قازاقستان رەسپۋبليكاسى ءبىلىم جانە عىلىم مينيسترلىگىنىڭ بۇيرىعى №18

2016 جىلعى 12 قاڭتار , استانا قالاسى ورتا ءبىلىم بەرۋ ۇيىمدارىندا سىنىپ جەتەكشىلىگى تۋرالى ەرەجەنى بەكىتۋ تۋرالى «ءبىلىم تۋرالى» 2007 جىلعى 27 شىلدەدەگى قازاقستان رەسپۋبليكاسى زاڭىنىڭ 5-بابىنىڭ 12-2) تارماقشاسىنا سايكەس بۇيىرامىن: 1. قوسا بەرىلىپ وتىرعان ورتا ءبىلىم بەرۋ ۇيىمدارىندا سىنىپ جەتەكشىلىگى تۋرالى ەرەجە بەكىتىلسىن. 2. مەكتەپكە دەيىنگى جانە ورتا ءبىلىم, اقپاراتتىق تەحنولوگيالار دەپارتامەنتى (ج.ا. جونتاەۆا) زاڭنامادا بەلگىلەنگەن تارتىپپەن: 1) وسى بۇيرىقتىڭ قازاقستان رەسپۋبليكاسى ادىلەت مينيسترلىگىندە مەملەكەتتىك تىركەلۋىن; 2) وسى بۇيرىق قازاقستان رەسپۋبليكاسى ادىلەت مينيسترلىگىندە مەملەكەتتىك تىركەۋدەن وتكەننەن كەيىن كۇنتىزبەلىك ون كۇن ىشىندە ونى مەرزىمدى باسپا باسىلىمدارىندا جانە «ادىلەت» اقپاراتتىق-قۇقىقتىق جۇيەسىندە رەسمي جاريالاۋعا, سونداي-اق قازاقستان رەسپۋبليكاسى نورماتيۆتىك قۇقىقتىق اكتىلەرىنىڭ ەتالوندىق باقىلاۋ بانكىندە ورنالاستىرۋ ءۇشىن «قازاقستان رەسپۋبليكاسى ادىلەت مينيسترلىگىنىڭ رەسپۋبليكالىق قۇقىقتىق اقپارات ورتالىعى» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنىنا» جىبەرىلۋىن; 3) وسى بۇيرىقتى قازاقستان رەسپۋبليكاسى ءبىلىم جانە عىلىم مينيسترلىگىنىڭ رەسمي ينتەرنەت-رەسۋرسىندا ورنالاستىرۋدى; 4) قازاقستان رەسپۋبليكاسى ادىلەت مينيسترلىگىندە تىركەۋدەن وتكەننەن كەيىن ون كۇن ىشىندە وسى بۇيرىقتىڭ 2-تارماعىنىڭ 1), 2) جانە 3) تارماقشالارىندا كوزدەلگەن شارالاردىڭ ورىندالۋى تۋرالى مالىمەتتى قازاقستان رەسپۋبليكاسىنىڭ ءبىلىم جانە عىلىم مينيسترلىگىنىڭ زاڭ دەپارتامەنتىنە بەرۋدى قامتاماسىز ەتسىن. 3. وسى بۇيرىقتىڭ ورىندالۋىن باقىلاۋ جەتەكشىلىك ەتەتىن قازاقستان رەسپۋبليكاسىنىڭ ءبىلىم جانە عىلىم ۆيتسە-مينيسترىنە جۇكتەلسىن. 4. وسى بۇيرىق العاشقى رەسمي جاريالانعاننان كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى. قازاقستان رەسپۋبليكاسىنىڭ ءبىلىم جانە عىلىم ءمينيسترى ا.