الماتى وبلىسىندا اكىم كومەكشىسى الاياقتىعى ءۇشىن سوتتالدى

الماتى وبلىسىندا ىلە اۋدانى اكىمىنىڭ كومەكشىسى مەن اكىمدىكتىڭ باس مامانى الاياقتىق ارەكەتتەرى ءۇشىن سوت جۇزىندە جازا الدى. الماتى وبلىستىق سوتى ءباسپاسوز قىزمەتىنىڭ مالىمەتىنشە, سوتتالۋشىلار ورىندىعىنا ىلە اۋدانى اكىمىنىڭ كومەكشىسى م. جۇماعۇلوۆ پەن «ىلە اۋدانى اكىمى اپپاراتى كاسىپكەرلىك ءبولىمى» مەملەكەتتىك باسقارماسىنىڭ باس مامانى ف. ەرقوجانوۆا وتىرعان. ءباسپاسوز قىزمەتىنىڭ دەرەگىنە قاراعاندا, م. جۇماعۇلوۆ ءوزىنىڭ قىزمەتتىك جاعدايىن پايدالانا وتىرىپ, «جەڭىل جولمەن كەلەتىن اقشا» جاساعىسى كەلگەن. ءسويتىپ, ءبىر ازاماتشانىڭ سەنىمىنە كىرىپ, وعان ماقساتتى جەر تەلىمدەرىنە وزگەرىس ەنگىزىپ, قوسىمشا جەر الىپ بەرۋگە ۋادە بەرگەن. بۇعان قوسا, كومەكشى زارداپ شەگۋشىنى مەملەكەتتىك ورگاندار تاراپىنان بولاتىن بارلىق تەكسەرىستەردەن قۇتقارىپ قالۋعا ۋادە ەتكەن. بىراق ول ءوزىنىڭ بۇل ۋادەلەرىن ورىنداي الماي, ىسكە جوعارىدا اتالعان باس ماماندى قوسقان. سول كەزدە جۇماعۇلوۆ ەرقوجانوۆاعا زارداپ شەگۋشىدەن جەر تەلىمىن وزگەرتىپ بەرۋ جونىندە ءوتىنىش جازدىرتىپ الۋدى تاپسىرعان. ناتيجەسىندە ول 21 000 اقش دوللارى (3 937 500 تەڭگە) كولەمىندە زارداپ شەككەن. ىلە اۋداندىق سوتى «قيتۇرقى ارەكەتتەر» جاساۋشىلاردى بوستاندىقتارىن شەكتەۋ تۇرىندە جازالاۋعا ۇكىم شىعاردى. وسىلايشا اكىمنىڭ كومەكشىسى م. جۇماعۇلوۆ دۇنيە-م ۇلىكتەرى تاركىلەنە وتىرىپ, 3 جىل 2 ايعا سوتتالۋعا جانە ءومىر بويى مەملەكەتتىك قىزمەت جاساۋ قۇقىنان ايرىلۋعا كەسىلدى. باس مامان ف. ەرقوجانوۆا دۇنيە-م ۇلىكتەرى تاركىلەنە وتىرىپ, 3 جىلعا سوتتالۋعا جانە ءومىر بويى مەملەكەتتىك قىزمەت جاساۋ قۇقىنان ايرىلۋعا كەسىلدى. ۇكىم زاڭدى كۇشىنە ەنگەن جوق. نۇربول الدىباەۆ