ۇكىمەت باسشىسى باتىس قازاقستاندا جول جاعدايىمەن تانىستى

پرەمەر-مينيستر كارىم ءماسىموۆ باتىس قازاقستان وبلىسىنا جۇمىس ساپارى اياسىندا ءوڭىر اۆتوجولدارىنىڭ جاعدايىمەن تانىستى. Pm.kz-ءتىڭ مالىمەتىنشە, ۇكىمەت باسشىسىنا تۇتاستاي العاندا, وبلىس اۆتوجولدارىنىڭ جاعدايى جانە «ورال – تاسقالا – رەسەي فەدەراتسياسى شەكاراسى» اۆتوجولىن قايتا جوندەۋ جۇمىستارىنىڭ بارىسى تۋرالى باياندالدى. ايماقتى رەسەي فەدەراتسياسىنىڭ ساراتوۆ وبلىسىمەن بايلانىستىراتىن اتالعان اۆتوجولدى قايتا جوندەۋ جوباسى «نۇرلى جول» مەملەكەتتىك باعدارلاماسى اياسىندا جۇزەگە اسىرىلىپ جاتىر. ونىڭ جالپى ۇزىندىعى 100 شاقىرىمدى قۇرايدى, قايتا جوندەۋ جۇمىستارى 2015 جىلدىڭ شىلدە ايىندا باستالعان, ونى 2018 جىلدىڭ مامىر ايىندا اياقتاۋ جوسپارلانعان. وسى جىلدىڭ سوڭىنا دەيىن «نۇرلى جول» باعدارلاماسى اياسىندا 800 شاقىرىمعا جۋىق جاڭا اۆتوجول توسەمىن پايدالانۋعا بەرۋ جوسپارلانىپ وتىر. 2016 جىلدىڭ قورىتىندىسى بويىنشا «باتىس ەۋروپا – باتىس قىتاي», «بەينەۋ – اقتاۋ», «استانا – تەمىرتاۋ», «الماتى – قاپشاعاي – تالدىقورعان» جانە «استانا – پەتروپاۆل» جوبالارىن تولىعىمەن اياقتاۋ قاراستىرىلعان. 2020 جىلعا دەيىن 7 000 شاقىرىم اۆتوجول قۇرىلىسى اياقتالادى دەپ جوسپارلانعان. ايدار ورىسباەۆ