ءسارىنجىپوۆ قازاقستان رەسپۋبليكاسى ءبىلىم جانە عىلىم ءمينيسترىنىڭ 2016 جىلعى 12 قاڭتارداعى №18 بۇيرىعىمەن بەكىتىلگەن ورتا ءبىلىم بەرۋ ۇيىمدارىندا سىنىپ جەتەكشىلىگى تۋرالى ەرەجە 1. جالپى ەرەجەلەر 1. وسى ورتا ءبىلىم بەرۋ ۇيىمدارىندا سىنىپ جەتەكشىلىگى تۋرالى ەرەجە (بۇدان ءارى – ەرەجە) «ءبىلىم تۋرالى» 2007 جىلعى 27 شىلدەدەگى قازاقستان رەسپۋبليكاسى زاڭىنىڭ 5-بابىنىڭ 12-2) تارماقشاسىنا سايكەس ازىرلەندى. 2. ەرەجە سىنىپتاعى ءبىلىم الۋشىلاردىڭ وقۋ-تاربيە پروتسەسى شەڭبەرىندەگى قىزمەتىن ۇيلەستىرۋ بويىنشا پەداگوگ قىزمەتكەرگە (بۇدان ءارى – سىنىپ جەتەكشىسى) جۇكتەلگەن فۋنكتسيالاردى ايقىندايدى. 3. سىنىپ جەتەكشىسى ءوز قىزمەتىن قازاقستان رەسپۋبليكاسىنىڭ كونستيتۋتسياسىنا, قازاقستان رەسپۋبليكاسىنىڭ «ءبىلىم تۋرالى», «قازاقستان رەسپۋبليكاسىنداعى بالانىڭ قۇقىقتارى تۋرالى» زاڭدارىنا جانە ءبىلىم بەرۋ سالاسىنداعى قازاقستان رەسپۋبليكاسىنىڭ باسقا دا زاڭنامالىق جانە نورماتيۆتىك قۇقىقتىق اكتىلەرىنە سايكەس جۇزەگە اسىرادى. 4. سىنىپ جەتەكشىسىنىڭ قىزمەتى – ءبىلىم بەرۋ ۇيىمىنىڭ جارعىسى, ءبىلىم الۋشىلارعا ءبىلىم بەرۋدىڭ وزەكتى مىندەتتەرى, جاڭارتىلعان مازمۇنى, ءادىسناماسى, سونداي-اق تاربيە نىساندارى ەسكەرىلگەن تۇلعالىق باعدارلى ءتاسىل نەگىزىندە قۇرىلعان ماقساتقا ساي باعىتتالعان, جۇيەلى, جوسپارلانعان پروتسەسس. 5. سىنىپ جەتەكشىسى تاربيە جۇمىسىن ۇيىمداستىرۋ سالاسىندا ءتيىستى تەوريالىق جانە پراكتيكالىق ءبىلىمدى جانە وقىتۋ داعدىلارىن مەڭگەرىپ, جوعارى ونەگەلىلىك قاسيەتتەرگە يە بولا, ءبىلىم الۋشىلاردى جىگەرلەندىرىپ, ولارعا قولداۋ كورسەتىپ جانە بيىك ادامي مۇراتتارعا باعىتتايدى. سىنىپ جەتەكشىسىنە تاعايىنداۋعا كانديداتۋرالاردى ىرىكتەۋدى ءبىلىم بەرۋ ۇيىمىنىڭ اكىمشىلىگى جۇزەگە اسىرادى, باسشىنىڭ بۇيرىعىمەن بەكىتىلەدى. 6. سىنىپ جەتەكشىسى قىزمەتىنە باقىلاۋدى جالپى ورتا ءبىلىم بەرۋ ۇيىمى باسشىسىنىڭ تاربيە ءىسى جونىندەگى ورىنباسارى جۇزەگە اسىرادى. 7. بىلىم بەرۋ پروتسەسىنىڭ قاتىسۋشىلارى ءبىلىم بەرۋ ۇيىمدارىنىڭ اكىمشىلىگى, پەداگوگتەر, سىنىپ جەتەكشىلەرى, ءبىلىم بەرۋ ۇيىمدارىنداعى جۇمىسكەرلەر (مەكتەپتىڭ مەديتسينالىق قىزمەتكەرلەرى, پسيحولوگتار, لوگوپەدتەر), ءبىلىم الۋشىلار, ولاردىڭ اتا-انالارى جانە وزگە دە زاڭدى وكىلدەرى بولىپ تابىلادى. 