– اقتىق جارىستا ماعان ەڭ سوڭعى سەگىزىنشى جولاقتا جۇزۋگە تۋرا كەلدى, –دەيدى دميتري. – راسىن ايتسام, العاشقىدا بۇل ماعان ۇنامادى. باسقالار ءبىر-بىرىمەن قارايلاس جۇزگەندە, قاتارىڭداعى قارسىلاسىڭدى كورمەي, جالعىز ءجۇزۋ قيىن سياقتانعان. كەيىن پايداسىن كوردىم. جالعىز جۇزگەندە, قارسىلاسىم قالاي ءجۇزىپ كەلەدى دەپ الاڭدامايدى ەكەنسىڭ, ويىڭدا تەك قانا كورسەتكىشىڭدى جاقسارتۋ عانا, بار كۇشىڭدى سوعان سالاسىڭ. مارەگە كەلگەندە قاراسام, مەنىڭ تۇسىمدا ءبىرىنشى دەگەن جازۋ جانىپ تۇر. باستاپقىدا باسىما كەلگەن وي, سوڭعى جولاقتا ءجۇزدىم, سوسىن جانىپ تۇر دەدىم. كەيىن وزگەلەر كەلىپ قۇتتىقتاي باستاعاندا عانا مارەگە ءبىرىنشى كەلگەنىمدى ءتۇسىندىم.
بۇل كۇنى ءۇمىتىمىز دزيۋدوشى ماكسيم راكوۆتا بولعان. دزيۋدو كۇرەسىنەن قازاقستان تاريحىنا العاش رەت الەم چەمپيوناتىنىڭ «التىنىن» الىپ بەرگەن سپورتشى تۋرالى جامان ايتۋعا ءتىلىمىز بۇرالمايدى.
«وسى جولى ايانبايدى», دەپ ەدى باپكەرى تالعات بايشولاقوۆ. كەيىنگى جىلدارى جولى وڭعارىلماي ءجۇردى, مۇمكىن وسى جولى دەپ ويلاعانىمىز راس. بولمادى. ءبىرىنشى بەلدەسۋىن شيدومەن ۇتتى. «ەكىنشىسىندە شيدومەن ۇتىلدى» دەپ قويا سالساق تا بولار ەدى, ەگەر ول ەسكەرتۋمەن ۇتىلعان چەح لۋكاش كراپەتياك سوڭىنان وليمپيادا چەمپيونى بولماعاندا. ال ەكەۋى كۇرەسكەندە بەلسەندىلىك راكوۆ جاعىندا بولعان.
رەفەريدىڭ كاللاسىندا قانداي وي بولعانىن قايدام, قايتا-قايتا تىرباڭداپ ءادىس جاساپ جاتقان ماكسيمگە ءبىر ەمەس, ەكى شيدو ۇستاتىپ جىبەردى دە, چەحتى سۋ تيگىزبەي كەلەسى كەزەڭگە وتكىزدى. قالاي قۇيمەيسىڭ. ماكسيمنىڭ اسۋىنان اسقان چەح چەمپيون بولىپ شىعا كەلدى.
