اق جەيدە كيىپ كەلىڭدەر, حولي بوياۋىن شاشامىز!..

اقسۋ قالاسىنىڭ 55 جىلدىعىنا وراي جاستار باستاما­لارىن دامىتۋ ورتالىعى مەرەكە كۇنىنە قاتىسۋشى­لارعا الدىن الا وسىنداي حابارلاندىرۋ جاساپتى. ەستىمەگەن ەلدە كوپ. ءسويتىپ, ۇندىلەردىڭ ءبىر-بىرىنە حولي بوياۋىن شاشۋ ويىنىنا اقسۋداعى مەرەكەدە 400-گە جۋىق ادام قاتىسىپتى. قالاداعى «جاستار باستامالارىن دامىتۋ ورتالىعى» جەتى ءتۇستى حولي بوياۋىن ءتىپتى, ارنايى تاپسىرىسپەن الماتىدان الدىرىپتى. بۇل نە؟.. ۇندىلەردىڭ «حولي» مەرەكە­سى جايلى ينتەرنەت بەتتەرىندەگى اڭىزداردا «حولي» ءسوزىنىڭ «حوليكا» دەگەن ءازازىلدىڭ اتىنا بايلا­نىس­تى شىققانى ايتىلادى. «حو­لي» ۇندىلەردىڭ دiني فەستيۆالى. بۇل كۇنى ۇندىلەر ءبىر-بىرىنە ءتۇرلى-ءتۇستى ۇنتاقتار لاقتىرىپ ويناپ, ناۋرىز ايىنىڭ باسىندا ءۇش كۇن تويلايدى ەكەن. حوليكا پەرىنى جەڭدىك دەپ ءبىر-بىرىنە بوياۋ شاشادى. قالا اكىمدىگى ەشقانداي مادە­ني-رۋحاني باعدارلامالار تابا الماعان با, اقسۋلىق جاستار ءبىر-بىرىمىزگە حولي بوياۋىن شاشىپ ويناساق, 55 جىل­دىق مەرەيتويدا «بوياۋلار مە­رەكەسى» بارلىق قاتىسۋشىلاردىڭ كوڭىل كۇيىن كوتەرەدى دەپتى. ءارى بوياۋ­­لار قۇرعاق, تەز جۋىلىپ, كيىمدە داق قالدىرمايدى. فەستيۆالعا قا­تىسقىسى كەلەتىندەر اق جەيدە كيىپ كەلۋى كەرەك ەكەن. ال اقسۋداعى مەشىت يمامدارى ۇندىلەردىڭ بوياۋ شاشۋ ويىنىنىڭ مۇسىلمان بالاسى ءۇشىن تىيىم سالىنعانىن بىلمەي مە, سوندا؟! وزگە دiننiڭ وزگەشەلىگىنەن جاستاردىڭ بويىن اۋلاق ۇستاۋ كەرەكتىگىن ەسكەرتۋ كەرەك ەدى. ءبىر-ءبىرىنىڭ بەت-اۋزىن ءتۇرلى-ءتۇستى بوياۋمەن بوياپ, دەنەلەرى قىزىل-جاسىل تۇسكە مالىنعان جاستار جىن قاققانداي سەندەلىپ, قانداي باستامانى دامىتىپ ءجۇر, سوندا؟ ءبىزدىڭ دىنگە, ءبىزدىڭ دۇنيەتانىمعا, قازاقى بولمىسقا, سالت-داستۇرگە قاتىسى جوق ءۇردىستىڭ ومىرىمىزگە ەنتەلەي كىرگەنى جاقسى ەمەس. جاستار كوزدەرىن اشا الماي, قىزىلدى-جاسىلدى قۇرعاق بوياۋعا كومىلىپ, ەلىمىزدە قابىلدانعان ماڭگىلىك ەل, ۇلى دالا ەلى يدەيالارىن ۇمىت قالدىرسا, بارا-بارا نە بولامىز؟.. ءيا, ءسوز جوق, ءۇندى ەلى – عاجاپ ەل. كينوسىن بالا كەزدەن كورىپ, شايىن ءىشىپ وستىك. بىراق, ەل امان, جۇرت تىنىشتا ولاردىڭ ءدىني مەيرامىن تويلاپ, اقسۋدىڭ جاستارىن نە قارا باستى ەكەن؟! فاريدا بىقاي, «ەگەمەن قازاقستان» پاۆلودار