2. سىنىپ جەتەكشىسى قىزمەتىنىڭ ماقساتى مەن مىندەتتەرى 8. سىنىپ جەتەكشىسى قىزمەتىنىڭ ماقساتى – ءبىلىم الۋشىنىڭ ازاماتتىق وزىندىك ساناسىن, جالپى مادەنيەتىن, سالاۋاتتى ءومىر سالتىن, ءوزىن-ءوزى دامىتۋى مەن ءوزىن-ءوزى ىسكە اسىرۋىن قالىپتاستىرۋى, ونىڭ تۇلعالىق ءوزىن-ءوزى انىقتاۋى, قوعامدا تابىستى الەۋەتتەنۋى مەن بەيىمدەلۋى ءۇشىن, ءبىلىم الۋشىلاردىڭ شىعارماشىلىعىن دامىتۋ, بوس ۋاقىتىن مازمۇندى ۇيىمداستىرۋ ءۇشىن جاعداي جاساۋ. جالپى ورتا ءبىلىم بەرۋ مازمۇنىندا بازالىق قۇندىلىقتار: قازاقستاندىق پاتريوتيزم جانە ازاماتتىق جاۋاپ­كەرشىلىك, قۇرمەت, ىنتىماقتاستىق, ەڭبەك جانە شىعارماشىلدىق, اشىقتىق, ءومىر بويى ءبىلىم الۋ بولىپ تابىلادى. 9. سىنىپ جەتەكشىسى قىزمەتىنىڭ مىندەتتەرى: 1) سىنىپ اكتيۆىن قالىپتاستىرۋ; 2) ءار ءبىلىم الۋشىنىڭ تۇلعاسىن دامىتۋ, ءوزىن-ءوزى تانىتۋ, ونىڭ الەۋەتتىك قابىلەتتەرىن اشۋ جانە قايتالانباستىعىن ساقتاۋ ءۇشىن قولايلى پسيحولوگيالىق-پەداگوگيكالىق جاعداي جاساۋ; 3) ءبىلىم الۋشىلاردىڭ قۇقىقتارى مەن مۇددەلەرىن قورعاۋ; 4) سىنىپتا ءبىلىم الۋشىلارمەن جۇيەلى جۇمىس ۇيىمداستىرۋ; 5) تۇلعانىڭ شىعارماشىلىق, رۋحاني, تابيعي مۇمكىندىكتەرىن دامىتۋ; 6) سالاۋاتتى ءومىر سالتىنا ىنتالاندىرۋ; 7) وقۋشىلاردا ادامگەرشىلىك-ونەگەلىك جانە رۋحاني قاسيەتتەردى قالىپتاستىرۋ, تولەرانتتىلىققا باۋلۋ; 8) ازاماتتىق پەن پاتريوتيزمگە, ءوز وتانى - قازاقستان رەسپۋبليكاسىنا سۇيىسپەنشىلىككە, مەملەكەتتىك رامىزدەر مەن مەملەكەتتىك ءتىلدى قۇرمەتتەۋگە, حالىق داستۇرلەرىن قاستەرلەۋگە, كونستيتۋتسياعا قايشى جانە قوعامعا جات كەز كەلگەن كورىنىستەرگە توزبەۋگە تاربيەلەۋ; 9) بەلسەندى ازاماتتىق ۇستانىمى بار جەكە ادامدى تاربيەلەۋ, رەسپۋبليكانىڭ قوعامدىق-ساياسي, ەكونوميكالىق جانە مادەني ومىرىنە قاتىسۋ قاجەتتىگىن, جەكە ادامنىڭ ءوز قۇقىقتارى مەن مىندەتتەرىنە سانالى كوزقاراسىن قالىپتاستىرۋ; 10) وتاندىق جانە الەمدىك مادەنيەتتىڭ جەتىستىكتەرىنە باۋلۋ; قازاق حالقى مەن رەسپۋبليكانىڭ باسقا دا حالىقتارىنىڭ تاريحىن, ادەت-عۇرپى مەن داستۇرلەرىن زەردەلەۋ; مەملەكەتتىك ءتىلدى, ورىس, شەتەل تىلدەرىن مەڭگەرتۋ; 11) وقۋشىلاردىڭ بويىندا ۇجىمدىق پەن باسقالارعا جاۋاپكەرشىلىك, جانە سەزىمدىك, دوستىق تۇرعىسىنان توپتا جۇمىس ىستەۋدە قابىلەتتىلىگىن قالىپتاستىرۋ; 12) بالالارعا ارنالعان قاۋىپسىز ورتانى قالىپتاستىرۋ. 3. سىنىپ جەتەكشىسىنىڭ فۋنكتسياسى 10. سىنىپ جەتەكشىسىنىڭ فۋنكتسيالارى. 