سول كۇنى شارشى الاڭعا شىققان ءتورت بوكسشىمىزدىڭ بىرەۋى ورتا جولدا قالدى. قۇراماداعى ەڭ جاس اتلەت – ابىلايحان ءجۇسىپوۆتى داڭقتى بوكسشىمىز سەرىك ساپيەۆ قولا مەدالعا قول جەتكىزبەي تىزگىن تارتپايدى دەپ ەدى. جىرىندى اعىلشىن بوكسشىسى پەت ماككورماك الدىنا كەسە-كولدەنەڭ تۇرىپ, ءارى قاراي وتكىزبەدى. ابىلاي, ءسوز جوق, تالانتتى جىگىت. جىلدام. كلاسسيكالىق مانەردە بوكستاسادى. بىراق كورگەنى كوپ پەت ابىلايدىڭ ويىنداعىسىنىڭ بارىن وقىپ قويدى, الدىن الىپ وتىردى. بۇل ابىلاي ءۇشىن ۇلكەن ساباق بولۋعا ءتيىس. قايرات ەراليەۆ ۇنادى. قارسىلاسى – ازەربايجان دجاۆيد چەلەبيەۆپەن بۇدان بۇرىن, 2013 جىلى الماتى رينگىندە كەزدەسكەن. الەم چەمپيوناتىنىڭ جارتىلاي فينالىندا قوناقتىڭ جولى بولىپ كەتكەن. سوعان دەيىن قۇرىعاندا, ءوز ەلىنىڭ دە چەمپيونى دا بولىپ كورمەگەن, ەش اتاعى جوق چەلەبيەۆ باكۋگە الەم چەمپيونى بولىپ ورالعان. ال بۇل جولى قايرات وعان تۇك ىستەتپەدى. شارشى الاڭعا شاقىرىپ, قالاۋىنشا ۇردى. ونىڭ سوققىنى جاڭبىرداي جاۋدىرعان قارسىلاسىنا الدىرماي قويعانىنىڭ ءوزى ءبىر كەرىم. راسىن ايتساق, بۇگىنگى جانكۇيەرگە وسىنداي بوكس ۇنايدى. ءسويتىپ, قايرات كۇمانسىز ۇتتى.
بۇدان ءارى دانيار ەلەۋسىنوۆ پەن ادىلبەك نيازىمبەتوۆكە دە كەزەك كەلدى. ەكەۋى دە رينگتە وتە سەنىمدى ءجۇردى. دانيار ۇلىبريتانيالىق دجون كەلليدى ارتىق قيمىلعا جەتكىزبەدى. ۇنەمى بىرەر سوققىسى الدا ءجۇردى. مۇنىڭ ءبارى كوماندا كاپيتانىنىڭ تاكتيكانى دۇرىس ۇستانعانىن كورسەتتى. تاپ وسىنداي ءتاسىل بەلورۋس ميحايل دولگولەۆەتسپەن جۇدىرىقتاسقان ادىلبەكتىڭ دە بويىنان تابىلدى. سوندىقتان ەكەۋى دە جەكپە-جەكتەرىن 3:0 ەسەبىمەن اياقتاي ءبىلدى. بۇلار وسى كۇن 1/8 فينالدىق شايقاستارىن وتكىزسە, قايرات 1/16 فينالدا كۇش سىناستى. ەندى بۇلاردىڭ الدىڭعىلارى كەلەسى ۇرىستارىن ءساتتى وتكەرسە, مەدالگە قول جەتكىزە الادى.
ءۇمىت پەن كۇدىك تايتالاسقان ءبىر كۇن وسىلاي ءوتتى.
جۇلدەلەر جيىنتىعى
(12 تامىزداعى مالىمەت)
| № | قۇرامالار | التىن | كۇمىس | قولا | بارلىعى |
| 1 | اقش | 16 | 12 | 10 | 38 |
| 2 | قىتاي | 11 | 8 | 11 | 30 |
| 3 | جاپونيا | 7 | 2 | 13 | 22 |
| 4 | اۆستراليا | 5 | 4 | 6 | 15 |
