وليمپيادانىڭ باستالۋىنا
3 كۇن قالدى
بەكەت ماحمۋتوۆ: سپورتشىلاردىڭ
قارىمىنا سەنەمىن
ءدال قازىرگى تاڭعا ريو-دە-جانەيروداعى وليمپيالىق ويىنداردا قازاقستاننىڭ نامىسىن 104 سپورتشى سايىستىڭ 26 ءتۇرى بويىنشا قورعاعالى تۇرعانى بەلگىلى بولىپ وتىر. ال ويىندار الاۋىنىڭ تۇتاتىلار شاعىنا نەبارى 3 كۇن عانا قالدى.
ايتۋلى الامان الدىندا كوڭىلدە كۇدىك تە كوپ, ءۇمىت تە جەتكىلىكتى. كۇدىكتىڭ بوي كوتەرەتىنى, كۇنى كەشە عانا ريودا ويىنداردىڭ اشىلۋ سالتاناتىنا ارنالعان باس رەپەتيتسيا مۇندا ءالى كەمشىلىكتەر بار ەكەنىن كورسەتىپ بەردى. سونىڭ ەڭ كۇپتىسى, قاۋىپسىزدىك شارالارى جەتكىلىكسىز سياقتى. بۇعان الاۋگەرگە جاسالعان شابۋىلعا بايلانىستى كوتەرىلگەن دابىلعا پوليتسەيلەردىڭ ءبىر ساعاتتان كەيىن عانا جەتكەنى دالەل. دەگەنمەن, ۇيىمداستىرۋشىلار قازىر ويىندار كەزىندە قالا كوشەلەرىن 85 مىڭ پوليتسەي مەن اسكەري قىزمەتكەر كۇزەتەتىنىن ايتىپ, ءبارى دۇرىس بولاتىنىنا سەندىرىپ باعۋدا. ال ءۇمىتتىڭ جەتكىلىكتىلىگىنە ءبىزدىڭ تالاي سىننان وتكەن تارلاندارىمىز وسى كەزدەگى قيىن-قىستاۋ شاقتاردا دا العان باعىتتارىنان تايمايتىندارى سەبەپ. ەل نامىسى بۇل جولى دا ابىرويمەن قورعالاتىنىنا سەنىم مول.
كەزىندە قازاق بوكسشىنىڭ حالىقارالىق ارەنالاردا جارقىراپ كورىنۋىنە بەلگىلى مامان بەكەت ماحمۋتوۆتىڭ قانداي ەڭبەك سىڭىرگەنىن جاقسى بىلەمىز. ول ءبىزدىڭ بىلعارى قولعاپ شەبەرلەرىنە ءوزى قولداپ جۇلدە اپەرمەسە دە, ولاردىڭ تورەشىلەر تەپكىنىنە ءتۇسىپ, ادىلەتسىز شەشىمنىڭ شىلاۋىندا كەتىپ قالماۋلارىنا ايتارلىقتاي اسەر ەتتى. سونىڭ ارقاسىندا قانشاما تارلاندارىمىز شارشى الاڭدا قايمىقپاي شايقاسىپ, وزدەرىنە تيەسىلى بيىكتەرىن باعىندىرىپ الىپ جاتتى.
