ءبىر كۇندە – 2 التىن, 1 كۇمىس مەدال
قازاقستان قورجىنىنا وسىنشاما جۇلدە ءتۇستى
الەكسەي ني ءبىر التىن مەن ءبىر كۇمىس الامىز دەگەندە, «ەگەمەن قازاقستانعا» ونىڭ بولجامعا باتىل ادام ەكەنىن جازعانبىز. باس جاتتىقتىرۋشى ءبىزدى قاتتى تاڭ قالدىردى. ايتقانى ايداي كەلدى. التىندى دا الدى, كۇمىستى دە الدى. اۋليە دە ءوزى ەكەن, دانىشپان دا ءوزى ەكەن. باسقاشا قالاي ايتاسىڭ. ءبىزدىڭ ۇل مەن قىزدىڭ, باسقاسىن بىلاي قويعاندا, قىتايلىق قارسىلاستارىنىڭ الدى – الەمنىڭ ءۇش دۇركىن چەمپيونى, وليمپيادانىڭ چەمپيوندارى. الەمنىڭ رەكوردتارىن قالاۋىنشا وزگەرتىپ جۇرگەن سايىپقىراندار. سوعان قارسى ءبىر دۇركىن الەم چەمپيونى جانە ەكى دۇركىن كۇمىس جۇلدەگەرمەن قارسى تۇرماقشى. قولىندا وسىنداي قارۋ بولسا, ەشقانداي جاتتىقتىرۋشى اسىلىق ءسوز ايتپاس ەدى. الدىمەن قىزداردىڭ سايىسى باستالدى. قىتايلىقتار ءبىزدىڭ قىزدى باعۋدا. ارميان قىزى نازيگەن اۆداليان 107 كيلومەن توقتادى. وسى سالماقتى ەكىنشى كەزەگىندە باعىندىرعان سارا احماد ەندى شىعاتىن ەكەۋىن كۇتتى. جازيرا 110 كيلونى قينالماي الدى. سارا 112 كيلونى كوتەرىپ كەتتى. الدىندا 120 كيلوعا تاپسىرىس بەرگەن سيان 113 كيلونى باعىندىردى. اقىرىندا جازيرا ەكەۋى عانا قالدى. ءبىزدىڭ قىز 115 كيلونى ءبىر تولعاپ توبەسىندە ويناتقاندا, كۇمىس مەدالدىڭ قالتامىزدا ەكەنىن ۇقتىق. سيان تاعى ءبىر كيلوعا ارتىق تاپسىرىس بەردى. كوتەردى. ءبىزدىڭ قىزدىڭ 117 كيلوعا شاماسى جەتىڭكىرەمەي قالدى. سوڭعى كەزەگىندە سيان 118 كيلونى كوتەرىپ جاتىپ موينىنا ءتۇسىرىپ الدى. ناعىز جانى ءسىرى ەكەن, تەز وزىنە كەلدى. ءسويتىپ, جۇلقا كوتەرۋدەن 1 كيلو ارتتا قالدىق. قورقىنىشتى ەمەس سياقتى. ويتكەنى, الەكسەي ني جازيرانىڭ جاتتىعۋدا 150 كيلونى ەركىن الاتىنىن ايتقان. مىنە, جاتتىقتىرۋشىنىڭ ەسەبى قايدا جاتىر؟ احمەد سارا مەن لەدي سوليس 140 كيلودان اسا المادى. جازيرا شىقتى. كەم دەگەندە, كۇمىس قولىندا ەكەندىگىن بىلەدى. قىرسىق شالعاندا, 140 كگ. زىلتەمىردى ىرقىنان شىعارىپ الدى. ارمانداپ وتىرعان «التىنىمىزدىڭ» اۋىلى الىستاپ بارا جاتقانىن وسى كەزدە ۇقتىق. ەندى ءبارى كەش. كەۋدەسىنەن جانى شىعىپ كەتپەسە, الەم رەكوردشىسى ەندى ەسە بەرمەيدى. سولاي بولدى. جازيرا 140 كيلونى ەكىنشى كەزەكتە العاندا, سيان 142 كگ. كوتەردى. جازيرا سوڭعى كەزەگىندە 144 كيلو كوتەرگەندە, ول كوپ قينالماستان 145-ءتى كوتەردى. سيان – وليمپيادا