ەلىمىزدە اسكەري ويىندارعا قاتىسقان انگولا ساربازى قازا بولدى

[caption id="attachment_54233" align="aligncenter" width="640"] inform.kz[/caption] قازاقستانداعى اسكەري حالىقارالىق ويىنداردا جاراقات العان انگولا جاۋىنگەرى اۋرۋحانادا كوز جۇمدى. Inform.kz-ءتىڭ مالىمەتى بويىنشا, اسكەري حالىقارالىق ويىنداردىڭ قاتىسۋشىسى, انگولا قارۋلى كۇشتەرىنىڭ اسكەري قىزمەتكەرى, قاتارداعى جاۋىنگەر فرانتسيشكو دجوردج اۋرۋحانادا قايتىس بولعان. ەلىمىز قورعانىس مينيسترلىگىنىڭ ءباسپاسوز قىزمەتى حابارلاعانداي, ول بىرنەشە كۇن بۇرىن جاتتىعۋ كەزىندە اۋىر جاراقات العان. حالىقارالىق اسكەري ويىندارعا دايىندىقتاعى جاتتىعۋ اتۋلارىن وتكىزۋ كەزىندە انگولا كومانداسىندا مينومەت اتىلعان. كوماندانىڭ قاۋىپسىزدىك شارالارىن بۇزۋىنان جانە مينومەتتى ەكى رەت وقتاعاندىقتان, سنارياد جارىلعان. وقيعا بولعان كۇنى وتار اسكەري گوسپيتالىنە جەدەل تۇردە الماتىلىق حيرۋرگتەر جەتكىزىلدى. سونداي-اق رەسەيدەن ماماندار بريگاداسى كەلىپ, اسكەري قىزمەتكەرگە وتا جاسادى. دارىگەرلەر جاۋىنگەردىڭ ءومىرىن ساقتاپ قالۋعا قانشا كۇش سالعاندارىمەن, وكىنىشكە وراي, ول العان جاراقاتتارىنان كوز جۇمدى. ايدار ورىسباەۆ