1) ۇيىمداستىرۋ-ۇيلەستىرۋ فۋنكتسيالارى: سىنىپ ۇجىمىن دامىتۋدىڭ تالداۋىنا, جاي-كۇيىنە جانە دامۋ پەرسپەكتيۆاسىنا قاراي, قۇراستىرىلعان ورتا ءبىلىم بەرۋ ۇيىمىنىڭ تاربيە جۇمىسى جوسپارىن ەسكەرە وتىرىپ سىنىپ جەتەكشىسى قىزمەتىنىڭ جوسپارىن ازىرلەۋ. تاربيەلىك قىزمەتتىڭ ناتيجەلەرىن بولجاۋ; پەداگوگيكالىق قىزمەتكەرلەرمەن جانە ءبىلىم بەرۋ, دەنساۋلىق ساقتاۋ ۇيىمدارىنىڭ باسقا قىزمەتكەرلەرىمەن, ءبىلىم الۋشىلاردىڭ اتا-انالارىمەن جانە باسقا زاڭدى وكىلدەرىمەن ءوزارا ءىس-قيمىل جاساۋ, ولارعا ءبىلىم الۋشىلاردى تاربيەلەۋدە كومەك كورسەتۋ (جەكە, پسيحولوگ, الەۋمەتتىك پەداگوگ, قوسىمشا ءبىلىم بەرۋ پەداگوگى ارقىلى); جالپىمەكتەپتىك ۇجىم قىزمەتى شەڭبەرىندە ءبىلىم الۋشىلار تۇلعاسىنىڭ وڭ الەۋەتىن دامىتۋ ءۇشىن سىنىپتا ءتيىمدى ءبىلىم بەرۋ پروتسەسىن ۇيىمداستىرۋ; ءبىلىم الۋشىلاردىڭ ورتا ءبىلىم بەرۋ ۇيىمىندا جانە مەكتەپتەن تىس ۇيىمداردا ساباقتان تىس ۋاقىتتا, سونداي-اق قوسىمشا ءبىلىم بەرۋ جۇيەسى ارقىلى الۋان ءتۇرلى قىزمەتىن ىنتالاندىرۋ جانە ەسەپكە الۋ; ءبىلىم الۋشىلارمەن, ولاردىڭ اتا-انالارىمەن جانە وزگە دە زاڭدى وكىلدەرىمەن وقىتۋ جۇمىسىن ۇيىمداستىرۋ; حالىقتىڭ الەۋمەتتىك وسال توپتارىنان شىققان بالالاردى انىقتاۋ, ەسەپكە الۋ جانە وقۋ-تاربيە پروتسەسىن ءتيىمدى جوبالاۋ, ولارعا ءتيىستى كومەك كورسەتۋدى ۇيىمداستىرۋ ماقساتىندا جۇمىس جۇرگىزۋ; ءبىلىم الۋشىلاردىڭ كاسىبي ءوزىن-ءوزى انىقتاۋىنا, ماماندىقتى سانالى تاڭداۋىنا ىقپال ەتۋ; سىنىپ جەتەكشىلەرىنىڭ ادىستەمەلىك بىرلەستىك جۇمىسىنا قاتىسۋى; تاربيە جۇمىسىن سىنىپ ۇجىمىمەن جوسپارلاۋ, ءبىلىم الۋشىلارمەن, ولاردىڭ اتا-انالارىمەن جانە وزگە دە زاڭدى وكىلدەرىمەن جۇرگىزىلەتىن جەكە جۇمىس جوسپارىن ازىرلەۋ; جالپىمەكتەپتىك جوسپارلاۋدىڭ نەگىزگى قاعيداتتارىنىڭ ورىندالۋىن ەسكەرە وتىرىپ, سىنىپپەن جۇرگىزىلەتىن تاربيە جۇمىسىن جوسپارلاۋ نىساندارىن انىقتاۋعا; سىنىپتا تاربيە پروتسەسىن ۇيىمداستىرۋعا ءپان مۇعالىمدەرىن, ءبىلىم الۋشىلاردىڭ اتا-انالارىن جانە وزگە دە زاڭدى وكىلدەرىن, باسقا سالالاردىڭ ماماندارىن (عىلىم, ونەر, سپورت, قۇقىق قورعاۋ ورگاندارى جانە ت.