چەمپيونى. ەندى ول جانىن قيناعان جوق. 147 كيلوعا تاپسىرىس بەرگەنىمەن, كەۋدەگە اپارىپ تاستاپ جىبەردى. قوسسايىس قورىتىندىسى بويىنشا سيان يانمەن 261 كگ., جازيرا 259 كگ., ەگيپەت قىزى سارا احمەد 256 كيلو جيناپ, ءۇش مارتەبەلى ورىندى پىشاق ۇستىنەن ءبولىپ الدى. جازيرا جىبەرگەن ەسەنى ءۇش ساعاتتان كەيىن 77 كگ. سالماقتاعى نيدجات راحيموۆ قايتارعانداي بولدى. بۇل جارىستى ەل تەلەارنادان كوردى عوي, ءبىز كورە, ەستي الماعاندارعا ايتايىق. – نيدجات – قىتاي اتلەتى, وليمپيالىق ويىندار مەن الەم چەمپيونى, رەكوردشىسى ليۋيدان جۇلقا كوتەرۋدە 12 كگ., ارميان اندرونيك كاراپەتياننان 9 كيلو ارتتا قالعاندا, ءبىزدى ويشا جەرلەگەندەر كوپ بولدى, – دەدى الەكسەي ني جۋرناليستەرمەن كەزدەسكەندە. – ءۇشىنشى ورىن الادى دەپ ويلادى. بىزگە كەرەگى دە وسى ەدى. جۇلقا كوتەرۋدەگى ەسەمىزدى سەرپەدەن الۋعا تىرىستىق. ءبىز كوز الداۋ ءۇشىن ادەيى 202 كيلوعا تاپسىرىس بەردىك. قىتايلىقتار ءبىزدىڭ شامامىز وسىعان عانا كەلەدى دەپ ويلادى. سوندىقتان تومەن تاپسىرىس بەردى. بىراق 197 كيلوعا بەرگەن العاشقى كەزەگىن الا الماعانى جوسپارىمىزدى بەكىتە ءتۇستى. مەن نيدجاتتىڭ الدىندا باس يەمىن. ماعان ۆا-بانككە بارۋ ءۇشىن اتلەتىمىزدىڭ بارلىق جاعىنان دايىندىعى كەرەك. ول جاتتىعۋ بارىسىندا 214 كيلونى كوتەرىپ كورگەن ەمەس.سول ءۇشىن دە ناعىز جاۋىنگەر, تۋما تالانت ءارى دانىشپان. ءبارىن ءتۇسىندى, اقىل تارازىسىنا سالدى, تاۋەكەلگە باردى. سول قاسيەتى ءۇشىن وعان شەكسىز رازىمىن. راسىندا قىتايلىقتار التىن مەدال ءبىزدىڭ قولدا, ەندى وعان تالاسۋعا ەشكىمنىڭ شاماسى كەلمەيدى دەپ ارقاسىن كەڭگە سالىپ تۇرعاندا, ءبىزدىڭ شتاب اۋىزىنداعىسىن جىرىپ كەتتى. مۇنداي جاعدايدى ەشكىم كۇتپەدى. جۋرناليستەرگە ارنالعان ورىندا وليمپيادا چەمپيونى نيدجاتپەن دە, كۇمىس ءجۇلدەگەر جازيرامەن دە ارمانسىز سۇحباتتاستىق. جازيرا ءوز قاتەلىگىنەن توكيو وليمپياداسىندا قورىتىندى شىعارماقشى. «التىن الماي ەلگە قايتپايمىن» دەدى. تۇسىنە بىلگەنگە بۇل اسقان جاۋاپكەرشىلىك. – مەن جۇلقا كوتەرۋدە نەگىزگى قارسىلاستارىمنان كوپ قالىپ كەتتىم, – دەيدى نيدجات. – ونىڭ ەسەسىن سەرپە كوتەرۋدەن قايتارۋ كەرەك بولدى. سوندىقتان, باپكەرلەرگە ءبىرىنشى كەزەكتە مەدال ءۇشىن كوتەرىپ, ەكىنشى كەزەڭنەن باستاپ التىن الاتىن سالماقتى كوتەرۋگە دايىن بولاتىنىمدى ايتىم. چەمپيون ەكەنىمدى ءبىلدىم دەپ وتىرىك ايتا المايمىن, بىراق, ىشكى