مىنە, سول بەكەت ساپابەك ۇلىنىڭ ءپىكىرىنشە, قازاقستاننىڭ ءدال قازىرگى وليمپيالىق قۇراماسى جەر-جاھاننىڭ ەڭ ءىرى جارىسىنىڭ تورىنەن تابىلىپ, ونىڭ ءبىراز بيىكتەرىن باعىندىرۋعا قابىلەتتى. ءبىزدىڭ تەرمە جاماعاتتىڭ مۇنداعى الەۋەتى ۇلكەن. سوندىقتان, ول ساڭلاقتارىمىزدىڭ ريو جەرىنەن ولجالى ورالاتىنىنا وتە سەنىمدى بولىپ وتىر. – مەن ءبىزدىڭ سپورتشىلاردىڭ بۇل وليمپيالىق ويىندارداعى الەۋەتى وتە ۇلكەن دەپ ەسەپتەيمىن, – دەدى ول ءسوزىنىڭ باسىندا. – كوماندا قۇرامىنداعى ءاربىر سپورتشىنىڭ جوعارى ناتيجە كورسەتۋگە مۇمكىندىگى بار. قازاقستان سپورتىنىڭ فلاگماندارى ءبىزدى بۇعان دەيىنگى وليمپيادالاردىڭ بارلىعىندا ايرىقشا قۋانتىپ كەلگەن ەدى. ەندى سول ءداستۇردىڭ جالعاسا تۇسەتىنىنە, ريوداعى ءتورت جىلدىق تسيكلدىڭ باستى جارىسىنان كوماندانىڭ ەڭسەسى بيىك, مارتەبەسى جوعارى بولىپ ورالاتىنىنا ءوز باسىم ەشقانداي كۇمان كەلتىرمەيمىن. بىزگە مۇنداي كوتەرىڭكى كوڭىل-كۇيدى بوكسشىلار, پالۋاندار, اۋىر اتلەتتەر, جەڭىل اتلەتتەر, مەرگەندەر, ەسكەك ەسۋشىلەر, تەننيسشىلەر, سونداي-اق, سپورتتىڭ باسقا دا تۇرلەرىنىڭ وكىلدەرى سىيلايدى. مۇنداي تابىستارعا سپورتشىلارىمىزدىڭ كەز كەلگەنى جەتۋى مۇمكىن. بۇعان وسىعان دەيىن وليمپيادالارداعى جەتىستىكتەر ايعاق. ءبىز ونىڭ جارقىن ۇلگىسىن اتلانتادا دا, سيدنەيدە دە, افينادا دا, بەيجىڭدە دە, لوندوندا دا كوردىك. كۇللى الەم سولاردىڭ بارىندە ەلىمىزدىڭ اسپان تۇستەس كوك تۋىنىڭ شىرقاۋ بيىكتە جەلبىرەگەنىنە كۋا بولعان. سودان بەرى اتلەتتەرىمىز جاھاننىڭ باستى جارىسىندا وزدەرىنىڭ جوعارى ناگرادالار ءۇشىن كۇرەسە بىلەتىندىكتەرىن كورسەتىپ كەلدى. ولار قازىر وزدەرىنە وتانداستارى تۇگەل كوز تىگىپ وتىرعاندارىن, اربىرىنەن جەڭىس جولىندا ءبارىن سالۋدى تىلەپ جۇرگەندەرىن, ەندى ريودان دا جانعا جاعىمدى جاڭالىقتار كۇتەتىندەرىن جاقسى سەزىنەدى. قازاقستان سپورتشىلارىنىڭ ءدۇبىرلى دودادا جەڭىسكە جەتۋلەرى ءبىزدىڭ قوعامدى بۇرىنعىدان بەتەر توپتاستىرىپ, وتانداستار اراسىنداعى تاتۋلىق پەن جاقىندىقتى ۇلعايتا تۇسەدى.
– بەكەت ساپابەك ۇلى, ەندىگى ءسوزدى بىلعارى قولعاپ شەبەرلەرىنە قاراي بۇرساق. ءبىزدىڭ ەلىمىز تاۋەلسىزدىك العان جىلداردان بەرى ولاردىڭ اراسىندا وليمپيالىق ويىنداردا ەڭ جوعارى ناگرادا الىپ قايتپاعان كەزى جوق. بۇعان دەيىن بەس وليمپيادادان دا ولار ايدارلارىنان جەل ەسىپ ورالدى. ال ءسىز ريو-دە-جانەيرودان نە كۇتەسىز؟
– مەن ولاردىڭ وسى جولى دا جەڭىستىڭ ەڭ بيىك تۇعىرىنان تابىلۋلارىن كۇتەمىن. قازاقستان بوكسشىلارى جاڭا ايتىلعان بەس وليمپيادادان 6 التىن, 5 كۇمىس جانە 6 قولا مەدال الىپ قايتتى. سيدنەيدە باس جۇلدە سانى ەكەۋ بولسا, قالعاندارىنان ءبىر-ءبىر جوعارى ساپالى مەتالمەن ورالدىق. وسىنىڭ ءوزى ءبىزدىڭ ەلىمىزدىڭ الەم بوكسى ليدەرلەرىنىڭ قاتارىنان تابىلۋىنا جول سالىپ بەردى. ەندى ريودا سول جولدى تابىستى جالعاستىرۋعا تولىق مۇمكىندىك بار. قۇراما كوماندانىڭ باس جاتتىقتىرۋشىسى مىرزاعالي ايتجانوۆ كەمىندە ەكى التىن مەدالمەن ورالاتىندارىن ايتقان ەكەن, مەنىڭ بۇعان قوسىپ-الارىم جوق.