ب.) تارتۋ; سىنىپتا وقۋ-تاربيە پروتسەسىن ۇيىمداستىرۋ, وقۋشىلاردى سىنىپ جانە مەكتەپ ۇجىمدارىنىڭ جۇيەلى قىزمەتىنە قاتىستىرۋ; ءبىلىم الۋشىلاردىڭ جەكە ەرەكشەلىكتەرىن, ولاردىڭ وتباسىنداعى جانە مەكتەپتەگى تىرشىلىك ارەكەتىن زەردەلەۋ; ءبىلىم الۋشىلاردىڭ مىنەز-قۇلقىنداعى دەۆيانتتى كورىنىستەردى قاداعالاۋ جانە دەر كەزىندە ايقىنداۋ, ءتيىستى پەداگوگيكالىق جانە پسيحولوگيالىق كومەك كورسەتۋ, مەكتەپ اكىمشىلىگىن حاباردار ەتۋ; ءبىلىم الۋشىلارعا ولاردىڭ اسا كۇردەلى ومىرلىك پروبلەمالارى مەن جاعدايلارىن شەشۋدە كومەك كورسەتۋ; ءبىلىم الۋشىلاردىڭ الەۋمەتتىك, پسيحولوگيالىق جانە قۇقىقتىق قورعالۋىن ۇيىمداستىرۋ; سىنىپ ۇجىمىندا قولايلى پسيحولوگيالىق احۋال جاساۋ; سالاۋاتتى ءومىر سالتىن ناسيحاتتاۋ; ءبىلىم الۋشىلاردىڭ اتا-انالارىن جانە وزگە دە زاڭدى وكىلدەرىن ولاردىڭ ۇلگەرىمى مەن ءتارتىبى تۋرالى حاباردار ەتۋ, سىنىپتاعى اتا-انالار كوميتەتى جۇمىسىنا تۇزەتۋ ەنگىزىپ وتىرۋ; جالپى ءبىلىم بەرەتىن پاندەر بويىنشا پەداگوگيكالىق قىزمەتكەرلەرمەن ءوزارا ارەكەتتەسۋ; سىنىپ ۇجىمىمەن سىنىپ ساعاتتارىن جانە باسقا دا ساباقتان تىس, مەكتەپتەن تىس ءىس-شارالار وتكىزۋ; سىنىپ قۇجاتتاماسىن ء(بىلىم الۋشىلاردىڭ جەكە ىستەرى, سىنىپ جۋرنالى, كۇندەلىكتەرىنىڭ تولتىرۋىن قاداعالاۋ), سونداي-اق ورتا ءبىلىم بەرۋ ۇيىمىنىڭ نورماتيۆتىك اكتىلەرىمەن ايقىندالعان باسقا دا قۇجاتتامالاردى جۇرگىزۋ; ءوزىن-ءوزى ساقتاۋ جانە بەيتانىس ادامدارمەن قارىم-قاتىناس جاساۋ داعدىلارىن قالىپتاستىرۋعا ىقپال ەتەدى; تەحنيكالىق قاۋىپسىزدىك ەرەجەلەرىن ساقتاۋ; سىنىپتان تىس جانە مەكتەپتەن تىس ءىس-شارالاردى وتكىزۋ كەزىندە ءبىلىم الۋشىلاردىڭ ءومىرى مەن دەنساۋلىعىن ساقتاۋدى قامتاماسىز ەتۋ; ءبىلىم بەرۋ ۇيىمىنىڭ باسشىسىن بالا قۇقىقتارىنىڭ بۇزىلۋ (قورقىتىپ الۋ, بوپسالاۋ, بالالاردىڭ قازا بولۋ جانە باسقا دا جازاتايىم وقيعالار) جانە ءبىلىم الۋشىنىڭ قۇقىققا قارسى ارەكەتتەر (ارەكەتسىزدىك) جاساۋ فاكتىلەرى تۋرالى ۋاقتىلى حاباردار ەتۋ. 2) كوممۋنيكاتيۆتى فۋنكتسيالار: ءبىلىم الۋشىلار اراسىندا تۇلعاارالىق قاتىناستى رەتتەۋ; سىنىپتا ورتاق قولايلى پسيحولوگيالىق احۋال ورناتۋعا ىقپال ەتۋ; ءبىلىم الۋشىلارعا قۇزىرەتتىلىك قاسيەتتەر قالىپتاستىرۋدا كومەك كورسەتۋ. 