| 5 | وڭتۇستىك كورەيا | 5 | 2 | 4 | 11 |
| 6 | ۆەنگريا | 5 | 1 | 1 | 7 |
| 7 | رەسەي | 4 | 8 | 7 | 19 |
| 8 | ۇلىبريتانيا | 4 | 6 | 6 | 16 |
| 9 | گەرمانيا | 4 | 3 | 1 | 8 |
| 10 | يتاليا | 3 | 6 | 3 | 12 |
| 11 | فرانتسيا | 2 | 4 | 5 | 11 |
| 12 | قازاقستان | 2 | 2 | 3 | 7 |
| 38 | ۋكراينا | 0 | 2 | 1 | 3 |
| 39 | ازەربايجان | 0 | 2 | 0 | 2 |
| 42 | گرۋزيا | 0 | 1 | 1 | 2 |
| 42 | ليتۆا | 0 | 1 | 1 | 2 |
| 48 | وزبەكستان | 0 | 0 | 2 | 2 |
| 42 | قىرعىزستان | 0 | 0 | 1 | 1 |
| 42 | ەستونيا | 0 | 0 | 1 | 1 |
ءراحيموۆتىڭ جەڭىسى
اتىراۋ جاستارى اراسىندا تويلانىپ ءوتتى
اتىراۋ جۇرتشىلىعى اۋىر اتلەت نيدجات ءراحيموۆتىڭ ءدۇبىرلى دودا الاڭىنا شىعار ءساتىن تاعاتسىزدانا توستى. بىلايعى جۇرتقا زىلدەي كورىنگەن شتانگانى بەلى قايىسپاي كوتەرەرىنە سەندى. تولاعايداي تارلان ۇل تەك اتىراۋلىقتاردىڭ عانا ەمەس, بارشا قازاقستاندىقتىڭ ءۇمىتىن اقتاعانىنا شىن جۇرەگىمەن قۋاندى. ءدال قازىر مۇنايلى ءوڭىر تۇرعىندارىنىڭ قۋانىشىندا شەك جوق. كوشەدە دە, قوعامدىق كولىكتە دە ءبىر-بىرىمەن قۋانىشىن بولىسۋشىلەر, ءتىپتى, «ەگەمەننىڭ» ءتىلشى قوسىنىنا دا تەلەفون شالۋشىلار كوپ. ەندى مۇنايلى ءوڭىر تۇرعىندارى نيدجات ءراحيموۆتىڭ ەلگە ورالۋىن اسىعا كۇتىپ وتىر. ەلدىڭ مەرەيىن تاسىتقان اقجولتاي قۋانىشقا قۋانعان جاستاردىڭ ءبىر شوعىرى «جايىق» سپورت كەشەنىنە جينالدى. ارالارىندا سپورتشىلار دا, قوعامدىق بەلسەندىلەر دە, ستۋدەنتتەر مەن جۇمىسشىلار دا بار. ماقساتتارى – قازاقستاننىڭ ەنشىسىنە العاشقى التىن مەدالدى سالعان نيدجات راحيموۆكە دەگەن ريزاشىلىعىن ءبىلدىرۋ, قۋانىشتى ءبولىسۋ. – نيدجات زىلتەمىر كوتەرۋگە شىققان ساتىندە تاقىمىمىزدى قىسىپ وتىردىق. سايىس سوڭىنا تاياعان تۇستا التىن مەدال قىتاي سپورتشىسىنىڭ ۋىسىندا جاتتى. سول ساتتە نيدجات تاۋەكەلگە بەل بۋىپ, 214 كيلو ءزىلتەمىردى كوتەرۋگە بەت الدى. ءسويتىپ, العاشقى تالپىنىسىندا العان مەجەگە 12 كيلو سالماق قوستى. ابىروي بولعاندا ونى ەڭسەرىپ كەتتى, دەدى بەيجىڭ جانە لوندون وليمپياداسىنا قاتىسقان تانىمال دزيۋدوشى رينات يبراگيموۆ. اتىراۋدا نيدجات سەكىلدى اۋىر اتلەتيكانى سەرىك ەتۋگە بەكىنگەن جاس بۋىن وكىلدەرى