وپپوزيتسيا شەكارا كەلىسىمىنە نەگە قارسى؟
كوسوۆودا پارلامەنت وتىرىسىندا وپپوزيتسيا چەرنوگوريامەن شەكارانى دەماركاتسيالاۋ تۋرالى كەلىسىمنىڭ قابىلدانۋىنا كەدەرگى كەلتىرۋ ءۇشىن وتىرىس ءوتىپ جاتقان زالعا كوزدەن جاس اعىزاتىن گاز شاشىپ جىبەردى.
«رەيتەر» اقپارات اگەنتتىگىنىڭ حابارلاۋىنشا, سول كەزدە بىرنەشە ادام پارلامەنت عيماراتىنا تاس لاقتىرعان. ال ەلدىڭ پرەمەر-ءمينيسترى يسا مۇستافا بەلگىسىز ادامدار شەكارا ماسەلەلەرىمەن اتسالىساتىن كوميسسيا باسشىسىنىڭ ۇيىنە جارىلعىش زات قويىپ كەتكەنىنەن حاباردار ەتتى. وپپوزيتسياداعىلار بۇعان دەيىن دە پارلامەنتتىڭ چەرنوگوريامەن شەكارانى بەلگىلەۋگە قاتىستى وتىرىسىنا كەدەرگى جاساعان ەدى. شەكارا تۋرالى كەلىسىم كوسوۆو تۇرعىندارىنىڭ ەۋروپالىق وداق ەلدەرىنە ۆيزاسىز كىرۋىنە مۇمكىندىك بەرەدى. بۇل كەلىسىمگە قارسىلار كوسوۆو شەكاراسى دەماركاتسيالانسا, ەل سەگىز مىڭ گەكتار جەرىنەن ايىرىلادى دەگەندى العا تارتادى.
قۇراما شتاتتار بيلىگىنەن باسپانا سۇرادى
ۆيردجينيا شتاتىنداعى ناتو ميسسياسىنا ىسساپارعا جىبەرىلگەن تۇركيا وفيتسەرى اقش بيلىگىنەن باسپانا سۇرادى. دەرەك كوزدەرىنە قاراعاندا, 22 شىلدەدە ول ءوزىنىڭ اسكەري بەلگىلەرى مەن جەكەباسى كۋالىگىن بازادا قالدىرعان.
اتى-ءجونىن اتاماۋدى ءجون كورگەن شەنەۋنىكتىڭ ايتۋىنشا, وفيتسەردى ءوز ەلىنە قايتۋعا شاقىرعان. سودان كەيىن كوپ ۋاقىت وتپەي ول اسكەري بازادان كەتىپ قالعان كورىنەدى. پەنتاگوننىڭ رەسمي وكىلى دجەفف دەۆيس تۇرىك اسكەري قىزمەتشىسىنە بايلانىستى جاعدايدى تۇسىندىرۋگە نيەت تانىتپادى. اقش-تىڭ مەملەكەتتىك دەپارتامەنتى دە وسى ماسەلەگە قاتىستى اقپارات بەرۋدەن باس تارتتى.
تەررورشىل ۇيىم باسشىسىنىڭ ءبىرى ۇستالدى
نەمىس پوليتسەيلەرى «يسلام مەملەكەتى» تەررورشىل توپتارى باسشىسىنىڭ ءبىرىن ۇستادى. ول گەرمانيا اۋماعىندا سودىرلاردىڭ مۇددەسىنە وكىلدىك ەتكەن سياقتى.
پوليتسەيلەر ىزدەۋدە جۇرگەن بۇل قىلمىسكەردى الدىن-الا تۇسكەن اقپاراتتار بويىنشا جوسپارلانعان ارنايى وپەراتسيا بارىسىندا قولعا تۇسىرگەن. تەرگەۋشىلەردىڭ سوزىنە قاراعاندا, راديكالدار فۋتبولدان ەل چەمپيوناتى باستالعان تۇستا شابۋىل جاساۋدى جوسپارلاعان بولۋى مۇمكىن. بۋندەسليگا كوماندالارىنىڭ كەزدەسۋى 26 تامىزدا باستالادى. تەررورشىلاردىڭ بۇل ەلگە جاساعان شابۋىلدارىن كوپشىلىك ۇمىتا قويعان جوق.
قىسقا قايىرىپ ايتقاندا:
- يراكتىڭ استاناسى – باعدادتا اۋرۋحانا عيماراتى ورتەنىپ, دۇنيە ەسىگىن جاڭادان اشقان 11 نارەستە قىزىل جالىننىڭ قۇربانى بولدى. ءورت اۋرۋحانانىڭ پەرزەنتحاناسىندا تۇنگە قاراي شىققان.
- بۇۇ سيريانىڭ الەپپو قالاسىندا سوعىستى ۋاقىتشا توقتاتىپ, «گۋمانيتارلىق ءۇزىلىس» جاساۋعا شاقىردى. سەيسەنبى كۇنى قالادا ۇرىس سالدارىنان سۋ جانە ەلەكتر ەنەرگياسىن تاراتۋ جۇيەلەرى ىستەن شىققان ەدى.
