شەبەر جىگىتتىڭ «شەدەۆرلەرى»

«ەل ءىشى – ونەر كەنىشى». اياگوز اۋدانىنىڭ مامىرسۋ اۋىلىنداعى اسىقتان جاسالعان اسىقتىڭ ءمۇسىنى كوزگە جىلى ۇشىرايتىن ۇلتتىق ناقىشتاعى ەرەكشە ءمۇسىن. سابىرجان عابباسوۆ اتىنداعى جالپى ءبىلىم بەرەتىن ورتا مەكتەبىنىڭ الدىندا ورنالاسقان كومپوزيتسيا اۆتورى – بەينەلەۋ ءپانىنىڭ مۇعالىمى قايرات سىدىقوۆ. مەكتەپتىڭ ءىس جۇرگىزۋشىسى اسەم سارى-باە­ۆا­نىڭ ايتۋىنشا, اۋىلدى اباتتاندىرۋعا اي­رىقشا ۇلەس قوسىپ جۇرگەن مۇعالىم سونىمەن بىرگە, تىرنالار ءمۇسىنىن, «وركەنيەتتى قازاقستان» اتتى ءۇش كومپوزيتسيادان قۇرالعان فيتونىڭ دا اۆتورى. – قايرات – جوعارى ساناتتى مۇعالىم. كوپ­تەگەن وڭىرلىك بايقاۋلاردىڭ جەڭىمپازى. ون ساۋساعىنان ونەر تامعان ول قىستىگۇنى اۋىل بالالارىنا تارتۋ رەتىندە مۇز مۇسىندەر دە جاسايدى, – دەيدى ارىپتەستەرى. اسىقتى قۇراستىرۋعا 1080 دانا اسىق جۇم­سالعان. بۇل اسىقتاردى مەكتەپ ديرەكتورى ريفحات زايت ۇلى جيناپ, مۇسىنشىگە تاپسىرعان ەكەن. قايرات كوپتەن كوكەيىندە جۇرگەن اسىقتىڭ بەينەسىن الدىمەن تەمىردەن ءيىپ جاساپ, سودان سوڭ تەمىر قاڭقاعا اسىقتاردى ارنايى جەلىممەن جاپ­سىرىپ شىققان. ءبىر مەترلىك تۇعىرى بەتون­نان قۇيىلىپ, ويۋ-ورنەكپەن ادىپتەلگەن. ال اسىق ءمۇ­سىنىنىڭ بيىكتىگى – 60, ەنى 30 سانتيمەتر­گە تەڭ. مەكتەپتە 20 جىلدان استام ۋاقىت ۇستازدىق ەتىپ كەلە جاتقان قايراتتىڭ تالانتتى شاكىرت­تەرى بارشىلىق. ولاردىڭ اراسىندا وتاندىق تەلەارنالاردا كورسەتىلىپ جۇرگەن «ءالي مەن ايا», «بايتەرەك» مۋلتفيلمدەرىنىڭ كور­كەم­دەۋشى سۋرەتشىلەرى دە بار. دۋمان اناش, «ەگەمەن قازاقستان» شىعىس قازاقستان وبلىسى, اياگوز اۋدانى