3) تالدامالى فۋنكتسيالار: ءبىلىم الۋشىلاردىڭ جەكە ەرەكشەلىكتەرىن جانە ولاردىڭ دامۋ ديناميكاسىن زەردەلەۋ; تۇلعانىڭ جانە ۇجىمنىڭ تاربيەلىلىك دەڭگەيىن تالداۋ جانە باعالاۋ; ءبىلىم الۋشى تۇلعاسىنىڭ قالىپتاسۋىنا وتباسى تاربيەسىنىڭ ىقپالىن تالداۋ جانە باعالاۋ; سىنىپتاعى ءبىلىم الۋشىلاردىڭ ۇلگەرىمى مەن جالپى دامۋ ديناميكاسىنا جۇيەلى تۇردە تالداۋ جاساۋدى جۇزەگە اسىرۋ. 4) باقىلاۋ فۋنكتسيالارى: سىنىپتاعى ءبىلىم الۋشىلاردىڭ وقۋ ۇلگەرىمىنە, ساباققا قاتىسۋىنا, سىرتقى كەلبەتىنە, ەموتسيونالدى-پسيحولوگيالىق جاعدايىنا باقىلاۋ جاساۋدى جۇزەگە اسىرۋ. 11. سىنىپ جەتەكشىسىنىڭ فۋنكتسيالارىنا سايكەس ءبىلىم الۋشىلارمەن جۇرگىزەتىن مىناداي جۇمىس نىساندارىن تاڭدايدى: 1) جەكە (اڭگىمەلەر, كەڭەستەر, ماسەلەنى بىرگە شەشۋ جولدارىن ىزدەستىرۋ جانە تاعى باسقالار); 2) توپتىق (شىعارماشىلىق بىرلەستكىتەر, ءوزىن ءوزى باسقارۋ ورگاندارى جانە باسقالار); 3) ۇجىمدىق (بايقاۋلار, سپەكتاكلدەر, كونتسەرتتەر, جورىقتار, سلەتتەر, جارىستار جانە تاعى باسقالار). ءبىلىم الۋشىلارمەن جۇرگىزەتىن جۇمىس نىساندارىن تاڭداۋدا: ورتا ءبىلىم بەرۋ ۇيىمىنىڭ مىندەتتەرىنە سايكەس قىزمەت مازمۇنىن جانە نەگىزگى تۇرلەرىن ايقىنداۋدى; ءبىلىم بەرۋ پروتسەسىن ۇيىمداستىرۋ قاعيداتتارىن, ءبىلىم الۋشىلاردىڭ قاجەتتىلىكتەرىن, قىزىعۋشىلىقتارىن جانە مۇمكىندىكتەرىن, سىرتقى جاعدايلاردى ەسكەرۋدى; سىنىپتاعى ءبىلىم الۋشىلاردىڭ الەۋمەتتىك ماڭىزدى, شىعارماشىلىق قىزمەتىنىڭ مازمۇنى, ادىستەرى مەن نىساندارىنىڭ تۇتاستىعىن قامتاماسىز ەتۋدى باسشىلىققا العان دۇرىس. 4. سىنىپ جەتەكشىسىنىڭ قىزمەتىن ۇيىمداستىرۋ 12. سىنىپ جەتەكشىسى سىنىپ ۇجىمىمەن جانە ونداعى جەكە ءبىلىم الۋشىلارمەن مىناداي جۇمىستاردى جۇزەگە اسىرادى: 1) ۇنەمى ساباققا كەلمەگەندەردى جانە كەشىككەندەردى ايقىندايدى, ولاردىڭ كەلمەۋ نەمەسە كەشىگۋ سەبەپتەرىن انىقتايدى, ساباققا قاتىسپاۋدىڭ جانە كەشىگىپ كەلۋدىڭ الدىن الۋ جۇمىسىن جۇرگىزەدى; 2) سىنىپ كابينەتىندە ءبىلىم الۋشىلاردىڭ كەزەكشىلىگىن ۇيىمداستىرادى; 3) بىلىم الۋشىلارمەن, ونىڭ ىشىندە ولاردىڭ مىنەز-قۇلقىندا دەۆيانتتىلىق پايدا بولعان جاعدايدا جۇرگىزىلەتىن ءارتۇرلى جەكە جۇمىس نىساندارىن ۇيىمداستىرادى. 