اكەتكەن. سوسىن بيلەت ساتىپ الماق بولىپ كاسساعا بارعان. بىراق بيلەت تاپپاعان. اقىرىندا قوناقۇيگە قايتىپ كەلۋىنە تۋرا كەلگەن. دامير قوجامقۇل
جۋالى جاسوسپىرىمدەرى شەتىنەن شىمىر
