پرەمەر باتىس قازاقستاندا جۇرتشىلىق وكىلدەرىمەن كەزدەستى

ۇكىمەت باسشىسى باتىس قازاقستان وبلىسىنا جۇمىس ساپارى اياسىندا ورالداعى قوعام جانە زيالى قاۋىم وكىلدەرىمەن كەزدەستى. Pm.kz-ءتىڭ حابارلاۋىنشا, كەزدەسۋگە قاتىسۋشىلار ايماقتىڭ ەكونوميكالىق جانە الەۋمەتتىك-مادەني دامۋىنىڭ وزەكتى ماسەلەلەرىن تالقىلادى. اتاپ ايتقاندا, قۇرىلىس, جول-كولىك ينفراقۇرىلىمى, جاستاردى جۇمىسقا ورنالاستىرۋ تاقىرىپتارى كوتەرىلىپ, جايىق وزەنىندەگى ەكولوگيالىق احۋال تۋرالى ايتىلدى. پرەمەر-مينيسترگە ءوز ۇسىنىستارىن شىعارماشىلىق زيالى قاۋىم وكىلدەرى دە ءبىلدىردى. ماسەلەن, بەلگىلى اقىن اقۇشتاپ باقتىگەرەەۆا جاستارعا رۋحاني تاربيە بەرۋدىڭ جانە مادەني داستۇرلەر مەن قۇندىلىقتاردى ساقتاۋدىڭ ماڭىزدىلىعى تۋرالى ايتتى. ءوز كەزەگىندە باتىس قازاقستان يننوۆاتسيالىق ۋنيۆەرسيتەتىنىڭ دوتسەنتى ا.ءابدىلمانوۆ بەلگىلى قازاق جازۋشىسى حامزا ەسەنجانوۆتىڭ ەسىمىن بالالار مەن جاسوسپىرىمدەرگە ارنالعان وبلىستىق كىتاپحاناعا بەرۋدى ۇسىندى. ورال تۇرعىندارىن تولعاندىرعان سۇراقتارعا مادەنيەت جانە سپورت ءمينيسترى ارىستانبەك مۇحامەدي ۇلى, ينۆەستيتسيالار جانە دامۋ ءمينيسترى جەڭىس قاسىمبەك, اۋىل شارۋاشىلىعى ۆيتسە-ءمينيسترى ەرمەك كوشەرباەۆ, دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى ءبىرجان نۇرىمبەتوۆ, ءبىلىم جانە عىلىم ۆيتسە-ءمينيسترى بيبىگۇل اسىلوۆا تۇشىمدى جاۋاپتارىن بەردى. ايدار ورىسباەۆ