سوڭعى جىلدارى تيمۋر ق ۇلىباەۆ باسشىلىق جاسايتىن قازاقستان بوكس فەدەراتسياسى سپورتتىڭ بۇل ءتۇرى وكىلدەرىنىڭ جانكۇيەرلەردى لايىم قۋاندىرا بەرۋلەرى جولىندا ۇلكەن ەڭبەكتەر جاساپ كەلەدى. قۇراما ساپىندا قازىر دە وتە جاقسى اتلەتتەر جەتەرلىك. ولاردىڭ كەز كەلگەنى ءتۋرنيردىڭ جوعارى ماراپاتى ءۇشىن كۇرەسە الادى. وسى ورايدا تەك بوكسشىلار عانا ەمەس, سپورتتىڭ باسقا تۇرلەرى وكىلدەرىنىڭ دە رەسپۋبليكا قورجىنىنا ولجا سالۋلارىنا تىلەكتەستىك بىلدىرەمىن. قازىرگى تاڭدا قازاقستاندا سپورت بارلىق باعىتتاردا جۇيەلى دە جوسپارلى تۇردە دامىپ كەلەدى. بۇل رەتتە ءوز جۇمىسىندا ۇدايى ءتيىمدى مەنەدجەرلىك جانە شىنايى ءپاتريوتيزمنىڭ ۇلگىسىن كورسەتىپ كەلە جاتقان قازاقستان ۇلتتىق وليمپيالىق كوميتەتىنىڭ اتىنا زور العىس سەزىمىن ءبىلدىرىپ قويعانىمىز ءلازىم.
– ءسىز سوڭعى ءتورت جىل بويىنا رەسپۋبليكانىڭ دزيۋدو فەدەراتسياسىن باسقارىپ كەلدىڭىز. بۇل سالا ساڭلاقتارىنىڭ مۇمكىندىكتەرى جونىندە نە ايتار ەدىڭىز؟
– بارشاڭىزعا بەلگىلى, ازىرگە دزيۋدوشىلارىمىز وليمپيادا تاريحىندا جالعىز عانا كۇمىس مەدالعا يە بولىپ وتىر. ونى 2008 جىلى بەيجىڭدە اسحات جىتكەەۆ جەڭىپ العان بولاتىن. ءدال قازىر ءبىزدىڭ مۇمكىندىگىمىز سول كەزدەگىدەن اسىپ تۇسپەسە, ءبىر دە تومەن ەمەس. قۇراما ساپىندا الەم دزيۋدوسى ليدەرلەرىنىڭ بىرىنەن سانالاتىن ەكى بىردەي ساڭلاق بار. ازىرگە اڭگىمە جىگىتتەرىمىز تۋرالى بولىپ وتىر. مەن ويعا الىپ وتىرعان ماكسيم راكوۆ پەن ەلدوس سامەتوۆتىڭ قاي-قايسىسى دا تۋرنيردە ەڭ جوعارى ناگرادا ءۇشىن كۇرەسە الادى. ەكەۋىنىڭ دە الەم چەمپيونى دەگەن اتاقتارى بار. ەگەر جاعداي دۇرىس قالىپتاسىپ جاتسا, ولار العا قويعان ماقساتتارىن تولىق ورىنداپ شىعادى. سول سياقتى احۋالى وڭىنان وربىسە, جانساي سماعۇلوۆ پەن ديدار حامزا دا ايدى اسپاننان ءبىر-اق شىعارۋعا دايىن. ال قىزدار اراسىنان گالبادراح وتگونتسەتسەگ پەن ماريان ورداباەۆانىڭ جەڭىسكە جەتۋ ءۇشىن بارىن سالاتىندارىنا ءوز باسىم سەنەمىن. ەكەۋى دە وتاندىق سپورت شەجىرەسىنە ەڭ ءبىر جارقىن پاراقتار قوسا الاتىنىنا كۇمانىم جوق.
