اقپارات جانە كوممۋنيكاتسيالار مينيسترلىگى سايتىندا «شاعىمدانۋ» ءبولىمى اشىلدى

ەندى كەز-كەلگەن ازامات قازاقستان زاڭناماسىنا قايشى كەلەتىن اقپاراتتىڭ جاريالانعانى تۋرالى حابارلاماسىن مينيسترلىك سايتىنىڭ وسى بولىمىنە قالدىرا الادى. قوعامداعى تۇيتكىلدى ماسەلەلەر سانالاتىن تەرروريزم مەن ەكسترەميزمگە, قاتىگەزدىك پەن ۇلتارالىق جانجالعا ۇندەگەن توپتارعا جانە الەۋمەتتىك جەلىدەگى ءسۋيتسيدتى, ەسىرتىكنى ناسيحاتتاعان سايتتارعا قاتىستى زاڭ بۇزۋشىلىق ارەكەتتەردى بايقاسا, ماتەريالدىڭ سىلتەمەسىن ەنگىزىپ, شاعىمىن ۋاكىلەتتى ورگانعا جولداۋعا مۇمكىندىك بار. مينيسترلىك ءاربىر شاعىم بويىنشا جەدەل ارەكەت ەتىپ, جاريالانعان ماتەريالدارعا قۇقىقتىق باعا بەرەتىن بولادى. ەگەر زاڭ بۇزۋشىلىق ايقىندالسا, ولار ەلىمىزدىڭ اۋماعىندا بۇعاتتالادى. «بىزگە جۋرناليستەر تاراپىنان قانداي دا ءبىر رەسۋرستىڭ نە سەبەپتى بۇعاتتالعانى تۋرالى ساۋال ءجيى تۇسەدى. وسى ورايدا ءبىز مۇنداي اقپارات قوعام ءۇشىن اشىق بولۋى كەرەك دەپ سانايمىز. سوندىقتان الداعى ۋاقىتتا رەسۋرستاردىڭ جابىلۋ سەبەبىن كورسەتە وتىرىپ, بۇعاتتالعان سىلتەمەلەر بازاسىن قۇرۋدى جوسپارلاپ وتىرمىز», – دەيدى اقپارات جانە كوممۋنيكاتسيالار ءمينيسترى داۋرەن اباەۆ.