جاس ۇرپاق دەنساۋلىعى

ەل بولاشاعى ءۇشىن ماڭىزدى ءبىلىم جانە عىلىم مينيسترلىگىنىڭ تاپسى­رىسى بويىنشا اعىمداعى جىلدىڭ ەكىنشى توقسانىندا «جاستار» عىلىمي-زەرتتەۋ ورتالىعى «جاستار اراسىنداعى سالاماتتى ءومىر سالتىن قالىپتاستىرۋ» تاقىرىبىندا ەلىمىزدىڭ جاستارى اراسىندا الەۋمەتتىك ساۋال­ناما جۇرگىزدى. ساۋالناماعا قازاقستان بويىن­شا 14 جاستان 29 جاسقا دەيىنگى ارالىقتاعى 2000 رەسپوندەنت قاتىستى. ءبىر اپتا ىشىندە ساۋالناماعا قاتىسقان 14 جاستان 18 جاس ارالىعىنداعى جاس­تاردىڭ 85%-ى دەنەشىنىقتىرۋمەن اينالىس­قاندىقتارى انىقتالدى. ال 24 جاستان 29 جاسقا دەيىنگى ارالىقتاعى جاستاردىڭ 71%-ى سپورتپەن شۇعىلدانادى. مادەنيەت جانە سپورت مينيسترلىگىنىڭ دەرەكتەرى بويىنشا, سپورتپەن شۇعىلداناتىن جاستار سانىنىڭ كورسەتكىشى جىل سايىن ارتۋدا. مىسالعا, 2014 جىلى 2012 جىلمەن سالىستىرعاندا دەنەشىنىقتىرۋمەن اينالىساتىن ادامداردىڭ سانى 3,5%-عا نەمەسە 0,7 ميلليون ادامعا ارتقان. بۇگىندە مەكتەپ جاسىنداعى بالالاردىڭ 90%-نا جالپى ءبىلىم بەرەتىن مەكتەپتەردىڭ سپورت زالدارىندا دەنەشىنىقتىرۋمەن جىل بويىنا اينالىسۋلارىنا مۇمكىندىك جاسالعان, 26%-نا قىسقى سپورت تۇرلەرىمەن اينالىسۋعا جاعداي جاسالعان. 125 جوعارى وقۋ ورنىندا 113 سپورت كلۋبى مەن شامامەن 2 مىڭ سەكتسيا قىزمەت كورسەتەدى. ەلىمىزدىڭ دەنەشىنىقتىرۋ مەن سپورت سالاسى جاستاردىڭ سالاماتتى ءومىر سالتىن ۇستانىپ, فيزيكالىق بەلسەندىلىكتەرىن ارتتىرۋعا باعىتتالعان. ارنايى جاستار ءۇشىن سپورت ورتالىقتارىنا بارۋعا جەڭىلدىكتەر قاراستىرىلعان, جىل سايىن 40 حالىقارالىق جانە رەسپۋبليكالىق شارالار وتكىزىلەدى, سونىمەن قاتار, سپورت ينفراقۇرىلىمى دا ەكپىندەپ دامۋدا. قازاقستانداعى سپورت مادەنيەتىنىڭ دامۋىنىڭ ءبىر دالەلى رەتىندە ەلىمىز سپورتشىلارىنىڭ ريودا كورسەتىپ جاتقان تاماشا ونەرلەرىن ايتۋعا بولادى. نۇرگۇل نۇرماعامبەت, «جاستار» عىلىمي-زەرتتەۋ ورتالىعىنىڭ ساراپشىسى