مەن دزيۋدوشىلاردىڭ دا تاتامي ءۇستىندە جاسىنداي جارقىلداپ, بارشا باسەكەلەستەرىنەن جەڭىستى كۇشپەن تارتىپ اكەتۋلەرىن تىلەيمىن. بۇعان ولاردىڭ قارىم-قابىلەتى جەتەدى, مۇمكىندىكتەرى مول. سوڭعى جىلدارى رەسپۋبليكا دزيۋدو فەدەراتسياسى, سونداي-اق سپورت جەكپە-جەكتەرى مەن كۇشتىك سپورت تۇرلەرى كونفەدەراتسياسى بۇل سالالاردا وراسان زور جۇمىستار اتقارىپ, ەلدە كوپتەگەن ءىرى تۋرنيرلەر ۇيىمداستىردى. قازاقستان دزيۋدو فەدەراتسياسىنىڭ قازىرگى پرەزيدەنتى كەڭەس راقىشەۆ – سپورتتى جانىنداي سۇيەتىن, ەلىمىزدىڭ ناعىز پاتريوتى رەتىندە كورىنىپ جۇرگەن اتپال ازامات. ونىڭ سالاعا كورسەتىپ جاتقان قىزمەتى ۇشان-تەڭىز.
– قالاي ويلايسىز, قازاقستان قۇراماسى وسىدان 4 جىل بۇرىن لوندوندا قول جەتكىزىلگەن جەتىستىكتەرىن وسى جولى قايتالاي الا ما؟
– مەن بۇعان بىلاي جاۋاپ بەرەمىن: ەشقاشان مۇمكىن ەمەس نارسە بولمايدى. البەتتە, قازىرگى احۋالىمىز بۇرىنعىدان ءبىرشاما قيىنداۋ. بۇعان اۋىر اتلەتيكا قۇراماسىنىڭ باسىنان كەشكەن تەپەرىشتەرى ءبىرىنشى سەبەپ بولىپ وتىر. دوپينگ جانجالىنىڭ كەسىرىنەن بەيجىڭ مەن لوندوندا جۇلدىز بولىپ جارقىراعان يليا يلين باستاعان 4 وليمپيادا چەمپيونى جارىس جولىنان شىعىپ قالدى. سوعان قاراماستان, ريودا ەڭ جوعارى ناگرادا ءۇشىن كۇرەسەتىن اتلەتتەرىمىز بار. قۇراما كوماندا جاتتىقتىرۋشىلار شتابى بىزگە قازىر وسىنداي بولجام ايتتى. ءبىز سول ۋاجگە تۇرايىق. شىنىندا دا الەكساندر زايچيكوۆ پەن نيدجات راگيموۆ وليمپيادانىڭ بيىك تۇعىرىنان كورىنىپ جاتسا, تاڭ قالۋعا بول
مايدى. ەڭ باستىسى, بىزدە اقىرىنا دەيىن كۇرەسەتىن كەسكەكتى ەرلەر جەتەرلىك. سولاردىڭ جولدارى بولۋلارىن تىلەيىك.
بوكسشىلار دايىندىقتى باستاپ كەتتى
قازاقستان بوكسشىلار قۇراماسى ريو-دە-جانەيرودا وليمپيادا الدىنداعى العاشقى جاتتىعۋىن باستادى. ۇلتتىق وليمپيالىق كوميتەت وسى تۋراسىندا حابارلادى.