13. سىنىپ جەتەكشىسى اپتا سايىن: 1) بىلىم الۋشىلاردىڭ كۇندەلىك تولتىرۋىن تەكسەرۋدە اپتا بويى العان باعالارىنىڭ قويىلۋىن تەكسەرەدى; 2) تاربيە جۇمىسىنىڭ جوسپارىنا سايكەس سىنىپ جەتەكشىسى ساعاتىن (سىنىپ ساعاتىن) وتكىزەدى; 3) تاربيەلەۋ جۇمىسى جوسپارىنا سايكەس اي سايىن كەمىندە ەكى تاربيەلەۋ ءىس-شاراسىن (سىنىپ ساعاتىنان بولەك) وتكىزەدى; 4) ءبىلىم الۋشىلاردىڭ اتا-انالارىمەن جانە وزگە دە زاڭدى وكىلدەرىمەن جۇمىستى ۇيىمداستىرادى (جاعدايعا بايلانىستى); 14. سىنىپ جەتەكشىسى اي سايىن: 1) ءوز سىنىبىنداعى ساباقتارعا قاتىسادى; 2) پسيحولوگتىڭ جانە جەكە پەداگوگ قىزمەتكەرلەردىڭ كەڭەسىن الادى; 3) سىنىپ ۇجىمىنىڭ جانە ونىڭ بەلسەندىلەرىنىڭ جۇمىسىن ۇيىمداستىرادى; 15. سىنىپ جەتەكشىسى وقۋ توقسانى بويىندا: 1) سىنىپ جۋرنالىنىڭ جۇرگىزىلۋىن قامتاماسىز ەتەدى; 2) سىنىپ جەتەكشىلەرى ادىستەمەلىك بىرلەستىك جۇمىسىنا قاتىسادى; 3) توقسان بويى تاربيە جۇمىس جوسپارىنىڭ ورىندالۋىنا, وقۋشىلاردىڭ ۇلگەرىم جاعدايىنا جانە تاربيەلىك دەڭگەيىنە تالداۋ جۇرگىزەدى; 4) جاڭا وقۋ توقسانىنا ارنالعان تاربيە جوسپارىن ازىرلەيدى; 5) سىنىپ اتا-انالارىنىڭ جينالىسىن وتكىزەدى; 6) وقۋ بولىمىنە سىنىپ وقۋشىلارىنىڭ توقسانداعى وقۋ ۇلگەرىمى تۋرالى ەسەپ تاپسىرادى; 16. سىنىپ جەتەكشىسى جىل سايىن: 1) وقۋشىلاردىڭ جەكە ىستەرىن رەسىمدەيدى; 2) وقۋ جىلى بويىنداعى سىنىپتاعى تاربيە جۇمىسىنىڭ جاي-كۇيىنە, ءبىلىم الۋشىلاردىڭ تاربيەلىلىك دەڭگەيىنە تالداۋ جۇرگىزەدى; 3) سىنىپتىڭ تاربيە جۇمىسى جوسپارىن (سىنىپ جەتەكشىسىنىڭ جوسپارى) جاسايدى; 4) سىنىپتاعى ءبىلىم الۋشىلار تۋرالى ستاتيستيكالىق ەسەپ جينايدى جانە مەكتەپ اكىمشىلىگىنە تاپسىرادى. 5. سىنىپ جەتەكشىسىنىڭ قۇجاتتاماسى 17. سىنىپ جەتەكشىسى مىناداي قۇجاتتامانى جۇرگىزەدى: 1) ورتا ءبىلىم بەرۋ ۇيىمى جۇمىسىنىڭ پەرسپەكتيۆالىق جوسپارى نەگىزىندە تاربيە جۇمىسىنىڭ جوسپارى. تاربيە جۇمىسىنىڭ تالداۋى مەن جوسپارىنىڭ نىسانىن مەكتەپ سىنىپ جەتەكشىلەرىنىڭ ادىستەمەلىك بىرلەستىگى ايقىندايدى; 2) ءبىلىم بەرۋ ۇيىمى باسشىسى بەلگىلەگەن نىساندا سىنىپتىڭ الەۋمەتتىك پاسپورتى; 3) سىنىپتاعى ءبىلىم الۋشىلاردى پەداگوگيكالىق, الەۋمەتتىك, پسيحولوگيالىق, تابيعي زەرتتەۋ ناتيجەلەرى; 4) اتا-انالار كوميتەتتەرى مەن اتا-انالار جينالىستارى وتىرىستارىنىڭ حاتتامالارى, اتا-انالار جينالىستارىن دايىنداۋعا ارنالعان ماتەريالدار; 5) بالالارمەن جۇرگىزىلەتىن تاربيە ءىس-شارالارىنىڭ ماتەريالدارى; 6) سىنىپ جەتەكشىلىگى بويىنشا ادىستەمەلىك جۇمىس ماتەريالدارى; 7) تاربيە جۇمىسىنىڭ توقساندىق, جارتىجىلدىق جانە جىلدىق تالداۋى; 8) ەسەپتەر, تالداۋ جانە باسقا دا ماتەريالدارى. 