كارىم ءماسىموۆ ورىنبور وبلىسىنا جۇمىس ساپارىمەن باردى

قازاقستان پرەمەر-ءمينيسترى كارىم ءماسىموۆ 13 تامىز كۇنى رەسەي فەدەراتسياسىنىڭ ورىنبور وبلىسىنا جۇمىس ساپارىمەن باردى. pm.kz حابارلاۋىنشا, قازاقستان ۇكىمەتىنىڭ باسشىسى ساپار اياسىندا ورىنبور وبلىسىنىڭ گۋبەرناتورى يۋري بەرگپەن كەزدەسۋى جوسپارلانعان. شەكارا ماڭى ىنتىماقتاستىعى ماسەلەلەرى بويىنشا كەزدەسۋگە ەكى مەملەكەتتىڭ مەملەكەتتىك ورگاندارى, قوعامدىق ۇيىمدارى جانە ىسكەرلىك توپتارىنىڭ وكىلدەرى قاتىسادى. ءمالىم بولعانداي, 12 تامىزدا ەۋرازيالىق ۇكىمەتارالىق كەڭەس وتىرىسى اياسىندا قازاقستان پرەمەر-ءمينيسترى ك. ءماسىموۆتىڭ رەسەي فەدەراتسياسىنىڭ ۇكىمەتى توراعاسى د. مەدۆەدەۆپەن ەكىجاقتى كەزدەسۋى ءوتتى, ونىڭ بارىسىندا ەكونوميكالىق پروبلەماعا, شەكارا ماڭى ىنتىماقتاستىعى ماسەلەلەرىنە, ترانسشەكارالىق سۋمەن قامتاماسىز ەتۋ تاقىرىبىنا باسا نازار اۋدارىلدى. بىرقاتار ماسەلەلەر بويىنشا ولاردى بىرىگىپ شەشۋ جونىندە تۇبەگەيلى كەلىسىمدەرگە قول جەتكىزىلدى. ساپار بارىسىندا ك. ءماسىموۆ «ورىنبور گاز ءوندىرۋ» گاز وڭدەۋ زاۋىتىن, سونداي-اق بىرقاتار مادەني-تاريحي نىسانداردى, ورىنبور وبلىسىنىڭ مەملەكەتتىك مۇراعاتىن ارالايدى. ورىنبور وبلىسى – رف ەدىل ماڭى فەدەرالدى وكرۋگىنىڭ قۇرامىنا كىرەتىن رەسەي فەدەراتسياسىنىڭ ەڭ ءىرى ايماقتارىنىڭ ءبىرى. ايماعى – 124 مىڭ شارشى كم, حالقى – 2 033,1 مىڭ ادام. وبلىس سولتۇستىگىندە تاتارستانمەن, باشقۇرتستانمەن جانە چەليابى وبلىسىمەن, شىعىسى مەن وڭتۇستىگىندە – قازاقستانمەن, باتىسىندا – سامارا وبلىسىمەن شەكارالاسادى. قازاقستان رەسپۋبليكاسىمەن مەملەكەتتىك شەكاراسىنىڭ ۇزىندىعى 1 876 كم قۇرايدى. مۇرات ايتقوجا