شەبەرلىگىن شىڭدادى

وتاندىق بالەت جۇلدىزى, «استانا وپەرا» تەاترىنىڭ جەتەكشى ءسوليسى باقتيار ادامجان سەۋلدە وتكەن XIII حالىقارالىق بي بايقاۋىندا جەڭىسكە جەتتى. ءارتىس «كلاسسيكالىق بي» ساناتى بويىنشا ەرلەر اراسىنداعى ەرەسەكتەر توبىندا ۆيرتۋوزدىق تەحنيكاسىمەن جانە كاسىبي شەبەرلىگىمەن كوزگە ءتۇسىپ, كورەرمەندەردى تاڭعالدىردى ءارى قازىلاردىڭ دا كوڭىلىنەن شىعا ءبىلدى. ناتيجەسىندە, 1-ءشى ورىنعا يە بولدى. 6-10 تامىز ارالىعىندا كورەي ۇلتتىق تەاترىنا دۇنيە ءجۇزىنىڭ بەلدى بالەت ارتىستەرى جينالدى. وندا 11 جاستان 35 جاسقا دەيىنگى بيشىلەر ءۇش سانات بويىنشا باق سىنادى. ولار: كلاسسيكالىق, قازىرگى زامانعى جانە حالىق ءبيى. باقتيار ادامجان شىلدە ايىن­دا ىستانبۇل قالاسىندا وتكەن بالەت ارتىستەرىنىڭ V حا­لىقارالىق كونكۋرسىندا باس جۇلدەنى يەلەنىپ, ەلىنە جەڭىسپەن ورالعان ەدى. كەيىن ءبىر اپتالىق دەمالىستان كەيىن ول سەۋلدەگى بايقاۋعا قاتىسۋ ءۇشىن بىردەن دايىندىققا كىرىسەدى. ءارتىس كلاسسيكالىق بالەتتەردەن ل.مين­كۋستىڭ «بايادەركاسىن», ب.اسافەۆتىڭ «پاريج جالىنىن», تس.ءپۋنيدىڭ «ەسمەرالداسىن», سونىمەن قاتار, قىتايلىق حورەوگراف يسيان چجاننىڭ قويى­لىمىنداعى «ويانۋ ساتىندە» (In the wake) اتتى زاماناۋي تۋىندىسىن ساحناعا شىعارادى. ءبيشىنىڭ پىكىرىنشە, جوعارى دەڭگەيدە ونەر كورسەتۋ ءۇشىن, ەڭ الدىمەن, جاقسى كوڭىل-كۇي جانە فيزيكالىق دايىندىق قاجەت ەكەن, سول سەبەپتى, ول كون­كۋرس بارىسىندا ءدال وسى قاعي­دانى باسشىلىققا الىپتى. سونىمەن قاتار, باقتيار ادام­جان كونكۋرس اياسىندا جوعارى كاسىبي تەحنيكالىق دەڭ­گەيىمەن ەرەكشەلەنەتىن كورەي بالەت مەكتەبىمەن جاقىنىراق تانىسۋعا مۇمكىندىك العانىن, بۇل ونىڭ كاسىبي تۇرعىدا شىڭدالا تۇسۋىنە ىقپال ەتكەنىن ايتادى. ال بايقاۋدىڭ قازىلار القاسىنىڭ قۇرامىندا «اس­تانا وپەرا» تەاترى بالەت ترۋپ­پا­سىنىڭ ديرەكتورى, قازاق­ستاننىڭ ەڭبەك سىڭىرگەن قايراتكەرى تۇرسىنبەك نۇرقاليەۆ تە بولىپتى. بالەتمەيستەر الەم­دىك بالەت ەليتاسىن شىڭ­داعان جوباعا قاتىسۋ ۇلكەن قۇرمەت ءارى جاۋاپكەرشىلىك ەكەنىن جەتكىزدى. «ءبىزدىڭ ارتىستەرىمىزدىڭ شىعارماشىلىق الەۋەتى جوعارى, بۇل ولاردىڭ الدىڭعى قاتارلى الەمدىك ساحنالاردا تابىستى ونەر كورسەتۋلەرىنە, ايتۋلى بايقاۋلاردا جۇلدەلى ورىندارعا يە بولۋلارىنا مۇمكىندىك بەرىپ كەلەدى. ونەرپازدارىمىزدىڭ تابىستارى, ولاردىڭ كاسىبي شەبەرلىكتەرى مەن بالەت ونە­رىنە دەگەن سۇيىسپەنشىلىگى مەنى ايرىقشا تەبىرەنتتى. حالىق­ارالىق دەڭگەيدەگى مامان­داردىڭ قازاقستاندىق ءارتىس­تەرگە بەرگەن باعاسى دا جوعا­رى. بۇل وتانىمىزعا دەگەن ماقتانى­شىمىزدى مولايتا تۇسكەندەي بولدى», – دەيدى تۇرسىنبەك نۇرقاليەۆ. ءلايلا ەدىلقىزى, «ەگەمەن قازاقستان»