قوقىستاعى قازىنا

ءبىر جىلى حەلسينكيگە جول تۇسكەن. سوندا سۋومي جۇرتىنىڭ تابيعاتقا دەگەن ايالى كوزقاراسىن كورىپ, ول جۋرناليستىك جولجازباعا تۇرتكى بولعان ەدى. وندا قورشاعان ورتانىڭ تازالىعىن بەتكە ۇستاعان ەستى جۇرتتىڭ سونىسىن وزدەرىنىڭ ءبىر جاعىنان ورىندى ماقتان ەتەتىنى, دۇكەنىنە كىرسەڭ, العان زاتىڭدى پوليەتيلەننەن ەمەس, قاعازدان تىگىلگەن دورباعا سالىپ بەرەتىنى, قوقىسىن ءبولىپ-ءبولىپ توگىپ, (پولەتيلەنى ءبىر بولەك, مەتالدان جاسالعانى ءبىر بولەك, ت.س.س.) ونىسىن قايتادان ءوڭ­دەپ, قاجەتكە جاراتاتىنى, ال مەيرامحاناعا كەلگەن مەيمانعا الدىمەن ءبىر بوكال سۋ ۇسىناتىنى, سۋلارىنىڭ تازالىعىن برەندكە اينالدىرعانى, سول ساتتە كوكشەنىڭ كەستەلى دە, كورىكتى كولدەرىنىڭ بە­تىندە ءجۇزىپ جۇرگەن بوتەلكەلەردىڭ ەسكە تۇسكەنى جايىندا جازعانىمىز بار. ءتىپتى, فينليانديانىڭ قاجەتتى ەنەرگيانىڭ باسىم بولىگىن وسى قوقىستان الاتىنى دا سول ماقالادا تىلگە تيەك ەتىلگەن-ءدى. بۇل ەلدە قوقىستى ءبولىپ توگۋدىڭ جولعا قويىلعانى سونشالىق, شىنى بوتەلكەلەردىڭ قايتارىلۋى 100, ال پلاستيك جانە اليۋمين قال­بىر­لاردىڭ قايتارىلىمى 96 پايىزدى قۇراپ, قوقىستى قايتارۋ كادىمگىدەي ءتيىمدى قۇرىلعان جۇيەگە اينالعان. تۇتىنۋشىعا وڭدەۋگە كەلەتىن قوقىسىن قايتارعانى ءۇشىن اقشا تولەنىپ, تۇرعىن ۇيلەردىڭ ماڭىنان تۇرمىستىق كوممۋنالدىق قىزمەت كورسەتەتىن ۇيىمدار ءتۇرلى قاعاز, ورگانيكالىق قالدىقتار قا­بىلدايتىن ارنايى ورىندار اشىپ قويعان. سونىمەن بىرگە, قوقىستى دۇرىس سۇرىپتاپ توگۋشىلەر مەن كوپ قوقىس شىعارمايتىن پاتەرلەرگە قىزمەتتەر ءۇشىن اقى تولەۋدە جەڭىلدىكتەر بەرىلىپ, پاتەر يەلەرى اسا ۇقىپتى ۇيلەردىڭ تۇرعىندارىن كوممۋنالدىق اقىدان بىرنەشە ايعا بوساتۋ دا ويلاستىرىلعان ەكەن. سۋپەرماركەتتەر مەن ساۋ­دا ۇيلەرىندە مەتالل, شىنى ىدىس­تاردى قابىلداپ, وعان چەك بەرە­تىن ارنايى اۆتوماتتار جۇمىس ىستەيدى. ويتكەنى, فينليانديادا قالبىرعا, ءتۇرلى ىدىسقا سالىنعان, قۇيىلعان تاۋاردى الۋشى قۇتىنىڭ ىشىندەگىسىن عانا ساتىپ المايدى, سىرتقى ىدىسىنا دا كەپىل اقشا تولەيدى. قوراپتى, قالبىردى, قۇتىنى كەرى وتكىزگەن كۇندە كەپىل اقشاسىن كەرى قايتارىپ الادى. ال ءتۇرلى باتارەيالار مەن لامپالار ساتاتىن دۇكەندەرگە ىستەن شىققاندارىن اپارىپ وتكىزۋ دە جولعا قويىلىپتى. وتىنعا تەك قوقىس جاعىپ, ونىڭ قۋاتىمەن ەلەكتر ەنەرگياسىن تاراتاتىن ستانسالاردى دا فينليانديادان تاباسىز. جانە ولار شاعىن كوشە, كىشىگىرىم شاعىناۋدانداردى عا­نا ەمەس, تۇتاستاي قالالاردى جا­رىق­پەن قامتاماسىز ەتسە, بولا­شاقتا ولاردىڭ سانىن مولايتۋ مەملەكەتتىڭ الدىنا قويعان جوسپارىنا ەنگىزىلىپتى. وسىلاي قوقىستى قازىناعا اي­نال­دىرىپ, بولاشاقتا تەك تاس­تالعان زاتتاردان ميللياردتاعان پايدا تۇسىرەمىز دەگەن ەلدىڭ ءىسى وسى. اقپارات تاسقىنى الاپات زامان­دا قۇلاعىمىز تۇرىك جۇرسە ۇتىل­ماسىمىز حاق. التىن – ايا­عىمىزدىڭ استىندا, سىرتقا شەلەكتەپ توگىلگەن قوقىستا... الدە مۇنداي جۇيەنى ورناتۋ قولدان كەلمەيتىن ءىس پە؟ ال­ماتىدا, استانادا قوقىستان قازىنا جاساۋعا ۇمتىلعان وي-نيەت, يدەيالار ارا-تۇرا ەستىلىپ تە قالىپ جاتادى-اۋ. وسى ىزگى نيەت ىسكە اسسا, قانە... انار تولەۋحانقىزى, «ەگەمەن قازاقستان»