نۇريلانىڭ جەڭىسى

قىتايدىڭ از ۇلت وكىلدەرى اراسىنداعى «تۇلپار» ادەبيەت سىي­لىعىنىڭ 2016 جىلعى يە­گەرلەرىنىڭ ەسىمدەرى بەلگىلى بولدى. 1981 جىلدان بەرى 3 جىلدا ءبىر ۇيىمداستىرىلىپ كەلە جاتقان بۇل مارتەبەلى بايقاۋ بيىل 11 رەت وتكىزىلىپ وتىر. بۇل جولى ەسىمى قىتايدا عانا ەمەس, دۇنيەجۇزى قازاقتارىنا بەلگىلى اقىن, جازۋشى, ەتنوگروف نۇري­لا قىزىحانقىزى «تۇلپار» سىيلىعىنىڭ يەگەرى اتاندى. بۇعان دەيىن قالامگەر «قا­زاق­تىڭ اڭشىلىق قۇرال-ساي­ماندارى مەن ءادىس-امالدارى» دەگەن ماقالاسىمەن جانە «ءلاي­لا» پوۆەسىمەن قازاق-قىرعىز «تۇل­پار» سىيلىعىن العان بولاتىن. ال «بورانداعى كوش» پوۆەسى تيان-شيان ادەبيەت-كوركەمونەر سىيلىعىن يەلەنگەن. نۇريلا قىزىحانقىزىنىڭ ايتۋىنشا, ادەبيەتتىڭ ءتۇرلى جانرلارى بويىنشا از ۇلت وكىل­دەرى اراسىندا وتەتىن «تۇل­پار» ادەبيەت سىيلىعىنا ءوز شىعارمالارىن العاش رەت ۇسىنعان. «رومان», «اڭگىمەلەر مەن پوۆەستەر جيناعى», «شال­قىما», «پوەزيا», «وچەرك», «اۋدارما» اتالىمدارى بويىنشا «تۇلپار» سىيلىعىن يەلەنگەن 28 ادامنىڭ ىشىندە ول جالعىز قازاق بولىپ وتىر. – «تۇلپار» سىيلىعىن مەن «اڭگى­مەلەر مەن پوۆەستەر جيناعى» اتالىمى بويىنشا الىپ وتىرمىن. جەڭىمپاز اتانعان «باقىتتىڭ يەسى» دەگەن كىتابىم «كۇيتىن» باسپاسىنان شىققان. وعان ءتورت پوۆەست پەن ونشاقتى اڭگىمەم ەنگەن ەدى, – دەيدى ول. بۇعان دەيىن بۇل ماراپاتتى ءدال وسى اتالىم بويىنشا 2012 جىلى جازۋشى ورازحان احمەتوۆ «تۇلپاردىڭ سوڭعى تۇياعى» اتتى پوۆەستەر جيناعى ءۇشىن يەلەنگەن بولاتىن. ەرلىك ەرجان ۇلى, جۋرناليست الماتى