ۇلت رۋحىن كوتەرگەن

كەشە استاناداعى قازاقستان قارۋلى كۇشتەرى ۇلتتىق اسكەري-پاتريوتتىق ورتالىعىندا حالىق قاھارمانى, كەڭەس وداعىنىڭ باتىرى, اۆياتسيا گەنەرال-مايورى, عارىشكەر توقتار اۋباكىروۆتىڭ 70 جاسقا تولۋىنا وراي مەرەكەلىك شارا ءوتتى.   قازاقتان شىققان تۇڭعىش عارىشكەر توقتار اۋباكىروۆتىڭ مەرەيتويىنا ارنالعان جيىن­دى اشقان قورعانىس ءمينيسترى يمانعالي تاس­ماعامبەتوۆ ءبىرىنشى كەزەكتە قازاقستان رەس­­پۋب­ليكاسىنىڭ پرەزيدەنتى – قارۋلى كۇش­تەر­دىڭ جوعارعى باس قولباسشىسى نۇرسۇلتان نازارباەۆتىڭ مەرەيتوي يەسىنە ارناعان قۇتتىقتاۋ حاتىن وقىپ بەردى. «قۇرمەتتى توقتار وڭعارباي ۇلى, 70 جاسقا تولعان مەرەيتويىڭىز قۇتتى بولسىن. ءسىز حال­قىمىزدىڭ ءبىرتۋار, ماقتان تۇتار داڭقتى ۇل­دا­رىنىڭ ءبىرىسىز. جاستاي قيىن دا قاتەرلى اسكەري ۇشقىش ماماندىعىن مەڭگەرىپ, بويىڭىزداعى تا­بيعي دارىنىڭىزبەن جانە ەرجۇرەكتىلىگىڭىزدىڭ ارقاسىندا وسى سالادا تاماشا تابىستارعا قول جەتكىزدىڭىز. ءسىزدىڭ ەسىمىڭىز كوسموناۆتيكانىڭ تاريحىنا قازاق حالقىنىڭ عارىش كوگىنە كوتەرىلگەن تۇڭ­عىش وكىلى رەتىندە ەندى. ەڭبەكتەرىڭىز بۇرىنعى كەڭەس وداعى مەن ەگەمەن ەلىمىزدىڭ ەڭ جوعارى مەملەكەتتىك ناگرادالارىمەن اتاپ ءوتىلدى. جاۋاپتى مەملەكەتتىك قىزمەتتەر اتقارىپ, پارلامەنت دەپۋتاتى بولىپ سايلانىپ, ەلىمىزدىڭ تاۋەل­سىزدىگىن نىعايتۋعا ءوز ۇلەسىڭىزدى قوستىڭىز. سىزگە مىقتى دەنساۋلىق, وتباسىڭىزعا اماندىق پەن قۇت-بەرەكە تىلەيمىن. ۇزاق تا باقىتتى ءومىر ءسۇ­رىپ, حالقىمىزدىڭ قوشەمەتىنە بولەنە بەرىڭىز, تويى­ڭىز تويعا ۇلاسسىن», – دەلىنگەن قۇتتىقتاۋ حاتتا. ودان ءارى يمانعالي تاسماعامبەتوۆ باتىر ۇلدىڭ ەرلىككە تولى ءومىر جولى, ەلىنە سىڭىرگەن ەڭبەگى تۇرعىسىندا كەڭىنەن اڭگىمەلەپ بەردى. بۇرىنعى كەڭەس وداعىنىڭ, رەسەي مەن ەۋ­رو­وداق ەلدەرىنىڭ ۇشقىش-عارىشكەرلەرى, قازاق­ستان اسكەري اۆياتسياسىنىڭ ارداگەرلەرى, ەلىمىزدىڭ اسكەري-اۋە كۇشتەرىنىڭ قولدانىستاعى ۇشقىشتارى, اقمولا وڭىرلىك گارنيزونىنىڭ اسكەري قىزمەتشىلەرى قاتىسقان شارادا كەڭەس وداعىنىڭ باتىرى, سىناقشى-ۇشقىش, پولكوۆنيك, 6 مارتە اۆياتسيالىق رەكورد ورناتقان گەورگي موسولوۆ, توقتار اۋباكىروۆتىڭ كومانديرى, كەڭەس وداعىنىڭ باتىرى, كەڭەستىك جانە رەسەيلىك ۇشقىش-عارىشكەر الەكساندر ۆولكوۆ, ميگ-29 جانە ميگ-29م ۇشاقتارىنىڭ باس كونسترۋكتورى ۆالەري نوۆيكوۆ, جازۋشى, م.شولوحوۆ اتىنداعى حالىقارالىق سىيلىقتىڭ يەگەرى ءسابيت دوسانوۆ, مەملەكەت جانە قوعام قايراتكەرى ورالباي ءاب­دىكارىموۆ جانە باسقالار ءسوز سويلەپ, قازاقتىڭ باتىر ۇلىنا ىزگى تىلەكتەرىن جەتكىزدى. جيىن بارىسىندا مەرەيتوي يەسىنىڭ قۇرمەتىنە وراي ەلىمىزدىڭ ەسترادا جۇلدىزدارى ءوز ونەرلەرىن ۇسىندى. جولدىباي بازار, «ەگەمەن قازاقستان»