ەلباسى جەڭىمپازداردى قۇتتىقتادى

قازاقستان پرەزيدەنتى نۇرسۇلتان نازارباەۆ ريو-دە-جانەيروداعى وليمپيا ويىندارىنداعى جەڭىسىنە بايلانىس­تى نيجات راحيموۆقا قۇتتىقتاۋ جەدەلحاتىن جولدادى, دەپ حابارلادى ەلباسىنىڭ ءباسپاسوز قىزمەتى. مەملەكەت باسشىسى اۋىر اتلەتيكا سايىسىندا التىن مەدال يەلەنگەن ن.راحيموۆتى قۇتتىقتادى. «قازاقستاندىقتار سەنىڭ ونە­رىڭدى زور قىزىعۋشىلىقپەن جانە ۇلكەن ۇمىتپەن تاماشالادى. سەن ولاردىڭ ءۇمىتىن تولىق اقتادىڭ. جوعارى سپورتتىق شەبەرلىگىڭ, جان­كەشتىلىگىڭ مەن اسقان ەرىك-جىگەرىڭ ساعان قيىن سايىستا مىقتى قارسىلاستاردى جەڭىپ شىعىپ, قازاقستاننىڭ وليمپيادالىق كومان­داسىنا العاشقى التىن مەدالدى اپەرۋگە كومەكتەستى. سەنىڭ جەڭىسىڭ ەلدىڭ جاس سپورتشىلارى ءۇشىن لايىقتى ۇلگى بولارى انىق», – دەلىنگەن جەدەلحاتتا. نۇرسۇلتان نازارباەۆ سپورت­شىعا جاڭا جەڭىس پەن جەتىستىكتەر تىلەدى. *** ەلباسى نۇرسۇلتان نازارباەۆ دميتري بالاندينگە ريو-دە-جانەيروداعى وليمپيا ويىندارىنداعى جەڭىسىنە بايلانىستى قۇتتىقتاۋ جەدەلحاتىن جولدادى, دەپ حابارلادى پرەزيدەنتتىڭ ءباسپاسوز قىزمەتى. مەملەكەت باسشىسى د.بالان­ديندى سۋدا ءجۇزۋ سايىستارىندا جەڭىپ العان التىن مەدالىمەن قۇتتىقتادى. «سەنىڭ جارقىن جەڭىسىڭ قازاق­ستاندىقتارعا زور قۋانىش سىيلادى. داڭقتى قارسىلاستارمەن جانكەشتى جانە قيىن سايىستا جەڭىپ العان التىن مەدال – سەنىڭ جوعارى شەبەرلىگىڭنىڭ, ماقساتقا تالپىنۋىڭنىڭ, ەرىك كۇشىڭ مەن قايرات-جىگەرىڭنىڭ كورسەتكىشى. سەنىڭ تەڭدەسسىز تابىسىڭ قازاقستان سپورتىنىڭ شەجىرەسىندە ماڭگىلىك قالادى», – دەلىنگەن جەدەلحاتتا. قازاقستان پرەزيدەنتى سپورت­شى­نىڭ كەلەشەكتە جاڭا بەلەستەردى باعىن­دىرۋىنا تىلەكتەستىك ءبىلدىردى.