كىتاپ وقىعاندار كوپ جاسايدى

عالىمدار كىتاپتى كوپ وقيتىن, مەرزىمدى باسىلىمداردى شولىپ شىققاندى ۇناتاتىن ادامدار ەشتەڭە وقىمايتىن ادامدارمەن سالىستىرعاندا ءبىرشاما ۇزاق جاسايتىنىن انىقتادى. تاجىريبەگە جاسى 50-دەن اسقان 3 635 ادام قاتىسقان. زەرتتەۋشىلەر ولاردى اپتاسىنا 3 ساعاتتان ارتىق وقيتىندار, اپتاسىنا ءۇش ساعاتتان از وقيتىندار جانە كىتاپ, گازەت-جۋرنالداردى مۇلدەم وقىمايتىندار دەپ ءۇش توپقا بولەدى. 12 جىل بويى جۇرگىزىلگەن باقىلاۋ ناتيجەسىندە وقيتىنداردىڭ اراسىنداعى ءولىم-ءجىتىم كورسەتكىشى وقىمايتىندارعا قاراعاندا 6 پايىزعا از ەكەنى بايقالعان. سونداي-اق, كىتاپقۇمارلار باسقالارمەن سالىستىرعاندا شامامەن 23 ايعا ۇزاق جاسايتىنى بەلگىلى بولدى. – ادامنىڭ ءومىرىن ۇزارتۋعا گازەت-جۋرنالعا قاراعاندا كىتاپتىڭ اسەرى كۇشتى. سەبەبى, كىتاپ ادامدى جاڭا ماتەريالعا, ءتىپتى, جاڭا الەمگە سۇڭگىتىپ جىبەرە الادى. كەيىپكەرمەن بىرگە ۋايىمدايسىڭ, قۋاناسىڭ. سونىڭ ارقاسىندا وقىرماننىڭ ويلاۋ قابىلەتى ارتادى, سوزدىك قورى كوبەيەدى, – دەيدى عالىمدار. تاجىريبەگە قاتىسقان ادامدار قانداي كىتاپ وقىعانىن ايتپاپتى. الايدا, زەرتتەۋشىلەر ولاردىڭ كوپشىلىگى كوركەم ادەبيەت وقىعان دەپ سانايدى. الداعى ۋاقىتتا عالىمدار اۋديوكىتاپتار, ەلەكتروندى كىتاپتار ادامنىڭ ءومىر جاسىنىڭ ۇزاقتىعىنا قالاي اسەر ەتەتىنىن زەرتتەۋدى قولعا الماق. نۇرحان سامارحان