- اۆستراليانىڭ نيۋپورتە قالاسىندا اينەكتەن مەشىت ءۇيى سالىنادى. ازىرگە بۇل جوبانى ەگدە جاستارداعى مۇسىلماندار تولىق قۇپتاي قويعان جوق.
- كاليفورنيا ۋنيۆەرسيتەتىنىڭ رەكتورى نيكولاس ديركاس, ەگەر ستۋدەنتتەر نارازىلىق اكتسياسىنا شىققان جاعدايدا «قاشىپ قۇتىلۋ» ءۇشىن جەراستى جولىن قازدىرىپتى. وعان رەكتور ۋنيۆەرسيتەت بيۋدجەتىنەن 9 مىڭ دوللارعا جۋىق اقشا شىعىنداعان.
داۋلى ارالدارعا زىمىران ورنالاستىردى
ۆەتنام قۇپيا جاعدايدا وزدەرىنىڭ زىمىران قوندىرعىلارىن وڭتۇستىك-قىتاي تەڭىزىندەگى داۋلى ارالدارعا ورنالاستىردى. بۇل اقپاراتتى «رەيتەر» اگەنتتىگى تاراتتى.
اقپاراتتا اتاپ وتىلگەندەي, ۆەتنام سپراتلي ارالىنا زىمىران قوندىرعىلارىن قۇپيا تۇردە جەتكىزىپ, ولاردى بەس بازاعا ورنالاستىرىپتى. ەندى قوندىرعىلار ەكى-ءۇش كۇندە اسكەري دايىندىققا كەلتىرىلەتىن سياقتى. زىمىران قوندىرعىلارىنىڭ داۋلى ارالدار اۋماعىنا ورنالاستىرىلۋى قىتاي اسكەريلەرىنىڭ وسى اۋماققا قاتىسۋىنا تىكەلەي بايلانىستى. اسكەري بايقاۋشىلاردىڭ باعالاۋىنشا, ۆەتنامنىڭ بۇل ارەكەتى وڭتۇستىك-قىتاي تەڭىزىندەگى داۋلى ارالدارعا قاتىستى سوڭعى ونجىلدىقتا جاساعان ەڭ ماڭىزدى قادامى بولىپ تابىلادى.
كورەيا دا يادرولىق دەرجاۆاعا اينالۋى مۇمكىن
ەگەر سولتۇستىك كورەيا اتوم بومباسىن جاساۋدى جالعاستىرا بەرەتىن بولسا, وڭتۇستىك كورەيا دا يادرولىق قارۋمەن قارۋلانۋدى قولعا الاتىن بولادى.
كورەيا رەسپۋبليكاسى بىرلەسكەن مينيسترلىگىنىڭ ساياسي ماسەلەلەر بويىنشا باس ديرەكتورى لي توك حەن اۆستراليالىق باسىلىمدا جاريالانعان ماقالاسىندا وسى ماسەلەگە ارنايى توقتالعان. ساياساتكەر, سونداي-اق, كحدر-ءدىڭ يادرولىق دەرجاۆاعا اينالۋى سولتۇستىك كورەيانى دا, جاپونيانى دا يادرولىق قارۋ جاساۋدى باستاۋعا ءماجبۇر ەتۋى مۇمكىن ەكەندىگىن اتاپ وتكەن. «وسىنىڭ بارلىعى كورەي تۇبەگىنىڭ قاۋىپسىزدىگىنە وراسان زور قاتەر توندىرەدى», – دەپ ەسكەرتەدى لي توك حەن. وڭتۇستىك كورەيا ۇكىمەتى بۇگىنگى كۇنگە دەيىن يادرولىق قارۋ جاساۋعا قارسى بولىپ كەلدى. ال سولتۇستىك كورەيا ءوز جوسپارىن جۇزەگە اسىرۋدى توقتاتار ەمەس.
تۇركيادا تاعى دا جارىلىس بولدى
تۇركيا قاۋىپسىزدىك قىزمەتىنىڭ وكىلدەرى ەلدىڭ وڭتۇستىك-شىعىسىنداعى جارىلىستان ءۇش اسكەري قىزمەتشى قازا تاپقانىن راستادى.
جارىلىس كەشە ەلدىڭ يراكپەن شەكاراسىنا جاقىن شيرناك پروۆينتسياسىنىڭ ۋلۋدەرە اۋدانىندا بولعان. بروندى اسكەري تەحنيكا جولمەن كەلە جاتقاندا جول جيەگىنە جاسىرىلعان قولدان جاسالعان بومبا جارىلىپتى. بۇل تەررورلىق اكتىنى تۇركيا اۋماعىندا تىيىم سالىنعان كۇردستان جۇمىسشى پارتياسىنىڭ جاساقتارى جاساۋى مۇمكىن دەگەن بولجام ايتىلۋدا.
ينتەرنەت ماتەريالدارى نەگىزىندە ازىرلەندى