تۇيسىگىم كۇشىمە سەندىردى. مەن ماعان سەنىم ارتقان باس جاتتىقتىرۋشى الەكسەي نيگە, ەنۆەر تۇركەلەريگە, ءۇش جىل بويى تۋعان باۋىرىنداي بار جاعدايىمدى جاساعان اتىراۋ حالقىنا, بارلىق جانكۇيەرلەرىمە ءۇلكەن راحمەت ايتامىن. بۇل – مەنىڭ عانا جەڭىسىم ەمەس, ماعان سەنگەن بارشا قازاقستاندىقتاردىڭ جەڭىسى. «ەگەمەن قازاقستاننىڭ» ارناۋلى ءتىلشىسى باقتيار تايجان ريو-دە-جانەيرودان حابارلايدىجۇلدەلەر جيىنتىعى
(11 تامىزداعى مالىمەت بويىنشا)
| № | قۇرامالار | التىن | كۇمىس | قولا | بارلىعى |
| 1 | اقش | 11 | 11 | 10 | 32 |
| 2 | قىتاي | 10 | 5 | 8 | 23 |
| 3 | جاپونيا | 6 | 1 | 11 | 18 |
| 4 | اۆستراليا | 5 | 2 | 5 | 12 |
| 5 | ۆەنگريا | 5 | 1 | 1 | 7 |
| 6 | رەسەي | 4 | 7 | 4 | 15 |
| 7 | وڭت. كورەيا | 4 | 2 | 3 | 9 |
| 8 | يتاليا | 3 | 6 | 2 | 11 |
| 9 | ۇلىبريتانيا | 3 | 3 | 6 | 12 |
| 10 | فرانتسيا | 2 | 3 | 1 | 6 |
| 11 | قازاقستان | 2 | 2 | 3 | 7 |
| 30 | ۋكراينا | 0 | 2 | 1 | 3 |
| 35 | گرۋزيا | 0 | 1 | 1 | 2 |
| 36 | ازەربايجان | 0 | 1 | 0 | 1 |
| 43 | وزبەكستان | 0 | 0 | 2 | 2 |
| 45 | قىرعىزستان | 0 | 0 | 1 | 1 |
الماتىنىڭ «التىن» بالاسى
ريودان كەلىپ جەتكەن «ءسۇيىنشى» الماتى تۇرعىندارىن ءبىر جەلپىنتىپ تاستادى. 200 مەترلىك قاشىقتىقتا براسس ادىسىمەن جۇزگەن الماتىلىق دميتري بالاندين قازاقستان تاريحىندا جۇزۋدەن تۇڭعىش رەت وليمپيادا التىن مەدالىن الدى! ريو-دە-جانەيرو وليمپياداسى قازاقستانعا وسىنداي قۋانىش سىيلادى. ءوز قۋانىشىن ەش جاسىرا الماعان 21 جاسار دميتري بالاندين العاشقى ساتتە جۋرناليستەرگە بەرگەن سۇحباتىندا شەكتەن تىس جۇرەك تولقىنىسىن ىركىپ قالا المادى.
– مەن ءوزىم دە ءدال مۇنداي جەڭىسكە جەتكەنىمە ءالى سەنبەي ءجۇرمىن, – دەدى دميتري. – بىراق مەنىڭ جەرلەستەرىمنىڭ ماعان زور ءۇمىت ارتقانىن جاقسى بىلەمىن. سوندىقتان دا بۇگىن بۇكىل قازاقستان تويلاپ جاتقان شىعار دەپ ويلايمىن. وليمپيادا الدىنداعى جاتتىعۋ بارىسىندا ماعان ءبىر ءسوزبەن ايتقاندا «وتتان دا, سۋدان دا, مىس قۇبىردان» دا وتۋگە تۋرا كەلدى. بۇل جەڭىس –سول ەڭبەكتىڭ, توككەن تەردىڭ جەمىسى. جاتتىقتىرۋشىلارىما, جانكۇيەرلەرىمە العىسىم شەكسىز.
دميتري بالاندين الماتىدا 1995 جىلى 4 ساۋىردە تۋعان. جەڭىمپازدار اراسىندا ديمانىڭ بويشاڭ ەكەنى كوزگە ۇرىپ تا تۇردى. سپورتشىنىڭ بويىنىڭ ۇزىندىعى 195 سم, سالماعى 85 كگ.
