ءدۇبىر

[caption id="attachment_55742" align="alignright" width="264"] Rio2016_AO[/caption] اۋىر اتلەتيكادان قازاقستان قۇراماسىنىڭ باس جاتتىقتىرۋشىسى الەكسەي ني – بولجامعا باتىل ادام. ونىڭ سوزىنە قاراپ: «ءتورت بىردەي وليمپيالىق ويىنداردىڭ چەمپيوندارى قولىندا جوق بولسا دا, ەكىنشى قۇراممەن مەدالعا تالاسامىز دەگەندى ايتا بەرەدى», دەسكەندەر بولعان. بىراق بۇگىنگە دەيىن ونەر كورسەتكەن زىلتەمىرشىلەردىڭ بارلىعى دەرلىك مەدالدار اۋىلىنا سىنىق سۇيەم جەتپەي جاتتى. ال 63 كيلو سالماقتا جارىس جولىنا شىعاتىن كارينا گوريچەۆا انىق مەدال الادى دەگەن. ايتقانى ايداي كەلدى. العاشقى بولىپ تۇعىرعا شىققان يتاليان قىزىنىڭ ويىندا مەدال تۇرعانى اڭعارىلىپ ەدى. جۇلقا كوتەرۋدە دە, سەرپە كوتەرۋدە دە وزىمەن ءوزى الىسىپ, وليمپيالىق ويىنداردىڭ چەمپيونى بولعانداي شاتتانىپ كەتتى. مەكسيكالىق ورتيز, تۇعىرعا شىققاندا سىرت كوزگە كورىنبەيتىن بىرەۋمەن ۇرىسقانداي ءوزىن-ءوزى جەپ كەلەتىن كولۋمبيالىق مەرسەدەس پەرەس, تايلاندتىڭ ءۇرىپ اۋىزعا سالعانداي ادەمى قىزى جۇلقا كوتەرۋدە جابىلىپ ءجۇرىپ, 108 كيلومەن توقتادى. ءبىزدىڭ اۋىر اتلەتشى العاش­قىدا 107 كيلونى كوتەرە الماي كەتكەنىمەن, كەيىنگىسىندە قامشى سالدىرعان جوق. زىلتەمىردى اۋىر­لاۋ السا دا, تاپسىرمانى تاپ-تۇيناقتاي ورىنداعان. وسىنى شىنىمەن مەن كوتەرىپ تۇرمىن با دەگەندەي, زىلتەمىرگە مەيىرلەنە قاراعانىن بايقاپ قالدىق. را­سىندا, بۇل جۇلقا كوتەرۋدەگى كىشى كۇمىس مەدال بولاتىن. باستى قارسىلاسى الەم رەكوردشىسى دەن ۆەي بولارى بەسەنەدەن بەلگىلى ەدى. سولتۇستىك كورەيا قىزى حيۋ سيم حوي 109 كيلو كوتەر­گەنىمەن, تەحنيكالىق قاتە­لىك­تەرىنە باي­­لانىستى ەسەپكە الىنبادى. وسىنىڭ ءبارىن وي ەلەگىنەن ءوت­كىزىپ, قالاي بولعاندا دا ءبىر مە­دالدىڭ ەنشىمىزگە جازىلاتىنىن بىلدىك. الەمدىك رەكوردتاردى پىستە شاققانداي جاڭارتىپ جۇرگەن دەن ۆەي تۇرعاندا, التىن مەدالعا يەگىمىزدىڭ قىشىمايتىنى انىق. سەرپە كوتەرۋگە دەيىنگى ءۇزىلىس ساتىندە كۇمىس جۇلدە الساق دەگەن ءتاتتى ءۇمىتىمىزدى الديلەپ كەتتىك. قىزداردىڭ شاماسىن بايقاپ قالدىق, ءۇشىنشى ورىنداعى كورەي قىزىنان باقانداي 7 كيلو باسىمدىعىمىز بار. مۇنىڭ ءبارى ايتقانعا عانا ەكەن. «ۇيدەگى كوڭىلدى بازارداعى نارىق بۇزادى» دەگەندەي, كحدر-دىڭ قىزى ەسەپ-قيسابىمىزدىڭ بارلىعىن تاس-تالقان ەتتى. سەرپە كوتەرۋدە ءتورتىنشى ورىندا كەلە جاتقان تايلاندتىق قىز ارتىق قىلامىن دەپ تىرتىق قىلدى. ويىندا مەدال الۋ عانا بولعان سپورتشى 132 كيلو سالماققا ءۇش رەت شىعىپ, بوس قايتتى. وبال-اق بولدى. بىراق, بۇل – سپورت. جەڭىس پەن جەڭىلىس قاتار جۇرەدى. سەرپە كوتەرۋدە دەن سوڭىن كۇتتى. گوريچەۆا العاشقى كە­زەگىندە 132 كيلونى العانىمەن, 137 كگ-نى ەكى رەت شىعىپ كوتەرە ال­مادى. حيۋ سيم حوي ءبىرىنشى كەزەگىندە 135 كيلونى ەركىن كو­تەرىپ, كوڭىلىن ءبىر دەمدەپ الدى دا, ءبىزدىڭ قىزدان وزۋدىڭ امال­دارىن جاسادى. ءوزى عانا ەمەس, جاتتىقتىرۋشىلارى دا قىزدىڭ شاماسىن بىلەدى. سو­عان