جۇيكە اۋرۋحاناسىنان قاشىپ, استانادا ۇستالدى

اقمولا پوليتسەيلەرى جۇيكە اۋرۋحاناسىنان قاشىپ كەتكەن 28 جاسار الەكساندر پالەنيستى ەكى كۇننەن كەيىن استانا قالاسىندا ۇستاپ, زەرەندى اۋدانىنىڭ الەكسەەۆكا كەنتىندەگى اۋرۋحاناعا الىپ كەلدى. بۇرىن سوتتالعان جانە بەلگىلى ءبىر تۇراتىن جەرى جوق ا.پالەنيس 2016 جىلدىڭ 9 ساۋىرىندە اتباسار اۋدانىنداعى مارينوۆ تۋبەركۋلەزگە قارسى اۋرۋحاناسىنان الەكسەەۆكاداعى جۇيكە اۋرۋلارى اۋرۋحاناسىنا ەركىنەن تىس ەمدەۋگە جىبەرىلگەن بولاتىن. ول جۇيكە-تۋبەركۋلەز بولىمشەسىندە وزگە سىرقاتتار سياقتى ەم قابىلداپ جاتقان. 2016 جىلدىڭ 9 تامىزىندا, تاڭعى ساعات 9-دا پالەنيس وبلىستىق تۋبەركۋلەزگە قارسى ديسپانسەرىنە, بولىمشە دارىگەرىمەن جانە سانيتارمەن بىرگە جوسپارلى تەكسەرىسكە جىبەرىلەدى. بىراق, قىزمەتتىك كولىكتەن تۇسكەن بويدا ول ورمان جاققا قاشىپ, ۇستاتپاي كەتكەن. بۇل وقيعا تۋرالى زەرەندى اۋداندىق ىشكى ىستەر بولىمىنە 10 تامىز كۇنى عانا حابارلانىپتى. جەدەل ىسكە كىرىسكەن پوليتسيا قىزمەتكەرلەرى سىرقاتتىڭ تۋىستىق بايلانىستارىن جانە استانا, قوستاناي, پەتروپاۆل باعىتىنداعى اۆتوكولىكتەردى تەكسەرىپ, ساياجاي اۋماعىن ءسۇزىپ شىققان. كورشى وبلىستارعا دا حابارلار جولداندى. اقىرىندا ول استانا قالاسىندا ۇستالىپ, الەكسەەۆكاداعى جۇيكە سىرقاتى اۋرۋحاناسىنا جەتكىزىلدى. باقبەرگەن امالبەك