ۇلاعاتى مول ۇلىلاردىڭ ءبىرى ەدى

ءسۇيىنباي ەراليەۆپەن قوشتاسۋ بەينەلەپ ايتساق, حالىق – الىپ تاۋ, ال حالىقتىڭ اتىن قايتالانباس حاس تالانتىمەن اسقاقتاتقان ۇلاعاتى مول ۇلى تۇلعالار – الىپ تاۋدىڭ اقالاباسىن كۇن سۇيگەن اقباس شىڭى. توسەكتە باسى, توسكەيدە مالى قوسىلعان باۋىرلاس قىرعىز حالقىنىڭ شىرقاۋ بيىكتە تۇرعان تاعى ءبىر شىڭى قۇلادى – جارىق دۇنيە دەيتىن وپاسىز جالعانعا قولىن ءبىر سىلتەپ, ءسۇيىنباي ەراليەۆ ءوتتى ومىردەن ... وسىدان ءۇش اي شاماسى بۇرىن بىشكەكتەن تەلەفون شالعان قالامداس دوسىم, قىرعىزدىڭ شوڭ اقىنى مارحاباي ااماتوۆ: ءسۇيىنباي بايەكە كەشە بىزدەرگە «ەندى سويلەي دە الماسپىن», قازاقستانداعى قازىر جەر باسىپ جۇرگەن ەكى دوسىم مۇزافار الىمباەۆ پەن ءسابيت دوسانوۆ, مەن باقيلىق بولعاندا حابارلاسارسىڭدار, – دەپ بىزدەرگە وسيەت ايتتى. بۇگىن كومادا جاتىر, – دەپ ەدى. ءسۇيىنباي اعا قازاق قالامگەرىمەن تىعىز قارىم-قاتىناستا بولدى. اسىرەسە, سىرباي ماۋلەنوۆپەن دوستىعى ەرەكشە ەدى. ەكەۋى ءبىرىنىڭ جاۋھار جىرلارىن ءبىرى اۋداردى. وتكەن عاسىردىڭ سەكسەنىنشى جىلدارى قىرعىز ادەبيەتىنىڭ قازاقستانداعى كۇندەرىنە قاتىسقان دەلەگاتسيانى ءسۇيىنباي اعا باستاپ كەلدى. سول جولى قىزدار پەداگوگيكالىق ينستيتۋتىندا وتكەن ادەبي كەشتى مەن جۇرگىزىپ ەدىم, ءسىرا دا ەستەن كەتپەيتىن سول ءبىر ساۋلەلى ساتتە باستالعان تانىستىعىمىز كىر شالماعان قىلاۋسىز دوستىققا ۇلاسىپ ەدى. 2006 جىلى بىشكەكتە شىعارماشىلىق كەشىم وتكەندە دە قولداۋ كورسەتىپ, اعىنان جارىلىپ, اق باتاسىن بەرگەن اياۋلى اعا-دوسىم ەدى سۇيەكەڭ. ەڭ باستىسى – قىرعىز بەن قازاقتىڭ دوستىعى نىعايا بەرۋى ءۇشىن قالامىمەن دە, قايراتكەرلىگىمەن دە تالماي قىزمەت ەتتى ول! «باسىنان اركىمنىڭ بۇل جالعان وتەر» دەپ ەدى-اۋ قوجا احمەت ياساۋي. سول جالعاننان قىرعىز الاتاۋىنىڭ بيىك شىڭى ءسۇيىنباي ەراليەۆ تە ءوتتى. قىرعىزستاننىڭ حالىق باتىرى التىن جۇلدىزى باستاعان اتاقتار دا قالدى جالعاندا. جالعىز جۇبانىش – حالىقپەن بىرگە جاساي بەرەتىن ادەبي مول مۇرا. «ءتان كومىلەر, كومىلمەس ەتكەن ءىسىم» دەپتى ۇلىلاردىڭ ءبىرى. ۇلىلار ۇلتقا بولىنبەيدى. ۇلتى – قىرعىز, جانى – قازاق ءسۇيىنباي ەراليەۆ باۋىرلاس حالىقتاردىڭ ورتاق ماقتانىشى بولىپ كەلەر ۇرپاق, كەمەل تاريحپەن بىرگە جاساي بەرەدى. قوش بول, قوشتاسۋعا قيمايتىن اقىلمان, اسىل اعا! ءسابيت دوسانوۆ