6. سىنىپ جەتەكشىسىنىڭ تاربيە قىزمەتى ناتيجەلىلىگىنىڭ ولشەمشارتتارى 18. سىنىپ جەتەكشىسىنىڭ تاربيە قىزمەتى ناتيجەلىلىگى تومەندەگى ولشەمشارتتارمەن ايقىندالادى: 1) سىنىپ جەتەكشىسى قىزمەتىنىڭ ناتيجەلىگىن ءبىلىم بەرۋ ۇيىمدارىنىڭ اكىمشىلىگى مەن باسقا دا ءبىلىم بەرۋ پروتسەسىنە قاتىساتىن ۇيىمدار تالدايدى جانە باعالايدى. وسى ماقساتتا ءاربىر ءبىلىم بەرۋ ۇيىمدارىندا جۇمىس جۇيەلەرىنىڭ ولشەمشارتتارى, سونداي-اق باعالاۋ-تالداۋ قىزمەتىنىڭ تاسىلدەرى ازىرلەنەدى. 2) سىنىپ جەتەكشىسىنىڭ قىزمەتىن باعالاۋدى, ادەتتە, ديرەكتوردىڭ وقۋ-تاربيە جۇمىسى جونىندەگى ورىنباسارى جۇزەگە اسىرادى. 3) سىنىپ جەتەكشىسى جۇمىسىنىڭ تيىمدىلىگى ولشەمشارتتار نەگىزىندە باعالانادى, ولاردىڭ سيپاتتاماسى: تاربيەلەنۋشىلەردىڭ تۇلعالىق ساپاسىن جانە جەكە قابىلەتتىلىكتەرىن دامىتۋ دەڭگەيلەرى; ءبىلىم الۋشىلارعا تۇراقتى ءبىلىم بەرۋ باعدارلاماسىن تابىستى يگەرۋدى نەمەسە ۇلگەرىم ديناميكاسىنىڭ وڭ بولۋى; سىنىپ ۇجىمىنىڭ, سىنىپتى تاربيەلەۋ جۇيەسىنىڭ قالىپتاستىرىلۋى; اتا-انالار بالالاردىڭ سىنىپتاعى تىرشىلىك ارەكەتىنە جانە سىنىپ جەتەكشىسى قىزمەتىنىڭ ناتيجەلەلەرىنە قاناعاتتانشىلىق تانىتۋى; تاربيەلەنۋشىلەردىڭ ءارتۇرلى ارەكەتتەردە ناتيجەگە جەتۋى; بالاعا سىنىپ قاۋىمداستىعىنىڭ قولايلى بولۋى; 4) ولشەمشارتتاردىڭ اتالعان جۇيەسى قاجەتتىلىگىنشە, سىنىپ ۇجىمىنىڭ ارنايى ەرەكشەلىگى مەن ونىڭ تاربيە قىزمەتىن كورسەتەتىندەي بولۋى جانە قوسىمشا كورسەتكىشتەرمەن تولىقتىرىلۋى دا مۇمكىن (قۇقىق بۇزۋشىلىقتىڭ بولماۋى, قوعامدىق جانە ءبىلىم الۋشىلاردىڭ شىعارماشىلىق بەلسەندىلىگى جانە ت.ب.). تاڭدالىپ الىنعان ولشەمشارتتارعا سايكەس پسيحولوگيالىق-پەداگوگيكالىق دياگنوستيكانىڭ ادىستەمەسى, باعالاۋ-تالداۋ قىزمەتىنىڭ ادىستەرى مەن تاسىلدەرى جيناقتالادى جانە قولدانىلادى. بۇيرىق قازاقستان رەسپۋبليكاسىنىڭ ادىلەت مينيسترلىگىندە 2016 جىلعى 15 اقپاندا نورماتيۆتىك قۇقىقتىق كەسىمدەردى مەملەكەتتىك تىركەۋدىڭ تىزىلىمىنە №13067 بولىپ ەنگىزىلدى.