ورتەكەدەي ورعىعان جەڭىل اتلەت ولگا رىپاكوۆا وليمپيادانىڭ تاعى ءبىر جۇلدەسىن ەنشىلەدى. ريو وليمپياداسىنىڭ قولا جۇلدەگەرى اتانعان ولگا رىپاكوۆانىڭ جەڭىسىمەن قۇتتىقتاپ, وسكەمەندە تۇراتىن وتباسىنا قوڭىراۋ شالعان ەدىك. اكەسى مەن كۇيەۋى وليمپيادا ويىندارىنا بىرگە اتتانعاندىقتان, تۋعان ءسىڭلىسى ليۋدميلا الەكسسەۆامەن سويلەسۋدىڭ ءساتى ءتۇستى.
– ليۋدا, سالاماتسىز با؟ ولگانىڭ قولا جۇلدەسى قۇتتى بولسىن!
– راحمەت!
– ولگا ريو وليمپياداسىنا قانداي سەنىممەن اتتاندى؟ قاي تۇعىردان كورىنەتىنىن الدىن الا ءبىلدى مە؟
– وليا قاي مەجەدەن كورىنەتىنىن بىلمەسە دە, جۇلدەگەر بولاتىنىن, مەدال الاتىنىن انىق ءبىلدى. ويتكەنى, وليمپياداعا جاقسى كوڭىل-كۇيمەن, تاس-ءتۇيىن اتتاندى. ارينە, سپورتشىنىڭ بارلىعى التىنعا ۇمتىلادى. ولگا بۇل جولى «قولاعا» يە بولدى. وتە قۋانىشتىمىن. نەگىزى, بۇل سۇراقتى ەلگە كەلگەنىندە جاتتىقتىرۋشىسىنا قويۋلارىڭىز كەرەك شىعار.
– جاتتىقتىرۋشىسى اكەسى ەكەنىن بىلەمىز. ۇيدە قانداي دا ءبىر بولجامدار بولعان شىعار؟
– ءيا, ولگانىڭ باپكەرى تۋعان اكەسى – سەرگەي دميتريەۆيچ الەكسەەۆ. ۇيدە بولجامدار بولدى ما, بىلمەيمىن, ەسىمدە جوق. نەگىزى, ناقتى بولجامعا ارقا سۇيەگەن جوقپىز. التىن الامىز دەپ تە ايتپادىق. جۇلدەنى ويلاۋعا تىرىسقان جوقپىز. ارينە, جان-دۇنيەمىزدە ءۇمىت ساۋلەسى بولدى. ءۇمىت ۇنەمى بولۋى كەرەك. بىراق «التىن» بولادى دەپ تالقىلاعان ەمەسپىز. اكەمىز بولجام جاساعاندى ۇناتپايدى. ول تەك جۇمىس ىستەيدى. بولجام جاساۋ دۇرىس دۇنيە ەمەس. ويتكەنى, سپورتتى بولجاۋ مۇمكىن دە ەمەس. دايىندالدىڭ, التىن الاسىڭ دەۋگە بولمايدى.
– «قولانى» قومسىنعان جوقسىزدار ما؟
– مەن ريزامىن. ولگا جوعارى دەڭگەيدە ونەر كورسەتتى. قارسىلاستارى دا وتە مىقتى بولدى. نەگە «التىن مەدال المادى» دەگەنگە كەلسەك, بۇل ولگانىڭ قاتەلىگى ەمەس. ول وزىنە جۇكتەلگەن بارلىق مىندەتتى جاقسى اتقاردى. باسەكەنى كورگەندە, اسىرەسە فينالعا كەلگەندە, قارسىلاستارىنىڭ وتە قۋاتتى ەكەنىن بايقادىق, سوندىقتان قاتتى قوبالجۋ بولدى. بىراق تۇپتەپ كەلگەندە ولگا ۇشتىككە ەندى. ەت جاقىندارىنا ريو وليمپياداسى لوندون وليمپياداسىنان كەم سوققان جوق. ءسوزسىز قۋانىشتىمىز. بۇل وتە كۇردەلى كۇرەسپەن كەلگەن مەدال! ولگانىڭ لوندوننان كەيىنگى ءۇزىلىسىن ەسەپكە العاندا, بۇل جۇلدەنىڭ ءباسى بيىك ەكەنى داۋسىز. بۇگىندە ولگا ەكى بالا تاربيەلەپ وتىر. لوندوننان كەيىن وتباسىنا دا كوڭىل ءبولدى, جاتتىعۋعا دا ۋاقىت تاپتى. جانە جاتتىعۋىن ويداعىداي اتقاردى. ونىڭ ناتيجەسىن ريو تورىنەن كوردىڭىزدەر.
– وليمپيادا قالاشىعىندا ولگانىڭ ەت جاقىندارىنان كىمدەر بولدى؟
– جاتتىقتىرۋشى رەتىندە اكەسى سەرگەي دميتريەۆيچ الەكسەەۆ بىرگە بارعانىن ايتتىم. كۇيەۋى دەنيس سەرگەەۆيچ رىپاكوۆ تا جاتتىقتىرۋشى رەتىندە جانىندا بولدى.
