گۇلجيەك

  تاۋەلسىزدىكتىڭ 25 جىلدىعىنا وراي تالدىقورعاندى تۇرلەنتىپ قاراتال وزەنىنىڭ جاعالاۋىنان ۇزىندىعى 1414 مەترگە سوزىل­عان جاڭا كوشە بوي تۇزەدى. تۇرعىن­دار­دى قۋانىشىمەن قۇتتىقتاعان الماتى وبلىسىنىڭ اكىمى امان­دىق باتالوۆ استاناعا قاراپ بوي تۇزەيتىن تالدىقورعانعا قارا­تال وزەنى ەرەكشە كورىك بەرەتى­نىن ايتا كەلە, دەمالىس اللەيا­سى­نىڭ شامىن جاقتى. سامالاداي جارقىراعان شامدارمەن جارىسا وتشاشۋلارعا كەزەك بەرىلدى. وزىندىك قايتالانباس ەرەك­شە­لىگى بار بولعاندىقتان وسىناۋ جاڭا كوشە ءارى دەمالىس اللەياسى سالتاناتتى تۇردە اشىلىپ وتىر. وندا «تالدىقورعان كەشە, بۇگىن» اتتى فوتو جانە قىل­قالام تۋىندىلارىنىڭ كورمەسى ۇيىم­داستىرىلدى. ەلىمىز­گە تانى­مال انشىلەر مەن «الاتاۋ اۋەن­دەرى», «ۇشقوڭىر» فولك­لور­لىق ەتنوگرافيالىق ءان-بي ان­سام­بلى­نىڭ ونەرپازدارى ونەر كورسەتتى. جاعالاۋدىڭ ەرەكشەلىگى – ەرەسەكتەر مەن بالالاردىڭ ەركىن سەرۋەندەپ, تىنىعۋىنا بارلىق جاع­داي جاسالعان. وقتاي ءتۇزۋ كوشەنىڭ قوس قاپتالىنداعى جاياۋ جۇرگىنشى جولى­نا تەگىس توسەلگەن تاس كەڭ كوسىل­گەن كوگالمەن جاراسىم تاپقان. تىك شان­شىلا وسكەن قاراعاي, ارشا سەكىل­دى قىلقان جاپىراقتىلار, ارۋداي اق قايىڭ, تەربەلگەن كوك تەرەك تە ادام تىنىسىن كەڭەيتىپ, سارايىن اشا تۇسەدى. سان الۋان تۇسپەن تۇرلەنە تۇنىپ تۇرعان گۇلزارلار قازاقى ويۋلارداي قۇلپىرىپ ادام قولىنىڭ شەبەرلىگىن ايقىن كورسەتەدى. جالپى, جوبانىڭ اۆتورى ساۋلەت­شىلەر وداعىنىڭ توراعاسى اق­مىرزا تۇستەم­بەكوۆتىڭ يدەياسى بو­يىنشا جاعالاۋ اللەياسىنا جاي­لى ورىندىقتار قويىلىپ, بالا­لار­عا ارنالعان ويىن الاڭ­دارى, بەلسەندى دەمالىستى جاقسى كورەتىندەر ءۇشىن سكەيت پەن روللدروم جانە قالقاندار, شاتىرلار ورناتىلعان. ساحنالىق الاڭ دا وزىندىك ۇيلەسىمىن تاپقان. جاعالاۋدى جاڭبىرلاتا سۋارۋ ءۇشىن رەتىمەن جۇرگىزىلگەن قۇبىرلار, بەتوندالعان توعان, جارقىراي جانعان قۋات ۇنەمدەيتىن شامدار, اسفالت توسەلگەن تەپ-تەگىس ۆەلوسيپەدشىلەر جولى, «RHINO» فيرماسىنىڭ ساپالى جاب­دىقتارى كوپ جايدى اڭعارتادى. اقىندار «كۇندىز كۇمىس, ءتۇن­دە التىن بولىپ اعادى», دەپ تە تەڭەۋىن اسىراتىن قاراتالدىڭ تال­­دى­قورعان قالاسىنىڭ تۇسى­نان وتەتىن وسى ءبىر تۇسى تارامدانا ءتۇسىپ, شاعىن ارالدارى كوگەر­شىندەردىڭ سۋاتىنا اينالىپتى. بەيبىتشىلىك قۇسىكوك اسپانعا قالىقتاي كوتەرىلىپ, وڭ قاپتال­دا بوي جارىستىرا ورنالاسقان كوپقاباتتى ۇيلەرگە قاراي ۇشىپ بارادى... وسىنداي قۋانىشتى تالدىقورعاندىقتارعا تارتۋ ەتكەن الماتى وبلىسىنىڭ اكىمى اماندىق باتالوۆ وسىدان ون بەس جىل بۇرىن قىزمەت بابىمەن قاراتال وزەنىندەگى كوپىر تۇسى­نا كەلگەن ساتىندە جۋرناليس­تەرگە ءبىر-ەكى شاقىرىم جەردەگى تال­دى­قورعان قالالىق پەرزەنتحاناسىنا دەيىن سوزىلعان جۋاندىعى تۇيەنىڭ بەلىندەي قۇبىردى كور­سەتىپ: «وسى اشىق دالاعا كوپ­قا­باتتى تۇرعان ۇيلەر سالىنىپ, تال­دىقورعان تۇرلەنە تۇسەدى», دەگەن ەدى. سوندا بوس جاتقان دالاعا قاراپ سەنەرىمىزدى دە سەنبەسىمىزدى دە, بىلمەگەنبىز. بىراق ايتىلعان ءسوز تاسقا باسىلىپ قالعان ەدى. مىنە, بۇگىن سول ءسوز جۇزەگە استى.  نۇربول الدىباەۆ, «ەگەمەن قازاقستان» تالدىقورعان سۋرەتتى تۇسىرگەن رۋسلان قادىروۆ