ەلەكتروندى ۇكىمەتىمىز ۇزدىك وندىقتا

قازاقستان ەلەكتروندى ۇكىمەتتى دامىتۋ جونىنەن ازيا مەملەكەتتەرىنىڭ اراسىندا 7-ورىنعا شىقتى. بۇل تۋرالى بۇۇ-نىڭ ەلەكتروندى ۇكىمەتتەردىڭ دامۋ دەڭگەيى تۋرالى ەسەبىندە ايتىلعان. ءبىزدىڭ الدىمىزدا ازىرگە وڭتۇستىك كورەيا, سينگاپۋر, جاپونيا, يزرايل, باحرەين جانە بىرىككەن اراب امىرلىكتەرى  تۇر. ال وسى ەلەكتروندى ۇكىمەتتى دامىتۋعا قاتىستى جاھاندىق رەيتينگتە قازاقستان تمد ەلدەرىنىڭ بارلىعىن باسىپ وزىپ, 33-ورىنعا ىلىككەن. بۇل ورايداعى كوش تىزگى­نىن ۇلىبريتانيا باستاسا, ودان كەيىنگى ورىنداردا اۆستراليا مەن وڭتۇستىك كورەيا ورنىققان. جاھان­دىق رەيتينگتە اقش  12-ورىن­دا, رەسەي  35- ورىندا, قىتاي 63-ورىندا, وزبەكستان مەن قىرعىزستان 80 جانە 97-ورىندارعا جايعاسقان. بۇۇ ەلەكتروندى ۇكىمەت­تەر­دىڭ دامۋ يندەكسى (EGDI) – مەملەكەتتەردىڭ اقپاراتتىق جانە كوممۋنيكاتسيالىق تەحنولوگيالار ارقىلى ازاماتتارعا مەملەكەتتىك قىزمەتتەر كورسەتۋ الەۋەتىن جانە وسى قىزمەتتەردى كورسەتۋگە دەگەن ازىرلىك دەڭگەيىن باعالايتىن كەشەندى كورسەتكىش. وسىنداي ماڭىزدى كورسەتكىش­تە  قازاقستاننىڭ كومپوزيتتىك يندەكسى بيىل 0,7250 بالل بولسا, جاھاندىق ورتاشا EGDI بالى 0,4922 دەڭگەيىنە جەتكەن. بۇل يندەكس ادام كاپيتالىنىڭ دامۋى, تەلەكوممۋنيكاتسيالىق ينفرا­قۇرىلىم جانە ونلاين قىزمەتتەر سياقتى 3 كورسەتكىشتەن قۇرالادى. رەيتينگ پەن وعان قاتىستى كورسەت­كىشتەردى ءار ەكى جىل سايىن بۇۇ ساراپشىلارى ەسەپتەپ, ناتيجەسىن جاريالاپ وتىرادى.  «ەگەمەن-اقپارات»