– ولگانىڭ ونەرىن قايدا كوردىڭىزدەر؟
– تەلەديداردان تىكەلەي كورسەتىلىم تاڭەرتەڭ ەرتە بولعاندىقتان, ۇيدە ءبارىمىز بىرگە تاماشالادىق. انامىز, مەن, وليانىڭ كىشى ۇلى بار, ۇشەۋمىز كوردىك. قاتتى قوبالجىدىق تا, قۋاندىق تا. بۇل تاماشا ناتيجە بولدى. قاتارىنان وليمپيادا مەدالدارىن ەنشىلەۋ دەگەنىڭىز!.. وتە عاجاپ دۇنيە عوي! البەتتە, ولگا ءوزىنىڭ دايىندىعىنا سەندى. ءتىپتى قارسىلاستارى تۋرالى, ولاردىڭ ناتيجەلەرى جونىندە دە ويلامايدى. ءوزىنىڭ كوڭىل-كۇيى مەن بارلىق وي جۇيەسىن قيمىلى مەن سەكىرۋىنە ارنايدى. وسىلاي بولعانىنا سەندىك. اقتىق باسەكەدە الدىڭعى ناتيجەلەرى ءسال كەمشىندەۋ بولعاندىقتان, قاتتى ۋايىمدادىق. ءوزىنىڭ جوعارى ۇپايىن ەنشىلەپ, قولا مەدال الاتىنى بەلگىلى بولعاندا عانا يىعىمىزدان جۇك تۇسكەندەي, تىنىسىمىز كەڭىپ سالا بەردى. جىلادىق دەي المايمىن. انام قۋانعاننان كۇلە بەردى. ءبارىمىز قۋاندىق. ويتكەنى, ولگا وليمپيادا تۇعىرىندا قالدى. بىزگە ارادا سەكۋندتار وتپەي جاتىپ, قۇتتىقتاعان قوڭىراۋلار مەن سمس-تەر كەلە باستادى. كەيبىرەۋلەر تاعى دا سەكىرە مە دەپ سۇراپ جاتتى. اعايىندار مەن دوستاردىڭ بارلىعى جانكۇيەر بولىپ, قولداۋ كورسەتتى.
– ءسىز ولگاعا قالاي تۋىساسىز؟ ول كىشكەنتاي كەزىندە قانداي بولدى؟
– مەن ولگانىڭ تۋعان ءسىڭلىسىمىن. ۇيدە ەكەۋمىز وستىك. اكەمىز – جەڭىل اتلەتيكادان بالالاردى جاتتىقتىراتىن. باستاپقىدا ولگانى ۇيدە جالعىز قالدىرماۋ ءۇشىن وزىمەن بىرگە جاتتىعۋ زالىنا ەرتىپ اپارىپ ءجۇردى. ولگانى جاتتىعىپ جاتقان بالالاردىڭ اراسىنا قوسىپ قوياتىن. ول العاشقىدا وسىلايشا كوپشىلىكپەن بىرگە جۇگىرىپ, سەكىرىپ ءجۇردى. اتا-انامىز 9 جاسىندا جۇيەلى تۇردە اينالىسۋعا جەڭىل اتلەتيكاعا بەردى. ول ءوز قاتارلاستارىنىڭ اراسىنان سۋىرىلىپ شىقتى. وسىلايشا 15 جاسىنان باستاپ كاسىبي تۇردە شۇعىلدانۋعا دەن قويدى. 2007 جىلداردىڭ شاماسىندا جەڭىل اتلەتيكانىڭ وسى تۇرىنە بەت بۇردى.
– ءسىز دە سپورتشىسىز با؟
– جوق. دەنساۋلىعىم كەلمەيتىندىكتەن, سپورتپەن شۇعىلدانعان ەمەسپىن.
[caption id="attachment_56706" align="aligncenter" width="612"]
SONY DSC[/caption]
– ولگاعا سپورتتىق دارىن اكە جاعىنان كەلدى مە, الدە شەشەسى دە بۇل سالاعا بەيىم بە؟
– اكەمىز سپورتپەن شۇعىلدانعانىن, سپورتشىلاردى تاربيەلەگەنىن ايتتىم. انامىزدىڭ تابيعاتىندا دا سپورتتىق مىنەز-ق ۇلىق بار. ەڭ الدىمەن ادامنىڭ تابيعاتىندا قابىلەت بولۋى ءتيىس. سونان سوڭ سپورتتىق ساپا, توزىمدىلىك, شىدامدىلىق, جەڭىسكە قۇشتارلىق سىندى قاسيەتتەردى مەڭگەرۋ ءۇشىن تاستاي ءتارتىپ كەرەك. ءتارتىپ بولماسا, تالانتتى قاجەتتى ماقساتقا جۇمساي الماۋىڭ مۇمكىن. مىنە, ولگادان وسىنىڭ بارلىعى تابىلدى. ول كەرەك كەزدە ءوزىنىڭ بارشا قابىلەت-قۋاتىن ءبىر ماقساتقا جۇمىلدىرا الادى. سپورتتا دا, ومىردە دە وتە جاۋاپتى. وسى قاسيەتى ولگانى العا جەتەلەپ كەلەدى.
– ولگامەن ريو وليمپياداسىنداعى قولا جۇلدەسىنەن كەيىن سويلەسە الدىڭىزدار ما؟
– جوق, ءالى سويلەسە العان جوقپىز. ولگا جارىستان كەيىن دوپينگتىك باقىلاۋدان ءوتىپ جاتىر. وليمپيادا باعدارلاماسىنان ءالى بوساعان جوق. مەن وعان سمس-حابارلاما جازىپ جىبەردىم. بىراق ءالى جاۋاپ كەلمەدى. جەكە دارىگەرىمەن سويلەسكەنىمدە, اپكەمنىڭ وتە جوعارى كوڭىل-كۇيدە, قۋانىشتى, جاعدايى جاقسى ەكەنىن جەتكىزدى. وتانداستارىنا ىستىق سالەم جولداپ جاتقانىن ايتتى.
– اڭگىمەڭىزگە راحمەت! وليمپيادا جۇلدەسىمەن تاعى دا قۇتتىقتايمىز!
سۇحباتتاسقان دۋمان اناش.