قاراي امال جاساپ جاتىر. اۋەلى كارينامەن تەڭەسۋ ءۇشىن 138 كيلونى ءبىر كوتەرىپ الدى. كورەيالىقتىڭ ءبىزدىڭ قىز­دان سالماعى جەڭىل, كۇمىس مەدال موينىندا دەسە دە بولادى. حيۋ سيم حويدىڭ ويى تاعى بۇزىلىپتى. نەگە التىن جۇلدەگە تالاسىپ كورمەيدى, ءمۇم­كىن بۇيىرىپ تۇرعان شىعار. كورەي جاتتىقتىرۋشىلارى اقىلداسا كەلىپ, وليمپيالىق ويىنداردىڭ رەكوردى – 143 كي­لوعا تاپسىرىس بەردى. قىزدىڭ تارامىس دەنەسى سىڭىردەن جارا­تىلعان با, دەنەسى مايىسىپ بارىپ, زىلتەمىردى كوتەرىپ كەتتى. جولىن بەرە سالاتىن دەن ۆەي ەمەس. اپىل-عۇپىل شىقتى دا 147 كگ سالماقتى تىك كوتەرىپ, كورەي قى­زىنىڭ ورەكپىگەن كوڭىلىن باس­تى دا تاستادى. دەن سوڭعى كەزەگىن پايدالانعان دا جوق. سونىمەن, تارتىس ءبىتتى. قوسسايىس بويىنشا 262 كگ جيناعان دەن ۆەي ەلىنە تاعى ءبىر التىن مەدال سىيلادى. ءبىز ويشا ارمانداعان كۇمىس مەدال سولتۇستىك كورەيانىڭ ەنشىسى ەكەن. حيۋ سيم قوسسايىستا 248 كيلونى باعىندىرعان. ءبىزدىڭ كارينا گوريچەۆا 243 كگ سالماقپەن قولا مەدالعا يە بولدى. وسىلايشا قازاق­ستان وليمپيادا ءوتىپ جات­قان ءتورت كۇندە ءتورت مەدالدى يە­لەندى. جۋرناليستەرگە سۇحبات بەرگەن كارينا گوريچەۆا ءوزىنىڭ شەكسىز باقىتتى ەكەنىن ايتقان. سپورتشىنىڭ بار ارمانى – وليمپيالىق ويىنداردىڭ مەدالىن الۋ. ول قولىندا تۇر. ءوزىنىڭ وتانى الدىنداعى مەرەيلى مىندەتىن ورىندادى, سەنىپ كەلگەن جانكۇيەرلەردى دە جەرگە قاراتقان جوق. «ماعان سەنسەڭىزدەر, ءدال قازىر قۇس بولىپ ۇشىپ جۇرگەندەي سەزىنەمىن ءوزىمدى», دەيدى باقىتتان باسى اينالعان قىز. جىلدار بويى العان جاراقاتتار ۇمىتىلدى, ەندى جاڭا بيىكتەر ءۇشىن كۇرەسەتىن بولادى. الەكسەي ني دا كوڭىلدى. ول ءوزىن تابالاعىسى كەلگەندەردىڭ الدىندا بيىك ەكەندىگىن تاعى دا دالەلدەدى. قازاقستان اۋىر اتلەتيكاسىندا قۋاتتى جاڭا تولقىن ءوسىپ كەلەدى. رەداكتسيادان: كەشە بەت قاتتالىپ جاتقاندا جارىس جولىنا 69 كيلو سالماقتاعى ءۇمىتىمىز جازيرا جاپپارقۇل مەن الەم چەمپيونى نيجات راگيموۆ (77 كگ) شىقتى. وليمپياداداعى ارناۋلى ءتىلشىمىز باقتيار تايجان جازيرا مەن نيجاتتىڭ باسەكەلەرى باستالماي تۇرىپ گازەتكە جولداعان وسى ماقالاسىن: «10 تامىز – قازاقستان اۋىر اتلەتتەرى ءۇشىن شەشۋشى كۇن. ايتقانى قاتە كەتپەيتىن باس جاتتىقتىرۋشى ءبارىمىزدىڭ كوڭىلىمىزدى كوتەرىپ تاستادى. قازاق مۇندايدا «اۋزىڭا ماي, استىڭا تاي» دەپ ىرىمداپ جاتادى. ەكەۋى دە – ءوز باۋىرىمىز. ەلىمىزدىڭ نامىسىن بۇكىل دۇنيەجۇزىلىك الاماندا قورعاپ جاتىر. كەشە عانا بالۋانىمىز ەلدوس سمەتوۆ التىننىڭ سىڭعىرىن ەستىپ ەدى. سىنىق سۇيەم عانا جەتپەي قالعان. قازاق – كوڭىلى سالقار دالاسىنداي كەڭ, دوسقا قۇشاعى ىستىق, تارىققانعا استىنداعى جالعىز اتىن مىنگىزىپ جىبەرەتىن دارحان حالىق. قۇداي قوس كورسە, قازاق سپورتى تاريحىنداعى التىن پاراقتى جازيرا قىزىمىز اشسا دەگەن جاقسى تىلەكتىڭ ۇستىندە وتىرمىز», دەپ قورىتىندىلادى. «ەگەمەن قازاقستاننىڭ» ارناۋلى ءتىلشىسى باقتيار تايجان ريو-دە-جانەيرودان حابارلايدى