برازيليا ايدىنىندا بالىقتاي جۇزگەن ءبالانديننىڭ بۇل جەڭىسكە جەتەتىنىنە قازاقستاندىقتار بەك سەنگەن. ويتكەنى, 2014 جىلعى كۆاندجۋدا وتكەن جازعى ۋنيۆەرسيادادا 100 مەتر قاشىقتىققا براسپەن جۇزۋدە «التىن» العان دميتري بالاندين 2015 جىلى وڭتۇستىك كورەيادا وتكەن جازعى ازيا ويىندارىندا 50, 10, 20 مەترگە براسپەن جۇزۋدەن ءۇش التىندى قاتار الىپ ايدى اسپانعا شىعارعان.
ريوداعى العاشقى جارىس سىناعى كەزىندە دميتري ءبالانديننىڭ 100 مەترلىك قاشىقتىقتا براسپەن جۇزۋدە ەڭ سوڭعى, 8-ورىن الۋى سپورت ماماندارىن دا, كورەرمەندەردى دە ءارى-ءسارى كۇيگە تۇسىرگەن...
الايدا, الماتىنىڭ «التىن» بالاسى سۋدا ءجۇزۋ سپورتىندا ءوزىنىڭ كىم ەكەنىن كۇنى كەشە دالەلدەپ شىقتى. 200 مەترلىك فينالدىق جۇزۋدە رەسەيلىك رەپورتەرلەر باعا بەرگەندەي, «قازاقستاندىق دميتري بالاندين تەڭدەسسىز ءارى كۇتپەگەن ەرلىك جاسادى». شىن مانىندە سەنساتسيالىق كورسەتكىشكە قول جەتكىزگەن (2:08,20) قازاقستاندىق جۇزگىش اتاعى جەر جارعان 2015 جىلدىڭ چەمپيونى ماركو كوح پەن ۆيتسە-چەمپيونى كەۆين كوردەستى ايدىنداعى جان بەرىپ, جان العان تايتالاستا ارتقا تاستاپ كەتتى.
ريو-دە-جانەيرودا ءوتىپ جاتقان وليمپيادالىق ويىنداردا دميتري بالاندين قازاقستانعا زىلتەمىرشى نيدجات راحيموۆتان كەيىن ەكىنشى التىن مەدالدى الىپ كەلدى. كوك تۋىمىز امەريكالىق, رەسەيلىك تۋلاردىڭ الدىنا شىعىپ, ءانۇراننىڭ سازىمەن كوككە ورلەدى.
...قازىر جاز. الماتىنىڭ سۋعا ءجۇزۋ باسسەيندەرىندە بالعىن بالالاردىڭ داۋىسى كۇن ۇزاق ءبىر تىنشىمايدى. بۇگىن باسسەين باسىنداعى بالالاردىڭ بار اڭگىمەسى – الماتىلىق دميتري ءبالانديننىڭ قازاقستان قورجىنىنا سالعان التىن مەدالى تۋرالى بولىپ تۇر.
قانشاما بالعىن جاستىڭ ارمانى ءوزى دە سول دميتريدەي وليمپيادا چەمپيونى بولۋ ەمەس پە؟! بۇگىنگى جەڭىس – بالعىنداردىڭ قيالىنا قانات بايلاعانىنا ءبىز كۋامىز! ريودان جەتكەن سوڭعى جاڭالىق جاس جۇزۋشىلەردىڭ جىگەرىن بۇرىنعىدان دا جاني ءتۇستى.
ويتكەنى, كۇنى كەشە دميتري بالاندين دا ءدال وسى الماتىنىڭ باس باسسەينىندە وسىلار سەكىلدى سۋدى شولپىلداتىپ, شەبەرلىگىن شىڭداعان...
تالعات ءسۇيىنباي,
«ەگەمەن قازاقستان»
الماتى
كەنجە ۇلدىڭ كەمەل شاعى
تەگى ازەربايجان اۋىر اتلەتى نيدجات راحيموۆ 2015 جىلدىڭ اقپان ايىندا قازاقستان ازاماتتىعىن الىپ, ەلىمىزدىڭ قۇراما كومانداسى ساپىندا ونەر كورسەتە باستاعالى بەرى جاھاندىق دەڭگەيدەگى ەڭ ۇلكەن ەكى الامانعا قاتىسىپ, ونىڭ ەكەۋىندە دە التىننان القا تاعىپ قايتتى. ونىڭ اپشەرون تۇبەگىندەگى تۋعان وتانىنان كەتىپ, اتىراۋعا كەلىپ قونىس تەبۋىنە ازەربايجان قۇراماسىنداعى ورىن الىپ وتىرعان بەرەكەسىزدىك پەن ادىلەتسىزدىك سەبەپ بولعان سياقتى.