ءبىزدىڭ بىلعارى قولعاپ شەبەرلەرى ءبىرىنشى سىناقتى Athlete’s Hall اتتى جاڭا سپورت كەشەنىندە وتكىزدى. بۇل وليمپياداشىلار ءۇشىن ارنايى جابدىقتالعان ارەنا بولىپ شىقتى. مۇنداعى باستى ەرەكشەلىك, جاتتىعۋ پروتسەسى ىقتيمال باسەكەلەستەر كوزىنەن تاسادا جۇرگىزىلەدى. بۇعان رينگتىڭ قورعانىش ەكراندارمەن جابدىقتالۋ ارقىلى ونى سىرت كوزدىڭ سۇعىنان ساقتاپ تۇراتىنى اسەر ەتەدى.
برازيلياعا – ەڭ قىمبات بيلەتپەن
برازيليانىڭ ريو-دە-جانەيرو قالاسىنا الىپ باراتىن ەڭ قىمبات ۇشاق بيلەتىن قازاقستاندىق ازامات ساتىپ الدى. مۇنى Forbes.kz پورتالىنىڭ اقپارىنشا, تمد-داعى ءىرى تۋريستىك Aviasales كومپانياسىنىڭ وكىلى يانيس دزەنيس مالىمدەگەن.
قازاقستاندىق جولاۋشى مۇنداي قىمبات بيلەتتى ەكى اۋە كەمەسىمەن ۇشىپ جەتۋ ارقىلى ساتىپ العان. ونىڭ وسى ەكى رەيس ءۇشىن تولەيتىن اقشاسى 957 054 تەڭگە بولعان. ال بيلەت بيىلعى 5 قاڭتار كۇنى ساتىپ الىنىپتى. ول سول كەزدەگى 343 تەڭگەلىك باعاممەن ەسەپتەگەندە, 2800 دوللاردى قۇراعان. بۇل ريو-دە-جانەيروعا ەكونوم-كلاسپەن اپاراتىن بيلەتتەردىڭ ەڭ قىمباتى بولىپ شىققانىن كورسەتەدى. ايتقانداي, ونىڭ قاڭتار ايىندا الىنۋى ارقاسىندا باعاسىن از دا بولسا ارزانعا تۇسىرگەن كورىنەدى. ايتپەسە, ءدال قازىر بۇلايشا ەكى ساپار ارقىلى جول ءجۇرۋ 2,5 ميلليون تەڭگەگە ($7000) تۇسەدى ەكەن.
لۋتسەنكونىڭ ورنىن زەيتس باسادى
«استانا» ۆەلوكومانداسىنىڭ مۇشەسى, 23 جاسقا دەيىنگىلەر اراسىنداعى الەم چەمپيونى الەكسەي لۋتسەنكو جاراقاتتانىپ قالۋىنا وراي وليمپيالىق ويىندارعا قاتىسا المايدى. ول جاقىندا فرانتسيادا ۇلكەن سورە الدىنداعى قورىتىندى جاتتىعۋىن وتكىزىپ جاتقان كەزىندە اۆتوموبيلمەن سوقتىعىسىپ قالدى. وسىندا العان جاراقاتى ايتارلىقتاي زارداپتى بولىپ شىقتى.
ۆەلوشاباندوز سونىڭ ءناتيجەسىندە موناكوداعى سپورت گوسپيتالىنە شۇعىل جەتكىزىلدى. وسى جەردە دارىگەرلەر ونىڭ تابانىنان جاراقات الىپ قالعانىن انىقتادى. بۇدان كەيىن كوماندانىڭ ءدارىگەرلەر قۇرامى الەكسەيدى قاراپ شىعىپ, جارىس جولىنا ءازىر شىعا المايتىنىنا كوز جەتكىزدى. وعان ەندى كەمىندە ءۇش اپتا تىنىعۋ كەرەك. بۇل ارالىقتا سپورتشى دارىگەرلەردىڭ مۇقيات نازارىندا بولادى. ولار ۆەلوشاباندوز احۋالىن ۇدايى تەكسەرۋدەن وتكىزىپ تۇرادى.
– الەكسەي ەندى عانا «تۋر دە فرانس» كوپكۇندىگىن تابىستى اياقتاپ شىعىپ ەدى. وسى جارىس ونىڭ وليمپياداعا دايىندىعىنىڭ ءتۇيىنى بولىپ ەدى. تاپ ويىندار الدىندا, سوعان فينالدىق جاتتىعۋ كەزىندە مىناداي جاعدايعا دۋشار بولعانى قانداي وكىنىشتى, – دەدى كوماندانىڭ باس مەنەدجەرى الەكساندر ۆينوكۋروۆ. – مۇنىڭ ۇستىنە, سپورتشى قازىر ءوزىنىڭ ناعىز بابىندا بولاتىن. ءبىز ونىمەن ۇزاق ۋاقىت بويى تاباندى تۇردە جۇمىس جاساسىپ كەلدىك. ونى قازىرگى دەڭگەيىنە جەتكىزدىك. سوندىقتان, كەنەتتەن لەشانىڭ جاراقات الىپ قالۋى ءبىزدى قاتتى قاپالاندىرىپ جىبەردى... ونىڭ ءوزى دە وسى وليمپيادادا مەدال ءۇشىن كۇرەسە الاتىنىن سەزىنىپ كەلگەن-ءتىن. ارينە, ءبىز ۆەلوسپورتتىڭ سپورتشىعا كوپ جاراقات اكەلەتىن جارىس ءتۇرى ەكەنىن جاقسى بىلەمىز. مۇندا تاۋەكەلشىلىك كوپ. مۇنداي جاعدايلار بولىپ تۇرادى. ەندى تەك الەشانىڭ تەزىرەك ساۋىعىپ, قاتارعا قوسىلۋىن تىلەيمىن.
كوماندا وسىدان كەيىن الەكسەي لۋتسەنكونىڭ ويىنداردا ورنىن باساتىن ۆەلوشاباندوزدى تەز انىقتادى. ول – «استانا» كومانداسىنىڭ كەلەسى بەلگىلى ءمۇشەسى اندرەي زەيتس. ول بۇعان دەيىن قازاقستاننىڭ ۆەلوسپورت قۇراماسىنىڭ رەزەرۆىندە تۇرعان. ريودا توپتىق جارىسقا دا, جەكە سايىسقا دا قاتىسادى. ال ونىڭ جانىندا «استانا» كومانداسىنىڭ باقتيار قوجاتاەۆ, ارتەم زاحاروۆ سىندى تاعى ەكى مۇشەسى بولادى.
ورتالىق ازياداعى شوقتىعى بيىگى – قازاقستان
تاۋەلسىزدىك جىلدارىندا وسىعان دەيىن وتكەن 5 وليمپيالىق ويىنداردا ورتالىق ازيا ەلدەرى اراسىندا قازاقستان قۇراماسىنىڭ الدىنا ءتۇسىپ كورگەن كوماندا بولعان جوق. ءبىزدىڭ رەسپۋبليكا جاماعاتى بۇرىنعى وداق ەلدەرى قاتارىندا دا رەسەي مەن ۋكراينادان كەيىنگى ءۇشىنشى بەلەستى الدى دا وتىردى.
قازاقستان ويىنداردا بايگە تورىنەن كورىنگەن ساڭلاقتارىن لايىقتى ماراپاتتاۋ جاعىنا كەلگەندە دە, كورشىلەرىنەن ءبىراز الدا. بۇل ارتىقشىلىق وسى وليمپيادا تۇسىندا دا كورىنگەلى تۇر. قازاقستاننىڭ التىن جۇلدەگەرى مۇنىڭ الدىنداعى الامانداعى سياقتى, بۇل جولى دا جەڭىسى ءۇشىن 250 مىڭ دوللار سىي الادى. بۇل – ورتالىق ازياداعى ەڭ جوعارعى كورسەتكىش. سول سياقتى, كۇمىس جۇلدەگەرگە – 150 مىڭ, قولا جۇلدەگەرگە 75 مىڭ دوللار كولەمىندە سىياقى بەرىلەدى.
قازاقستان ريوعا سپورتتىڭ 26 تۇرىنەن 104 سپورتشى اتتاندىردى. حالىقارالىق ساراپشىلاردىڭ بولجامدارى بويىنشا, ءبىزدىڭ دەلەگاتسيا 10-15 ناگرادا الىپ قالۋى, ولاردىڭ 2-3-ءى التىن مەدال بولۋى مۇمكىن.