جۇلدەلەر جيىنتىعى

(10 تامىزداعى مالىمەت بويىنشا)

 

№	قۇرامالار	التىن	كۇمىس	قولا	بارلىعى
1	اقش	9	8	9	26
2	قىتاي	8	3	6	17
3	ۆەنگريا	4	1	1	6
4	اۆستراليا	4	0	5	9
5	رەسەي	3	6	3	12
6	يتاليا	3	4	2	9
7	كورەيا	3	2	1	6
8	جاپونيا	3	1	10	14
9	فرانتسيا	2	3	1	6
10	تايلاند	2	1	1	4
11	ۇلىبريتانيا	1	3	2	6
12	گەرمانيا	1	2	0	3
12	شۆەتسيا	1	2	0	3
14	برازيليا	1	1	0	2
15	قىتاي تايپەيى	1	0	2	3
16	بەلگيا	1	0	1	2
16	گرەكيا	1	0	1	2
16	نيدەرلاند	1	0	1	2
19	ارگەنتينا	1	0	0	1
19	كولۋمبيا	1	0	0	1
19	حورۆاتيا	1	0	0	1
19	كوسوۆو	1	0	0	1
19	سلوۆەنيا	1	0	0	1
19	ۆەتنام	1	0	0	1
25	يندونەزيا	0	2	0	2
25	جاڭا زەلانديا	0	2	0	2
25	كحدر	0	2	0	2
25	وڭتۇستىك افريكا	0	2	0	2
29	كانادا	0	1	4	5
30	قازاقستان	0	1	3	4
31	ۋكراينا	0	1	1	2
32	ازەربايجان	0	1	0	1
32	دانيا	0	1	0	1
32	مالايزيا	0	1	0	1
32	موڭعوليا	0	1	0	1
32	فيليپپين	0	1	0	1
32	سلوۆاكيا	0	1	0	1
32	تۇركيا	0	1	0	1
39	وزبەكستان	0	0	2	2
40	يسپانيا	0	0	1	1
40	گرۋزيا	0	0	1	1
40	يزرايل	0	0	1	1
40	قىرعىزستان	0	0	1	1
40	پولشا	0	0	1	1
40	پورتۋگاليا	0	0	1	1
40	شۆەيتساريا	0	0	1	1
40	بىرىككەن اراب امىرلىكتەرى	0	0	1	1