سوندىقتان نيدجات كۇنى كەشە ريو-دە-جانەيروداعى وليمپيالىق ويىنداردا التىن جۇلدەگەر اتانعان كەزدە ءبىز بۇل تۋرالى ازەربايجان بۇقارالىق اقپارات قۇرالدارى نە جازىپ جاتقانىن بىلمەك بولدىق. سوندا بايقاعانىمىز, باسىلىمداردىڭ دەنى ازەربايجان اۋىر اتلەتىنىڭ قازاقستانعا ريوداعى العاشقى التىن مەدالدى الىپ بەرگەنىن, ال ءوز ەلدەرىندە ءالى مۇنىڭ جۇرناعى دا جوق ەكەنىن كوبىرەك قاپەرگە الىپ جاتىر ەكەن. نيدجات قازاق ەلىنىڭ باعىنا تۋعان تارلان بولىپ جاتقانىن تالاي پورتال اتاپ ءوتىپتى. البەتتە, بۇلاردا ءوز ەلىنەن شىققان پەرزەنتكە دەگەن ماقتانىشپەن قاتار, ونىڭ وزگە ەلدىڭ ابىرويىن اسقاقتاتىپ كەتكەنىنە قىزعانۋشىلىق سەزىمى دە بار.
وسىلايشا ەكى بىردەي تۇركى جۇرتى ەلىنىڭ ماقتان تۇتار مايتالمانىنا اينالعان نيدجات تۋمىسىنان اۋىر اتلەتيكانىڭ الىبى بولىپ جاراتىلعان سياقتى. تۋرا ەرتەڭ 23 جاسقا تولعالى تۇرعان ول 1993 جىلدىڭ 13 تامىزىندا باكۋ قالاسىندا تۋعان. جاسىنان زىلتەمىردى تاسقاياقتاي قاقتىرىپ ويناۋعا قۇمار بولعان ول العاشقى ۇلكەن تابىسىنا 2010 جىلدىڭ مامىرىندا ەۋروپانىڭ يسپانياداعى ۆالەنسيا قالاسىندا وتكەن جاسوسپىرىمدەر ىرىكتەۋ تۋرىندا ءبىرىنشى ورىن الۋمەن قول جەتكىزەدى. سول جىلعى تامىزدا سينگاپۋردە جاسوسپىرىمدەر اراسىنداعى ءبىرىنشى جازعى وليمپيالىق ويىنداردا التىن مەدال جەڭىپ الادى.
نيدجات 2013 جىلى پەرۋدە وتكەن جاسوسپىرىمدەر الەم چەمپيوناتىندا كۇمىس مەدالدىڭ يەگەرى اتانادى. بىراق وسى جىلدىڭ جازىندا ازەربايجاننىڭ 18 زىلتەمىرشىسىمەن بىرگە دوپينگ داۋىنا ءىلىنىپ, ەكى جىلعا سپورتپەن قوش ايتىسادى. مىنە, وسى شەكتەۋ بىتكەننەن كەيىن قۇراماعا قايتا ورالعان اتلەت ءوزىن وندا ەشكىمنىڭ كۇتىپ وتىرماعانىن بايقايدى. وسىدان كەيىن اكەسى ءالي ۇلىنىڭ كەلەشەگى كەسىلىپ كەتپەۋى ءۇشىن جاتپاي-تۇرماي وعان باسقا قۇراما ىزدەۋگە كىرىسەدى. مۇنى ەستىگەن ازەربايجان اۋىر اتلەتيكا فەدەراتسياسىنىڭ ءبىر مۇشەسى بۇعان كورشى گرۋزياعا اۋىسۋدى ۇسىنادى. بىراق اكەلى-بالالى راحيموۆتەردىڭ سول كەزدە كەلىسىمگە كەلىپ, توقتاعاندارى قازاقستان بولادى.