كوپ. سونىڭ ءبىرى – اناستاسيا بۋروۆا. سپورتتىڭ وسى ءتۇرىن تاڭداعانىنا 4 جىل بولعان ونىڭ جەتىستىگى از ەمەس. جاسوسپىرىمدەر اراسىندا ەل چەمپيونى اتانىپ ۇلگەرگەن. جاسوسپىرىمدەر اراسىندا وتكەن ەۋرازيا ويىندارىندا جۇلدەگەر دە بولعان. ەندى وليمپيالىق ويىندار چەمپيونى بولۋدى ارماندايتىن ول نيدجات ءراحيموۆتىڭ جەتىستىگى ءۇشىن قۋانىشتى ەكەنىن ايتادى. «وليمپيادا – سپورتشىلار ءۇشىن ەمتيحان. وسى سىندا جەرلەسىمىز مۇمكىن ەمەستەي كورىنەتىن رەكوردتى جاسادى. ءبىز ەندى نيدجاتتاي چەمپيون بولعىمىز كەلەدى», دەيدى ول. – نيدجاتتىڭ مىنەزىندە جەڭىسكە ۇمتىلىس پەن جىگەر باسىم, بۇل – سپورتشى ءۇشىن ەڭ باستى قاجەتتىلىك. ءبىز ونىڭ ەڭبەكقورلىعىنا قىزىعاتىن ەدىك. جانە وعان سەندىك. نيدجات ءۇمىتىمىزدى اقتادى, ەندى ونى اۋىر اتلەتيكاعا ىنتا تانىتاتىن جاستارعا ۇلگى ەتەمىز, – دەيدى قازاقستانعا كەلگەن كەزدە العاشقى جاتتىقتىرۋشىسى بولعان حالىقارالىق دارەجەدەگى سپورت شەبەرى تاحير حالماتوۆ. قازىر تاحير حالماتوۆ جاتتىقتىراتىن 11 جاسار احمەت فازىلوۆ پەن 12 جاستاعى نيكيتا ەفرەموۆ وليمپيادا چەمپيونى نيدجات ءراحيموۆتى ۇلگى تۇتاتىنىن جاسىرمايدى. «ءبىز دە وليمپيادا چەمپيونى بولعىمىز كەلەدى», دەيتىن قوس ورەننىڭ ءبىرى – نيكيتا قازىر قوسسايىستا 85 كيلو زىلتەمىردى كوتەرىپ ءجۇر. كىم بىلگەن, بالكىم, اتىراۋداعى اۋىر اتلەتيكا مەكتەبىنەن نيدجات سەكىلدى چەمپيوندار شىعىپ قالار... جولداسبەك شوپەعۇل, «ەگەمەن قازاقستان» اتىراۋ
ايبا ارۋى
بۇگىنگى كۇندە ريو-2016 وليمپياداسىنداعى بوكس دوداسىن قىزىقتاعان جۇرتتىڭ اۋزىندا – قازاقستاندىق ارۋ اربيتر ناتاليا تسويدىڭ ەسىمى. توتىدايىن تارانعان تورەشىنىڭ اسەم ءمۇسىنى, كوز سۋىرعان كەلبەتى, ەڭ باستىسى – ءوز ءىسىن جوعارى دەڭگەيدە مەڭگەرگەن كاسىبي بىلىكتىلىگى ادام بالاسىن وزىنە باۋراماي قويمايدى... ءبىزدىڭ كەيىپكەرىمىز قاراعاندىدا ورتا مەكتەپتى بىتىرگەن سوڭ, ومبىداعى ميليتسيا اكادەمياسىنا وقۋعا تۇسكەن. ەڭبەك جولىن قاراعاندىداعى ءىىم مەكتەبىندە باستاپ, كۋرسانتتارعا ءدارىس وقىدى. سويتە ءجۇرىپ, عىلىمعا دەن قويادى. كانديداتتىق ديسسەرتاتسياسىن ماسكەۋدەگى ءىىم عىلىمي-زەرتتەۋ ينستيتۋتىندا قورعاعان. رەسەيدە العان زاڭ عىلىمدارىنىڭ كانديداتى اتاعى كەيىنىرەك قازاقستاندا سەرتيفيكاتتان ءوتىپ, قۇقىقتانۋ دوكتورى دارەجەسىنە يە بولدى. پوليتسيا كاپيتانى شەنىن دە وسى جەردە قىزمەت ەتىپ ءجۇرىپ العان. وسىنىڭ بارىنە ول تازا ەڭبەك, تاباندى ىزدەنىسپەن جەتكەن ەدى. عىلىممەن اينالىسا ءجۇرىپ, ناتاليا تسوي برازيليا, ماروككو, قىتاي, رەسەي جانە قازاقستاندا وتكەن بوكس تۋرنيرلەرىنە تورەشىلىك جاساۋعا دا ۋاقىت تاپتى. 2012 جىلى ارۋ قىز قازاقستاننىڭ ەڭ ۇزدىك ءاربيترى اتانىپ, تورەشىلىك جۇمىسقا ءبىرجولاتا بەت بۇردى. قازىرگى تاڭدا ول ايبا-نىڭ ءۇش جۇلدىزدى شتريحى بار حالىقارالىق دارەجەدەگى تورەشىسى. ال بۇل سالادا الەم بويىنشا ەڭ جوعارى دەڭگەي – بەس جۇلدىزدى شتريحتى يەمدەنگەن جەتى-اق ادام بار ەكەن. بۇگىنگى كۇندە ولاردىڭ ءبارى دە ايبا-دا نۇسقاۋشى بولىپ قىزمەت ەتەدى. «بالا كەزىمدە ءسان بيىمەن اۋەستەندىم, – دەيدى ناتاليا تسوي. – كەرەمەت ۇنايتىن, بيگە يكەمىم دە بولدى. سەرىكتەسىم ەكەۋمىز جۇپتاسىپ, بىرقاتار جارىستاردا جۇلدە الىپ تا جۇردىك. ءسويتىپ جۇرگەندە, ول باسقا جاققا كەتىپ قالدى. ال مەنىڭ اڭسارىم بىرتىندەپ سپورتقا, ونىڭ ىشىندە جەكپە-جەك تۇرلەرىنە اۋا باستادى. 11-سىنىپتا جۇرگەنىمدە كەش تە بولسا تاەكۆوندوعا باردىم. اراسىندا كيكبوكسينگتىڭ قىر-سىرىمەن دە تانىسا ءجۇردىم. ءسويتىپ ءجۇرىپ, اقىرى قىزدار بوكسىنا كەلدىم». بوكستاعى جاتتىقتىرۋشىسى اتاقتى ەدۋارد ماتروسوۆ بولدى. ەڭ العاشقى ءىرى جارىسى – 2005 جىلى وتكەن قازاقستان چەمپيوناتىندا ءبىرىنشى ورىن الىپ, «سپورت شەبەرى» اتاعىنا قول جەتكىزدى. 2006 جىلى بوكستان كەتكەننەن كەيىن تورەشىلىك قىزمەتتە باعىن سىناپ كوردى. العاش رەت عالىم جارىلعاپوۆتى ەسكە تۇسىرۋگە ارنالعان تۋرنيردە قازىلىق ەتىپ, وزىنە بەيتانىس الەمنىڭ تابالدىرىعىن يمەنە اتتاعان. مىنە, وسىدان كەيىن جولى اشىلىپ, باعى جانىپ جۇرە بەردى. ءۇندىستاندا وتكەن قىزدار اراسىنداعى الەم چەمپيوناتىنا, پولشا مەن رەسەيدەگى حالىقارالىق تۋرنيرلەرگە شاقىرتۋ الدى. جەكپە-جەككە تورەلىك ەتۋ ايتقانعا عانا وڭاي. ماسەلەن, كەيدە قىزۋقاندى جانكۇيەرلەر قۇلاق تۇندىرار قيقۋعا باسىپ, ءوز بوكسشىسىنا ولەرمەندىكپەن قولداۋ كورسەتىپ جاتادى. مۇندايدا سەلت ەتىپ, سىر بەرسەڭ – وپىق جەگەنىڭ! كەيدە بوكسشىنىڭ اتاق-داڭقى دا كوڭىلدى ۇيقى-تۇيقى ەتىپ كەتۋى ابدەن مۇمكىن. ال كەيبىر جاعدايدا ءبىرىنشى رازريادتى بوكسشى سپورت شەبەرىن ۇتىپ كەتىپ جاتادى. بيىل ناتاليا تسويعا ۇلكەن سەنىم ارتىلىپ, ول استانادا وتكەن قىزدار اراسىنداعى الەم چەمپيوناتىندا تورەلىك ەتۋ باقىتىنا يە بولدى. قارا قىلدى قاق جارعان ادىلدىگىمەن كوزگە ءتۇسىپ جۇرگەن ارۋ قىز بۇل سىننان سۇرىنبەي ءوتتى. تورەشىلەر اراسىنداعى چەمپيوناتتىڭ گ ۇلى بولدى دەسەك تە بولادى. ناتيجەسىندە ول ريو وليمپياداسىندا قىزىلىق ەتۋ مارتەبەسىنە يە بولىپ, ءدال قازىرگى ۋاقىتتا ءوزىنىڭ جۇلدىزدى شاعىن باستان كەشۋدە. ازيادان تۇڭعىش بولىپ ايبا تورەشىسى اتانعان ارۋ قىزدى قاراعاندىلىق جەرلەستەرى ورىندى ماقتان ەتەدى. قايرات ءابىلدينوۆ, «ەگەمەن قازاقستان» قاراعاندىەرماحان ىبىرايىموۆ: «بوكسشىلارىمىزدىڭ چەمپيون بولۋعا مۇمكىندىگى بار»
سيدنەي وليمپياداسىنىڭ چەمپيونى, داڭقتى بوكسشى ەرماحان ىبىرايىموۆ ريو-دە-جانەيرو قالاسىندا ءوتىپ جاتقان وليمپيادادا ءبىزدىڭ بىلعارى قولعاپ شەبەرلەرىنىڭ التىن مەدال الۋعا مۇمكىندىگى بار ەكەنىن ايتتى. سونداي-اق, ول اسا اۋىر سالماقتاعى يۆان دىچكونىڭ ازەربايجان بوكسشىسى ماگومەدراسۋل مەدجيدوۆتى جەڭە الاتىنىنا دا سەنىم ءبىلدىردى. – بيىلعى وليمپياداعا ەلىمىزدىڭ ۇلتتىق قۇراما كومانداسى جاقسى دايىندالدى. سپورت, بوكس بولعان سوڭ, جەڭىستەرمەن بىرگە جەڭىلىستەر دە بولادى. بۇل بارلىق سپورتشىلاردىڭ باسىنان وتەتىن جاعداي. الدىمەن بەرىك ءابدىراحمانوۆ, ءبىرجان جاقىپوۆ, ابىلايحان ءجۇسىپوۆ تۋرالى ايتسام, ولاردىڭ قارسىلاستارى جەڭىستى ج ۇلىپ اكەتتى. ۇشەۋىنىڭ دە قارسىلاستارى جىلدام ءارى سەرگەك بولىپ كورىندى. بەرىكپەن شارشى الاڭدا قولعاپ تۇيىستىرگەن بوكسشىنىڭ تەحنيكاسى جاقسى ەكەن. ءابدىراحمانوۆتىڭ بۇل سوڭعى مۇمكىندىگى ەدى. ول سونى پايدالانا المادى. بوكسشى وزىنە سەنىمسىزدەۋ سياقتى كورىنسە, قارسىلاسى سونى بايقاپ, جەڭىسكە جەتۋگە تىرىسادى. ءبىرجان جاقىپوۆ بوكسشى ءۇشىن جاس ەمەس. وليمپيادا, باسقا جارىستار بولسىن 49 كيلوعا دەيىنگى سالماق دارەجەسىندە نەگىزىنەن جاستار ونەر كورسەتەدى. حاسانبوي دۋسماتوۆتى ءبىرجاننان تىم جاس دەپ ايتا