«...جەر ساتىلادى» دەگەنى جالعان

الىپساتارلىققا ابدەن ۇيرەنىپ الدىق قوي. ءتىپتى, بيزنەستىڭ ءوزىن ءبىر جەر­دەن الىپ, ەكىنشىسىنە ۇستەمە باعا قو­سىپ ساتۋ دەپ ۇعاتىندار ءالى بار. بىراق بار عوي, مۇناي قورى بار كەن ور­نىن تۇتاسىمەن ساتامىن دەگەن حابار­لاندىرۋ وقيمىز دەگەن ءۇش ۇيىق­تاساق تۇسىمىزگە كىرمەپتى. «جۇرە بەرسەڭ, كورە بەرەسىڭ» دەيتىن تامسىلگە سۇيەنسەك, بۇدان دا زورىنا كۋا بولاتىن سياقتىمىز. Olx.kz دەگەن سايت بار. جۇرت ءوزى پايدالانبايتىن, بىراق ۇستاۋعا جارامدى اناۋ-مىناۋ زاتتارىن سوندا ارزان باعامەن ساۋداعا شىعارادى. كاكۇر-شۇكىردىڭ اراسىنان «بۇرىن ەشكىم بۇرعىلاماعان, مۇنايىن يگەرمەگەن كەن ورنىن ساتامىز. باعاسى – 8 ميلليون دوللار نەمەسە 2 ميلليارد 918 ميلليون 320 مىڭ تەڭگە. ءبىز ءوزىمىز دەمەۋشى ىزدەپ كوردىك. بىراق ەشكىم تابىلمادى. سوندىقتان ساتۋ ءۇشىن جارنامالاپ وتىرمىز. جەر «قۇمكول» تاسجولىنداعى «كازما» كومپانياسىنان 25 شاقىرىم قاشىقتىقتا ورنالاسقان. جەردىڭ كەنىشىنە بارلاۋ جۇمىستارى كەڭەس وداعىنىڭ تۇسىندا جۇرگىزىلگەن. ول كەزدەگى قۇجاتتاردىڭ ءبارى قولىمىزدا بار. جەر جەكەمەنشىك يە­لىگىندە. ەلەكتر قۋاتى مەن سۋ 25 شا­قى­رىم قاشىقتىقتا. باستىسى, تاس­­جول 30 شاقىرىم, تەمىرجول 175 شا­قى­­رىم قا­شىق­تىقتا ورنالاس­قان. سا­تىپ الۋ­­شى تابىلىپ جاتسا, سا­تا­مىز, ينۆەس­­تور تابىلسا, اقىل­داسۋ­عا دايىن­بىز», دەگەن حابار­لان­دىرۋ­دىڭ ءجۇر­گەنى جۇرتتى كادىمگىدەي ءدۇر­لىك­تىرىپ تاستادى. جارناما بەرۋشى  رۋس­تام رىسپەكوۆ نىس­پىلى ازامات ەكەن. باستاپقىدا, بىرەۋدىڭ قالجىڭى شىعار دەگەن ەدىك. دەگەنمەن, قاجەت­تى قۇجاتتارىنىڭ ءبارىن تىركەپ قويعان. سەنبەسىڭە بولمايدى. «جەر ۋچاسكەسىنە جەكەمەنشىك قۇقىن بەرەتىن اكتىنىڭ» كوشىرمەسىن دە سالعان. كەن ورنى ورنالاسقان تۇستىڭ كارتاسى دا بەدەرلەنگەن. «ماقسات-مۇناي كونسالتينگ» دەيتىن مەكەمەنىڭ دە قۇجاتتارى ءجۇر. قىسقاسى, سەندىك. سوسىن وبلىستىق جەر قاتىناستارى باسقارماسىنا حابارلاستىق. – Olx.kz سايتىندا جاريالانعان «قىزىلوردادا قويناۋى مۇنايعا تولى جەر ساتىلادى» دەگەن حابارلاندىرۋدى بىردەن زەرتتەدىك, – دەيدى باسقارما باسشىسى شاحماردان قوي­شىباەۆ. – زەردەلەي كەلە, ونداعى جار­­ناماعا قويىلعان اقپاراتتىڭ شىن­­دىققا جاناسپايتىندىعىن, ءارى جال­­عان ەكەندىگىن انىقتادىق. ءبىرىن­شى­­دەن, ساتۋعا قويىلعان جەردىڭ 2014 جىل­دىڭ 7 قازانىنداعى №384 ءنومىرلى ءتىر­كەۋدەگى جەر اكتىسى سۇلتانبەك بي­مۋر­زاەۆ دەگەن ازاماتقا بەرىلگەنى انىق­تالدى. ول ۋچاسكە سىرداريا اۋدا­نى, ا.توقماعانبەتوۆ اۋىلدىق وك­رۋگى­­نىڭ «قاراسور» ايماعىنان شارۋا قو­جا­لىعىن جۇرگىزۋ ءۇشىن بەرىلگەن, ياعني اۋىل شارۋاشىلىعى ماقساتىنا پاي­دا­لانۋ ءۇشىن كوزدەلگەن. بۇل جەردى نى­سا­نالى پايدالانۋ ماقساتىنىڭ «مۇناي وندىرۋگە» مۇلدە قاتىسى جوق. ەكىن­شى­دەن, ەلىمىزدىڭ زاڭنامالارىنا سايكەس جەر ۋچاس­كەسىن مۇناي كەنىشى رەتىندە پاي­دا­لانۋ ءۇشىن ەڭ الدىمەن مىندەتتى تۇردە سا­لالىق مينيسترلىكپەن, اتاپ ايت­قان­دا ەنەرگەتيكا مينيسترلىگى بەر­گەن جەر قويناۋىن پايدالانۋعا قاتىس­تى كەلىسىمشارت بولۋى قاجەت. ونداي كەلىسىم بولماي اتالمىش جەردە مۇناي وندىرۋگە تىيىم سالىنادى. باسقارما باسشىسى حابارلان­دىرۋ­دىڭ جالعان ەكەنىن ناقتى دالەلدەرمەن ايتتى. رۋستام رىس­پەكوۆ­تىڭ مۇناي قورى بار كەنىشتى قولما-قول ساتامىن دەگەنى وتىرىك بولىپ شىقتى. بۇل – جارناما بەرۋشىنىڭ ويىنى ما, الدە باسقا پيعىلى بار ما, ونى قۇزىر­لى ورىندار انىقتاۋى كەرەك. مەم­لە­كەت­تىڭ بايلىعى سانالاتىن كەن ورىندارىن الىپساتارلىق سايتتار ارقىلى ساتۋ دەگە­نىڭىز ادامنىڭ كۇلكىسىن كەلتىر­گەن­مەن, نامىسىڭا دا تيەدى ەكەن. سوندىق­تان, بۇعان بەيجاي قاراۋعا بولمايدى. ەرجان بايتىلەس, «ەگەمەن قازاقستان» قىزىلوردا وبلىسى