– نيدجاتتى ازەربايجاننان سىرتقا جىبەرۋگە ءبىرىنشى سەبەپ قۇرامانىڭ باس جاتتىقتىرۋشى بولىپ وتىرعان بولگار مامانى زلاتان ۆانەۆتىڭ جۇمىستى بەتىمەن جىبەرگەنى بولدى, – دەيدى قازىر ءالي راحيموۆ. – ول تەك وزىمەن بىرگە كەلگەن بولگار اتلەتتەرىنە عانا كوڭىل بولەتىن دە, جەرگىلىكتى زىلتەمىرشىلەرمەن جۇمىس ىستەگەن جوق. جاماعاتتا اراق ءىشىپ, تەمەكى شەگۋ كۇندەلىكتى قۇبىلىسقا اينالىپتى. سوسىن بالامدى تەزىرەك قۇتقارۋىم كەرەك بولدى. ال قۇتقاراتىن مەكەنىم قازاقستان بولىپ شىقتى. نيدجات مۇندا كەلگەلى قايتا تۇلەپ, بىرتە-بىرتە وسە باستادى.
ايتسا ايتقانداي, نيدجات راحيموۆ قازاقستانعا كەلگەن جىلدىڭ كۇزىندە, 2015 جىلدىڭ قاراشاسىندا اقش-تىڭ حيۋستون قالاسىندا وتكەن الەم چەمپيوناتىندا توپ جاردى. مىنە, ونىڭ سوڭى ريوداعى تولاعاي تابىسقا الىپ كەلدى.
ايتپاقشى, اراب تىلىنەن اۋدارعاندا, «نيدجات», «نيدحات» دەگەن ءسوز «كەنجە ۇل» دەگەن ماعىنانى بىلدىرەدى ەكەن. نيدجات تا ءوز اكە-شەشەسىنىڭ كەنجەسى كورىنەدى. قازاقستانعا كەلىپ, كەمەل شاعىنا جەتكەن سول كەنجە ۇل ريوداعى جەڭىسىنەن كەيىن ىلە-شالا جۋرناليستەرگە ەندىگى جەردە ءوزىنىڭ ءومىرىن وسى ەلمەن جالعاستىرا بەرەتىنىن انىقتاپ ايتتى. ال بۇدان بۇرىن ونىڭ ويىنداردان كەيىن ازەري جەرىنە قايتا ورالاتىنى تۋرالى ايتىلىپ ءجۇر ەدى.
– مەن ەندى ەلگە قايتپايمىن. مەنىڭ ەلىم – قازاقستان. ماعان قازاقستان دا, ءوزىم تۇرىپ جاتقان اتىراۋ دا ۇناپ قالدى. مەن تەك قازاق ەلىنىڭ نامىسىن جىرتاتىن بولامىن, – دەدى ول.
نيدجاتتىڭ قازاقستان ءانۇرانى ويناپ جاتقاندا, وعان كۇبىرلەپ قوسىلىپ, جىلاپ جىبەرگەنىن كورمەگەن كورەرمەن كەمدە-كەم شىعار. مۇنىڭ قۋانىشتىڭ جاسى ەكەنىن, ونىڭ ءوزىن وسىنداي دارەجەگە جەتكىزگەن ەلگە دەگەن قۇرمەتى مەن العىسى ەكەنىن ءبارىمىز دە پايىمدادىق. ەندى سول قۋانىشتى جىلدار مەن جولداردىڭ عۇمىرى ۇزاق بولعاي دەپ تىلەيىك.
سەرىك ءپىرنازار, «ەگەمەن قازاقستان»
قازۇۋ ستۋدەنتى – وليمپيادا چەمپيونى
ء*ال-فارابي اتىنداعى قازۇۋ ستۋدەنتى دميتري بالاندين ريو-دە-جانەيروداعى وليمپيادا ويىندارىندا «التىن» جۇلدەنى قانجىعاسىنا بايلادى. ول ەرلەر اراسىندا براسس ادىسىمەن 200 مەتر قاشىقتىققا جۇزۋدەن ۇزدىك كورسەتكىشپەن جەڭىسكە جەتتى. بۇل قازاق سپورتى تاريحىنداعى وليمپيادا ويىندارىندا جۇزۋدەن العان العاشقى التىن. دميتري بالاندين ءال-فارابي اتىنداعى قازۇۋ-دىڭ دەنەشىنىقتىرۋ جانە سپورت كافەدراسىنىڭ 4-كۋرس ستۋدەنتى. سپورتشى ۋنيۆەرسيتەتتىڭ اعا وقىتۋشىلارى, سپورت شەبەرلەرى – اندرەي حوحلوۆ پەن قۋات ماقاشەۆتىڭ جەتەكشىلىگىمەن جاتتىعادى. دميتري – حالىقارالىق دەڭگەيدەگى سپورت شەبەرى, ازيا چەمپيوناتىنىڭ كۇمىس جۇلدەگەرى, سونداي-اق ينچحوندا وتكەن (وڭت.