المايمىن. دەگەنمەن, ول جاقىپوۆتان جىلدام كورىندى, – دەدى ول. سونىمەن بىرگە, ەرماحان ىبىرايىموۆ بيىلعى وليمپيادا ابىلايحان ءجۇسىپوۆتىڭ ءتورت جىلدا ءبىر كەلەتىن دوداداعى العاشقى جارىسى بولعانىن, ەندى ونىڭ وسى قارقىننان تايماي, تەك العا ءجۇرۋ كەرەكتىگىن ايتتى. «ابىلايحان الداعى كەزدە تاجىريبەسىن ارتتىرا بەرسە, كەلەسى وليمپيادادا جۇلدەگە تالاسا الادى», دەيدى ول. سيدنەي وليمپياداسىنىڭ چەمپيونى وزىنە ۆاسيلي لەۆيتتىڭ بوكسى ۇناعانىن جاسىرمادى. ول لەۆيتتىڭ التىن جۇلدە الۋعا بارلىق مۇمكىندىگى بار ەكەنىن, جارتىلاي فينالدا كۋبالىق ەريسلاندي ساۆوندى جەڭۋگە كۇش سالاتىنىن ايتتى. «بۇل جەكپە-جەك لەۆيت ءۇشىن وڭاي بولمايدى. مەنىڭ ويىمشا, بوكسشىمىز فينالعا شىعۋ ءۇشىن بارىن سالادى. وليمپيادا – نە بۇك, نە شىك بولاتىن جارىس. وليمپياداعا كەلدىڭ بە, سوعان قاتىسىپ جاتىرسىڭ با, سوڭىنا دەيىن كۇش-جىگەرىڭدى جۇمساۋ كەرەك. قازىر لەۆيت جارتىلاي فينالعا شىعىپ, مەدال الىپ تۇر. دەسەك تە وعان بۇل از. ول سونى تۇسىنەدى», دەيدى ىبىرايىموۆ. سول سياقتى ول دانيار ەلەۋسىنوۆ, ادىلبەك نيازىمبەتوۆ, ءجانىبەك ءالىمحان ۇلى مەن يۆان دىچكونىڭ مەدال الاتىن جاقسى مۇمكىندىكتەرى بار ەكەنىن ەسكەرتتى. «بۇل جىگىتتەردىڭ ءبارى تاجىريبەلى بوكسشىلار. ولار التىن مەدال الا الادى», دەيدى ول. ال يۆان دىچكو مەن ماگومەدراسۋل مەدجيدوۆتىڭ كەزدەسۋى تۋرالى بوكس مامانى مىنانى ايتتى. – ەكەۋى وسىمەن ءۇشىنشى رەت كەزدەسەيىن دەپ جاتىر. العاش رەت 2011 جىلى باكۋدە وتكەن الەم چەمپيوناتىندا ايقاسقان ەدى. سول كەزدە مەدجيدوۆ دىچكونى جەڭگەن. ودان كەيىن 2013 جىلى الماتىدا وتكەن الەمدىك دودادا ازەربايجان تاعى دا ۇتتى. ەندى ءۇشىنشى كەزدەسۋدە يۆان وزىنە ارتىلعان سەنىمدى اقتاپ شىعادى دەيمىن. قازىر ونىڭ تاجىريبەسى تولىسقان, دەنە ءبىتىمى دە قارسىلاسىمەن كەلىسكەن. وسى جەكپە-جەكتە دىچكو جەڭەدى دەپ ويلايمىن, – دەدى ەرماحان ىبىرايىموۆ. داستان كەنجالين, «ەگەمەن قازاقستان» بەت قاتتالىپ جاتقاندا: وليمپيادادا 75 كيلوعا دەيىنگى سالماق دارەجەسىندە سىنعا ءتۇسىپ جاتقان جانىبەك ءالىمحان ۇلى كەزەكتى جەڭىسكە جەتىپ, شيرەك فينالعا شىقتى. بۇل جولى ول الجيرلىك يلياس ءابباديدى 3:0 ەسەبىمەن ايقىن جەڭدى.
