گرانت كىمگە بۇيىرادى؟

ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە ءبىلىم گرانتتارىن ءبولۋ جونىندەگى رەسپۋبليكالىق كونكۋرستىق كوميسسيانىڭ وتىرىسى ءوتتى. ءبىلىم جانە عىلىم ءمينيسترى ەرلان ساعاديەۆتىڭ توراعالىعىمەن وتكەن كوميسسيا وتىرىسىندا ەلىمىزدىڭ جوو-نا قابىلداۋ جونىندەگى جۇمىس قورىتىندىلاندى. مينيستر كوميسسيانىڭ ءوز جۇمىسىندا ەلىمىزدىڭ الەۋمەتتىك-ەكونوميكالىق دامۋ باسىمدىقتارىنا – ەڭ الدىمەن, ەلباسىنىڭ باستاماسىمەن جۇرگىزىلىپ جاتقان قازاقستاننىڭ يندۋستريالىق-يننوۆاتسيالىق دامۋى, سونداي-اق, ەلىمىزدىڭ اگروونەركاسىپ كەشەنىنىڭ دامۋ ماقساتتارىن ىسكە اسىرۋ قاجەتتىلىكتەرىنە نازار اۋدارعاندىعىن اتاپ ءوتتى. اتالعان باسىمدىقتار ەس­كەرىلە وتىرىپ, 12 593 گرانت تەحنيكالىق جانە تەح­نو­لوگيالىق ماماندىقتارعا, 5 000-عا جۋىق گرانت – پەدا­گوگيكالىق, 2 690 گرانت – اۋىل شارۋاشىلىعى جانە ۆەتەريناريا ماماندىقتارىنا, 3000 گرانت – مە­دي­تسينالىق ماماندىقتارعا بولىنگەنىن تىلگە تيەك ەتتى. «بيىل جالپى 31 702 گرانت ءبولىنىپ وتىر, ونىڭ ىشىندە, 2 950 گرانت – جوو دايىندىق بولىمدەرىندە وقۋعا, 28 752 گرانت – جوو-نىڭ 1-كۋرستارىندا وقۋعا (كۇندىزگى وقۋ بولىمدەرىنە – 28 452, سىرتتاي وقۋ بولىمدەرىنە – 300 گرانت). وقۋ گرانتتارى 87 جوو-عا ءبولىندى. وتكەن جىلى 64 وقۋ ورنى قامتىلعان ەدى. وقۋ گرانتتارىن الۋ كونكۋرسىنا 59 677 ادام قاتىستى. ولاردىڭ 47 342 – قازاق تىلىندە, 12 335-ءى ورىس تىلىندە وقيدى. «ماڭگىلىك ەل جاستارى – يندۋستريا­عا!» جوباسى اياسىنداعى كۆوتا بويىنشا وتكىزىلەتىن كونكۋرس­­تا 9 797 ادام باق سىنايدى. ولاردىڭ ىشىندە 2 208 «التىن بەلگى» يە­گەرلەرى, 303 كوللەدج تۇلەكتەرى, 169 حالىقارالىق جانە رەسپۋبليكالىق وليمپيادالارىنىڭ جەڭىمپازدارى, 854 حالىقارالىق جانە رەسپۋبليكالىق عىلىمي جارىستاردىڭ جەڭىمپازدارى, 948 حالىقارالىق جانە رەسپۋبليكالىق سپورتتىق جارىستاردىڭ جەڭىمپازدارى, 9 پرەزيدەنتتىك وليمپيادانىڭ جەڭىمپازدارى بار. سونىمەن قاتار, كونكۋرسقا 492 جەتىم بالا, 363 I جانە II توپ مۇگەدەكتەرى, 37 سوعىس ارداگەرلەرىنە تەڭەستىرىلگەندەر ساناتىنداعى ابي­تۋريەنتتەر, 1053 قر ازاماتتىعى جوق قازاق ۇلتى وكىلدەرى قاتىسادى. ولارعا كۆوتالار بەلگىلەنىپ وتىر», – دەدى ە.ساعاديەۆ. بيىلعى ءبىلىم گرانتتارى يەگەرلەرىنىڭ ەسىمدەرى دە جىل­داعى ءداستۇر بويىنشا بۇقارالىق اقپارات قۇ­رال­­دارىندا جاريالاناتىنىن ەستەرىڭىزگە سالامىز. راۋان قايدار, «ەگەمەن قازاقستان»