كورەيا) XVII ازيا ويىندارىنىڭ براسپەن ءجۇزۋ ءادىسى بويىنشا ءۇش دۇركىن التىن مەدال يەگەرى. *بۇعان دەيىن ءال-فارابي اتىنداعى قازۇۋ ستۋدەنتى ەلدوس سمەتوۆ ريو وليمپياداسىندا ەرلەر اراسىنداعى دزيۋدودان 60 كەلىگە دەيىنگى سالماقتا ونەر كورسەتىپ, قازاقستان قورجىنىنا العاشقى كۇمىس مەدالدى سالعان بولاتىن. ەلدوس سمەتوۆ – دزيۋدودان الەم چەمپيونى, حالىقارالىق دارەجەدەگى سپورت شەبەرى. ريوداعى وليمپيادا ويىندارىنا قازاقستاننىڭ ۇلتتىق قۇراماسىندا قازۇۋ-دىڭ 17 ستۋدەنتى سپورتتىڭ 6 تۇرىنەن: ءجۇزۋ, اۋىر جانە جەڭىل اتلەتيكا, دزيۋدو, ەركىن جانە گرەك-ريم كۇرەسىنەن باقتارىن سىناۋدا. قازۇۋ ستۋدەنتتەرى سپورتتىق شەبەرلىكتەرىمەن, جەتكەن جەتىستىكتەرىمەن ۋنيۆەرسيتەتتىڭ ەلىمىزدەگى عانا ەمەس, سونىمەن قاتار حالىقارالىق ارەناداعى ۇزدىك وقۋ ورداسى ەكەنىن تاعى ءبىر دالەلدەدى. «ەگەمەن-اقپارات»«مەنەن باسقانىڭ بارى وڭباعان»
فرانتسۋز اۋىر اتلەتى بەرنادەن كينگۋ ماتام 69 كگ سالماقتا سايىسقا ءتۇسىپ, وندا جەتىنشى ورىنعا تابان تىرەدى. بىراق جۇلدەگەرلەر قاتارىنان كورىنە الماعانىن وزىنەن ەمەس, باسەكەلەستەرىنەن كورەدى. ونىسى «مەنەن باسقالاردىڭ ءبارى – وڭباعان» دەگەنگە سايادى. – ەگەر حالىقارالىق وليمپيالىق كوميتەت ءبارىن دۇرىس جاساسا, مەن ءتورت ساتىعا ىلگەرى جىلجىعان بولار ەدىم. سەبەبى, ولاردىڭ ءبارى «تازا» اتلەتتەر ەمەس. ءبارى دە دوپينگ كۇشىمەن كوتەرىلگەن. سوندىقتان دوپينگ-سىنامانىڭ قورىتىندىسىن كۇتىپ وتىرمىن, – دەدى فرانتسۋز اتلەتى.كحدر گيمناستىن ءولىم جازاسى كۇتىپ تۇر
ويىندار كەزىندە سولتۇستىك كورەيانىڭ گيمناست قىزى حون دجون يۋن ءوزىنىڭ وڭتۇستىكتەگى قانداس قۇربىسى لي ىن دجۋنمەن بىرگە سەلفي جاساسىپ, ەكى ەل دوستاستىعىن كورسەتكىلەرى كەلگەن ەكەن. ال كحدر-دا تۇستىك ازاماتتارىمەن ارالاسقان كەز كەلگەن ادام اسا قاتال جازاعا ۇشىرايدى. بۇقارالىق اقپارات قۇرالدارى وسىعان بايلانىستى پحەنياننىڭ بۇل وقيعانى وتاندى ساتۋ دەپ باعالاۋى ابدەن مۇمكىن ەكەنىن جارىسا جازىسىپ جاتىر. ال كحدر-دا وتاندى ساتۋ بابىمەن ايىپ تاعىلعان ادام ۇكىمەتتە توڭكەرىس جاساۋمەن, مەملەكەتتىك ساتقىندىقپەن جانە تەرروريزممەن بىرگە قاراستىرىلىپ, ءولىم جازاسىنا كەسىلەدى. مىنە, ابايسىزدىق پەن اڭقاۋلىقتىڭ اقىرى نەگە اپارىپ سوقتىرعالى جاتىر! دامير قوجامقۇل