وزبەكستان وليمپيالىق قۇراما كومانداسى 70 اتلەتپەن تولىعىپ تۇر. ولار سپورتتىڭ 13 ءتۇرى بويىنشا جارىس جولىنا شىعادى. بۇل ەلدىڭ سپورت شەنەۋنىكتەرى ءارتۇرلى ساپاداعى 4-5 مەدال ءۇشىن كۇرەسەتىندەرىن ايتادى. بۇعان دەيىنگى بەس وليمپيادادا بۇل ەلدىڭ تەرمە جاماعاتى 5 التىن, 5 كۇمىس, 10 قولا, بارلىعى 20 مەدال العاندارىن ايتا كەتەيىك. ال بيىل وزبەك ۇكىمەتى التىن مەدال جەڭىپ العان سپورتشىسىنا 200 مىڭ دوللار اقشا تاپسىرۋدى موينىنا الىپ وتىر. كۇمىس مەدال ءۇشىن مۇندا – 100, قولا مەدال ءۇشىن 75 مىڭ دوللار كولەمىندە سىي-سياپات بەرىلەدى.
قىرعىزستان برازيلياعا 16 سپورتشىسىن اتتاندىرادى. ولار سپورتتىڭ 6 ءتۇرى بويىنشا كۇش سىناسادى. كورشى ەل ايرىقشا ءۇمىتتى ايەلدەر كۇرەسىنىڭ شەبەرى ايسۋلۋ تىنىبەكوۆاعا اۋدارىپ وتىر. ول ازيا ويىندارىنىڭ, ۋنيۆەرسيادانىڭ جانە ازيانىڭ چەمپيونى دەگەن اتاقتارعا يە بولعان. ەلدىڭ بيلىگى التىن ءجۇلدەگەر اتانعان سپورتشىعا – 104 مىڭ دوللار, ەكىنشى ورىن العانعا – 74 مىڭ دوللار, ءۇشىنشى بولعانعا 51 مىڭ دوللار شاماسىندا تارتۋ دايىنداپ قويعان.
تۇرىكمەنستان قۇراماسىن 8 سپورتشى قۇرايدى. بۇلاردىڭ تورتەۋى عانا ريوعا تىكەلەي جولداما جەڭىپ العان. قالعاندارى قوسىمشا كۆوتا ەسەبىنەن ليتسەنزياعا يە بولعان. بىراق, بۇل ەلدە وليمپيادادا وزعانداردى قانداي سىياقىلاردىڭ كۇتىپ تۇرعانى تۋرالى ەشتەڭە ايتىلىپ جاتقان جوق. بۇعان, ءسىرا, رەسپۋبليكانىڭ ورتالىق ازياداعى وسى كەزگە دەيىن بىردە-ءبىر ويىنداردا مەدال الىپ كورمەگەن جالعىز مەملەكەت بولىپ وتىرعانى سەبەپ شىعار.
تاجىكستان وليمپيالىق كومانداسى 7 سپورتشىمەن ريوعا جول جۇرەدى. ولاردىڭ ىشىندە ءجۇلدەگەرلەر ساپىنان كورىنۋگە مۇمكىندىگى ۇلكەنى يادرو لاقتىرۋشى ديلشود نازاروۆ بولسا كەرەك. كوماندانىڭ تۋىن دا وسى سپورتشى الىپ وتەدى. رەسمي اقپارعا قاراعاندا, رەسپۋبليكا سپورتشىلارى اراسىنان التىن جۇلدەگەر شىقسا, وعان 38,1 مىڭ دوللار بونۋس تاپسىرىلادى. ال كۇمىس جۇلدەگەر ءۇشىن – 31,8 مىڭ, قولا جۇلدەگەر ءۇشىن 25,5 مىڭ دوللار سىيلىق دايىندالىپ تۇر. تاجىك سپورتشىلارى تاۋەلسىزدىك جىلدارىندا وتكەن وليمپيالىق ويىنداردا 1 كۇمىس جانە 2 قولا مەدال جەڭىپ العان.
بەتتى دايىنداعان سەرىك ءپىرنازار, «ەگەمەن قازاقستان»
