ءبىلىم كرەديتى – بالاما مۇمكىندىك

اعىمداعى جىلى ءبىلىم گرانتىنا يە بولا الماعان تالاپكەرلەر وقۋدىڭ اقىسىن تولەۋدە قارجى جاعىنان قينالعان جاعدايدا ءبىلىم بەرۋ كرەديتتەرىن كەپىلدەندىرۋدىڭ مەملەكەتتىك باعدارلاماسىنا جۇگىنىپ, جىلدىق 10%-دان باستالاتىن پايىزدىق مولشەرلەمەمەن 12 جىلعا دەيىنگى مەرزىمگە قازاقستان رەسپۋبليكاسى ءبىلىم جانە عىلىم مينيسترلىگى «قارجى ورتالىعى» اق-تىڭ (بۇدان ءارى – قارجى ورتالىعى) كەپىلدىگىمەن نەسيە رەسىمدەي الادى. قارجى ورتالىعىنىڭ كەپىل­دىگىمەن ۇسىنىلاتىن ءبىلىم بەرۋ كرەديتتەرى تالاپكەرلەرگە دە, قازاقستاننىڭ بۇكىل جوو-لارى مەن كوللەدجدەرىنىڭ بارلىق وقۋ ۇلگى­سىندەگى ستۋدەنتتەرىنە دە بەرىلەدى. قازىرگى تاڭدا ءبىلىم بەرۋ كرە­ديتتەرى قارجى ورتالىعىمەن سەرىكتەس بانكتەردە ءارتۇرلى شارتتارمەن ۇسىنىلادى. باعدارلامانىڭ قولدانىلۋ اۋقىمى كەڭ, سەرىكتەس بانكتەر رەسپۋبليكانىڭ بارلىق ايماقتارىندا جۇمىس جاسايدى. كرەديتتىڭ بەرىلۋ تەتىگى بىردەي: قارىز الۋشى بانككە بارىپ كەڭەس الادى, رەسىمدەۋگە قاجەتتى قۇجاتتاردى جيناپ, ولاردى بانككە تاپسىرادى. ءبىلىم بەرۋ كرەديتى قاجەتتىلىگىنە قاراي ءار سەمەستر نەمەسە جىل سايىن وقۋ ورنىنىڭ ەسەپشوتىنا اۋدارىلادى. الايدا, قارجى ورتالىعىنىڭ كەپىلدىگىمەن ءبىلىم بەرۋ كرەديتىن الۋ ءۇشىن ءبىر نەمەسە ەكى قوسالقى قارىز الۋشىنىڭ بولۋى تالاپ ەتىلەدى. بۇل جەردە قوسالقى قارىز الۋشىنىڭ تولەۋگە قابىلەتتىلىگى, ياعني نەگىزگى جۇمىس ورنى بويىنشا الاتىن تابىسى ەسكەرىلەدى. كرەديتتىڭ سوماسىنا شەكتەۋ قويىلمايدى, باستىسى – بارلىق وقۋ كەزەڭى ءۇشىن وقۋ قۇنىنان اسپاسا بولعانى. ەرەكشە اتاپ وتەرلىگى, بۇل باعدار­لامادا جەڭىلدىك كەزەڭى بەرىلەدى, ياعني وقۋ كەزەڭى مەن وقۋدى بىتىرگەننەن كەيىن كرەديتتى تولەۋ مەرزىمى 6 ايعا كەيىنگە شەگەرىلەدى. كرەديتتى كەز كەلگەن ۋاقىتتا مەرزىمىنەن بۇرىن وتەۋگە بولادى, ول ءۇشىن ايىپپۇل سانكتسيالارى قولدانىلمايدى. ءبىلىم بەرۋ كرەديتتەرىن كەپىل­دەن­دى­رۋ­دىڭ مەملەكەتتىك باعدارلاماسى وسىن­داي بالاما مۇمكىندىك بەرە وتىرىپ, سونىڭ ارقاسىندا ستۋدەنت ءوز كۇ­شى­مەن ءوز بولاشاعىن جوسپارلاي الادى. «ەگەمەن-اقپارات»